1 Corinthians 15 — Kamba (MBIVILIA ŨVOO MŨSEO)

10Ĩndĩ Ngai kwa mumo wake nĩwandw'ĩkĩthisye kĩla yu nĩĩ, na mumo wake kwakwa ndwaĩ wa mana. Tũisianĩsya, nyie nĩtethetye wĩa mũno kwĩ atũmwa ala angĩ, o na kau ti inyie ndethetye, ĩndĩ nĩ mumo wa Ngai ũla nĩ naw'o.

11Kwoou ĩndĩ o na ethĩwa ninyie nĩmũtavĩtye Ũvoo Mũseo kana nĩ atũmwa ala angĩ, ũndũ ũsu ti wa vata; ithyonthe tũtavanasya ũvoo o ũmwe, na now'o inyw'ĩ mwĩtĩkĩlĩte.

12Ethĩwa ĩndĩ tũtavanasya kana Klĩsto nĩwathayũũkiw'e kuma kwa akw'ũ, amwe menyu matonya ata kwasya kana kũi ũthayũũkyo wa akw'ũ?

13Ethĩwa kwa w'o kũi ũthayũũkyo wa akw'ũ, kwĩonany'a kana Klĩsto o nake ndaathayũũkw'a;

14na ethĩwa Klĩsto ndaathayũũkw'a, ũtavany'a witũ no wa mana na mũĩkĩĩo wenyu o naw'o no wa mana.

15Ũndũ ũngĩ twĩoneka nĩtũũkengana ĩũlũ wa Ngai, nũndũ tũtavanĩtye kana nĩwamũthayũũkisye Klĩsto, na kaĩ ndaamũthayũũkya, ethĩwa nĩw'o kana akw'ũ maithayũũkaw'a.

16Nĩkwĩthĩwa ethĩwa akw'ũ maithayũũkaw'a, o nake Klĩsto ndaathayũũkw'a.

17Na ethĩwa Klĩsto ndaathayũũkw'a, mũĩkĩĩo wenyu nĩ wa mana na naĩ syenyu mwĩ o nasyo o nayu.

18O ta ũu namo andũ ala makw'ĩte me aĩkĩĩi nthĩnĩ wa Klĩsto nĩ au.

19Ethĩwa ithyĩ twĩkwatĩtye Klĩsto kwondũ wa thayũ ũũ w'oka, twĩ ma kwĩw'ĩwa tei mũno mbee wa andũ ala angĩ onthe.

20Ĩndĩ kwa w'o Klĩsto nĩwathayũũkiw'e kuma kwa akw'ũ, ethĩwe ũĩkĩĩthyo kana andũ ala makw'a makathayũũkw'a o namo.

21Nĩkwĩthĩwa o tondũ kĩkw'ũ kyookie kwĩsĩla mũndũnĩ o ũmwe, o ta ũu ũthayũũkyo nĩwookie kwĩsĩla mũndũnĩ o ũmwe.

22Nũndũ o ũndũ andũ onthe makusaa nũndũ wa ngwatanĩo yoo na Atamu, now'o onthe makathayũũkw'a nũndũ wa ngwatanĩo yoo na Klĩsto.

23Ĩndĩ kĩla ũmwe akathayũũkw'a ĩvindanĩ yĩla yake: Klĩsto nĩwe waĩ wa mbee kũthayũũkw'a, na ĩndĩ ala make makathayũũkw'a ooka ĩngĩ.

24Nĩvo ĩndĩ mũminũkĩlyo ũkavika ĩtina wa Klĩsto kwananga mosumbĩ na monene na mokũmũ, na kũnengane ũsumbĩ kũla kwĩ Ngai Asa.

25Nĩkwĩthĩwa no nginya Klĩsto asumbĩke kũvika Ngai asinde amaitha onthe, na kũmaia ungu wa nyaĩĩ syake.

26Mũmaitha wa mũthya kwananga akeethĩwa kĩkw'ũ.

27Nũndũ Maandĩko Matheu measya, “Ngai nĩwaiie syĩndũ syonthe ungu wa ũtonyi wake.” Ĩndĩ yĩla kũkwĩwa, “Syĩndũ syonthe nĩsyaiiwe ungu wake,” nĩtwĩsĩ nesa kana Ngai ndatalĩtwe vo syĩndũnĩ isu, nĩkwĩthĩwa nĩwe wiaa syĩndũ syonthe ungu wa Klĩsto.

