Zephaniah 3

Kamba (Mbivilia) 1956

← Chapter 2 Jump to:

1Woo nĩ wayo ng’endi na mbuku! Ndũa nthĩn’ya!

2Ndĩaaĩthukĩĩsya ũla wasya; ndĩaakwata ũmanyĩsyo; ndĩaamũĩkĩĩa Yeova; ndĩaathengeea vakuvĩ na Ngai wayo.

3Anene mayo me mbee ũsumbĩnĩ ala me nthĩnĩ wayo nĩ mĩnyambũ ĩnĩkũluma; asili mayo nĩ nzũi wĩoo; ititialasya kĩndũ kĩvike ũnĩ.

4Athani mayo nĩ andũ mate vata na nĩ nzeleke; athembi mayo nĩmavukĩtye vala vandũ vatheu, nĩmang’endee ĩla mĩao.

5Yeova ũla wĩ katĩ wayo nĩ mũlũngalu; ndakeka ũthũku; kĩla kĩoko aetae ũsili wake wa katĩ kyeninĩ, we ndatĩaa kwĩanĩsya; ĩndĩ ũla ũte mũlũngalu ndesĩ nthoni.

6Nĩnĩvetete mbaĩ; maũvai moo matũlu nĩ mathei; nĩnĩtw’ĩkĩthĩtye nzĩa syoo nene mbanangĩku, ũndũ itavĩtĩlwa nĩ mũndũ; ndũa syoo nĩ mbanange, ũndũ itethĩwa mũndũ, ũndũ itatũwa.

7Naasya, Ndũtĩa ũngĩa; ũketĩkĩla ũmanyĩsyo; kwondũ wa ũu ũtũo wake ndũkavetwa, o kwĩanana na w’onthe ũla natwie ũndũ wake: ĩndĩ mookĩla tene na mathũkya meko moo onthe.

8Kwondũ wa ũu mbeteelai kũvika mũthenya ũla nĩũkĩla kũtava, easya ũu Yeova; nũndũ kũtw’a kwakwa nĩ kũmban’ya i mbaĩ, nĩ kana nĩkoman’ye mosumbĩ, nĩmonosye ũthilĩku wakwa, o ũthatu wakwa w’onthe mwai; nũndũ nthĩ yonthe ĩkaminwa nĩ mwaki wa kĩwĩu kyakwa.

9Na ĩndĩ nĩvo nĩtũngĩa i ngo sya andũ kĩthyomo kĩtheu, nĩ kana onthe mekaĩle syĩtwa ya Yeova, mamũthũkũmae na ngoo ĩmwe.

10Kuma mũingo ũya wa mbũsĩ sya Ethiovia avoyi makwa, o mwĩĩtu wa mũnyaĩĩkw’a wakwa, makandetee nthembo yakwa.

11Mũthenya ũsu ndũkasonokw’a nũndũ wa meko maku onthe, ala wambĩtanĩsye; nũndũ nĩvo nĩumya kwaku ala maku metanĩthasya na ngathĩĩo, naku ndũkethĩwa na wĩng’athĩlĩlyo ĩngĩ kĩĩmanĩ kyakwa kĩtheu.

12Ĩndĩ ngaeka kwaku ũko wa andũ ũla ũnyamaaw’a o na ngya, na makeevitha syĩtwanĩ ya Yeova.

13Ũtialo wa Isilaeli ndũkeka ũthũku, kana kũneena movũngũ; o na ũĩmĩ ũkenganaa ndũkoneka kanyw’anĩ woo; nũndũ makaya na kũkoma nthĩ, na kũtikethĩwa ũkatuma makĩa.

14Ina, we mwĩĩtu wa Saioni; ũkĩlya wasya, we Isilaeli; tana na kwĩw’a mũyo na ngoo yonthe, we mwĩĩtu wa Yelusaleme.

15Yeova nũvetete mosilĩlo maku, nĩwĩkĩtye mũmaitha waku ũtee: Mũsumbĩ wa Isilaeli, o Yeova, e katĩ waku; ndũkakĩa ũthũku o na ĩndĩĩ.

16Mũthenya ũsu Yelũsaleme ĩkatavw’a, Ndũkakĩe we; we Saioni, moko maku matikaleele.

17Yeova Ngai waku e katĩ waku, mwene ũtonyi ũla wĩtangĩĩa; akakũtanĩa na mũyo; akathũmũa wendonĩ wake; akakũtanĩa akina.

18Ngamomban’ya ala mew’aa woo nũndũ wa ũmbano ũtw’ĩtwe kwaa, ala maĩ maku; ala kũvũthw’a kwayo kwatw’ĩkie mũio kwoo.

19Sisya, ĩvinda yĩu ngatwaatwaana na onthe ala makũthĩnasya; na ngatangĩĩa ũla ũthuaa, na ngĩtũnga ũla walũngĩtw’e; na ngamatw’a ngatho na syĩtwa, ala mekalĩte me na nthoni nthĩ yonthe.

20Ĩvinda yĩu ngamũete nthĩnĩ, na ĩvinda yĩu ngamũmban’ya; nũndũ ngamũtw’a syĩtwa na ngatho katĩ wa ngo syonthe sya andũ sya nthĩ, yĩla nĩmũtũnga mume kũtavwanĩ kwenyu mũsyaĩtye, easya ũu Yeova.

← Chapter 2 Jump to: