Zephaniah 2

Kamba (Mbivilia) 1956

← Chapter 1 Jump to: Chapter 3 →

1Ĩtũngĩanĩei vamwe, ĩĩ, ĩtũngĩanĩe, we mbaĩ ĩla ĩte na nthoni;

2mbee wa ũtw’ĩo ũtanaumĩlya ũsyao, mbee wa mũthenya ũtanavĩta ta wewa, mbee wa ũthatu mwai wa Yeova ũtanoka ĩũlũ wenyu, mbee wa mũthenya wa ũthatu wa Yeova ũtanoka ĩũlũ wenyu.

3Mũmanthei Yeova, inyw’onthe ala auu ma nthĩ, ala mũkwatĩte motw’ĩo make; manthai ũlũngalu, manthai ũuu: nokwĩthĩwa mũvithwa mũthenya wa ũthatu wa Yeova.

4Nũndũ Ngasa ĩkatiwa, na Asikeloni ĩkeethĩwa ĩanzo; makalũngya Asitoti kwĩ mũthenya katĩ, na Ekiloni ĩkakũanĩw’a na mĩi.

5Woo nĩ wa ala matwĩe ũtee wa ũkanga, mbaĩ ya Akelethi! Ndeto ya Yeova yĩ ĩũlũ waku, we Kanaani, nthĩ ya Avilisiti; ngakwananga nĩ kana vatikaaĩthĩwe wa ũtũa kwaku.

6Na ũtee wa ũkanga kũkeethĩwa isesi, syĩ na tũsũmba twa aĩthi na syengo sya ndĩthya sya mbũi na malondu.

7Na ũtee wa ũkanga ũkatw’ĩka wa ũtialo wa nyũmba ya Yuta; makaĩthasya ndĩthya syoo sya mbũi na malondu kũu; nyũmbanĩ sya Asikeloni nĩkw’o mekomaa wĩoo; nũndũ Yeova Ngaĩ woo akamokĩa, na akamatũnga kuma kũtavwanĩ.

8Nĩnĩw’ĩte mbũthĩĩsya ya Moavi, na kũumana kwa ana ma Amimoni, kũla mavũthĩtye andũ makwa, na kwĩnenevya ene ĩũlũ wa mũvaka woo.

9Kwondũ wa ũu o tondũ nyie nĩ thayũ, easya ũu Yeova wa nguthu, Ngai wa Isilaeli, Vate ndĩi Moavi ĩkeethĩwa ta Sotomo, na ana ma Amimoni ta Ngomola, wĩkalo wa syĩnyeelya, na maima ma mũnyũ, na ĩanzo tene na tene: na ũtialo wa andũ makwa ũkamatava mũtavo, na ũtialo wa mbaĩ yakwa ũkamatiĩwa.

10Ũũ nĩw’o meĩthĩwa nũndũ wa ngathĩĩo syoo, nĩkwĩthĩwa nĩmavũthĩtye na kwĩtũlya ene ĩũlũ wa andũ ma Yeova wa nguthu.

11Yeova akeethĩwa ũtĩsyo kwamo; nũndũ akaimosethya ngai syonthe sya nthĩ; na andũ makamũthaitha, kĩla mũndũ vala ũĩ, o ithama syonthe sya i mbaĩ.

12O nenyu Aethiovia, mũkooawa na ũvyũ wakwa.

13Na akatambũũkĩa ngalĩ ya ĩũlũ na kw’oko kwake, na akyananga Asuli, na akatw’ĩkĩthya Nineva ĩanzo, na nyũmũ ta weũ.

14Na ndĩthya ikatindia katĩ wayo, nyamũ syonthe ila syĩ kwa i mbaĩ: ngunĩ na nzee ikekala mĩthyanĩ ya ituĩ syayo; wasya wasyo ũkeew’ĩkĩla mbũthinĩ; wanangĩko ũkeethĩwa myalyonĩ ya mĩomo: nũndũ nũvuĩte mbwaũ sya mĩtĩ ya mĩkũũ.

15Ĩno nĩ ndũa ya ũtanu ĩla ĩtwĩe ĩte kĩio, ĩla yaisye ngoonĩ yayo, Ninyie, na vati ũngĩ ate o nyie: A! Ũndũ ĩtw’ĩkĩte ĩanzo, vandũ va kũtindia nyamũ! Kĩla ũmwe ũla ũmĩvĩtĩlaa akamĩtimba, na kwĩkangya kw’oko kwake.

← Chapter 1 Jump to: Chapter 3 →