28Ĩndĩ yĩla syĩndũ syonthe ikethĩwa ungu wake, nĩvo ĩndĩ nake ũ Mwana ũkethĩwa ungu wa Ngai ũla wiaa syĩndũ syonthe ungu wake, na nĩ kana Ngai asumbĩke ĩũlũ wa syĩndũ syonthe.

29Yu ĩndĩ mo andũ methĩawa mayĩka ata yĩla meũvatiswa kwondũ wa andũ ala makwie? Ethĩwa kwa w'o akw'ũ maithayũũkaw'a, nĩkĩ andũ mavatisawa kwondũ woo?

30Nĩkĩ naitũ twĩlikasya mũisyonĩ kĩla ĩvinda?

31Nĩnĩthĩawa mũisyonĩ wa kũawa kĩla mũthenya! Ĩĩ, na nĩasya ũu mbaitũ, nũndũ wa kwĩkathĩĩa kwakwa kwondũ wenyu nthĩnĩ wa Klĩsto Yesũ Mwĩai waitũ.

32Ethĩwa nyie nokitie na andũ mavw'ana ta nyamũ sya kĩthekanĩ nĩ Eveso kwondũ wa itumi o sya kĩ-mũndũ, ve ũtethyo mwaũ kwakwa? Ethĩwa akw'ũ maithayũũkaw'a, “Tũyei lĩu na kũnyw'a nũndũ ũnĩ tũkakw'a.”

33Mũikakengeke: “Kĩtindo kĩthũku nĩkyanangaa mwĩkalo mũseo.”

34Amũkai! Ambĩĩai kwĩkala nesa na mũiekana na naĩ. Amwe menyu o na yu maimwĩsĩ Ngai. Nĩmũtavya ũu nĩ kana mwĩw'e nthoni.

35Mũndũ nũtonya kũkũlya atĩĩ, “Akw'ũ makathayũũkangw'a ata? Makeethĩwa na mwĩĩ ũilyĩ ata?”

36Asu nĩ makũlyo ma ndia! Mbeke ĩla wavanda ndĩmeaa nginya yambe kũkw'a.

37Na kĩla ũvandaa ti mũmea ũla ũkethĩwa, ĩndĩ no mbeke tũ, o ta ya nganũ kana o mbeũ ĩngĩ.

38Ĩndĩ Ngai nũmĩnengae mwĩĩ ũla wendaa; anengae kĩla mũthemba wa mbeke mwĩĩ wayo.

39Mĩĩ yonthe ti ya mũthemba ũmwe: Ve mũthemba ũmwe wa andũ, ũngĩ wa nyamũ, ũngĩ wa nyũnyi, na ũngĩ wa makũyũ.

40Ve mĩĩ ya ĩtunĩ na ve mĩĩ ya kũũ nthĩ; ũtisũku wa mĩĩ ya ĩtunĩ wĩ kĩvathũkany'o na ũtisũku wa mĩĩ ya kũũ nthĩ.

41Ve ũtisũku wa syũa, na ũngĩ wa mwei, na ũngĩ wa ndata; o na ũtisũku wa ndata ĩmwe wĩ kĩvathũkany'o na wa ndata ĩngĩ.

42Kwoou ũu now'o kũilyĩ ĩũlũ wa kũthayũũkw'a kwa akw'ũ. Mwĩĩ nũthikawa ũla woaa, ĩndĩ nũthayũũkaw'a wĩ na mwĩkalĩle ũte wa kwoa.

43Nũthikawa ũte na ndaĩa na ũithayũũkw'a wĩ na ndaĩa nene; nũthikawa wĩ mwonzu, na ũithayũũkw'a wĩ na vinya.

44Ũthikawa mwĩĩ wa kĩ-mũndũ, na ũithayũũkw'a mwĩĩ wa kĩ-veva. Ethĩwa ve mwĩĩ wa kĩ-mũndũ, o ta ũu ve mwĩĩ wa kĩ-veva.

45Nũndũ Maandĩko Matheu maĩtye, “Mũndũ wa mbee ũla nĩ Atamu, atw'ĩkie kyũmbe kĩ thayũ,” ĩndĩ Atamu wa mũthya atw'ĩkie Veva ũla ũnenganae thayũ.

46Ũla wambaa kũka mbee ti ũla wa veva, ĩndĩ nĩ ũla wa mwĩĩ na ĩtina ũla wa veva.

47Mũndũ wa mbee aumie mũthanganĩ na oombĩtwe na mũthanga, nake mũndũ wa kelĩ aumie ĩtunĩ.

48O ũndũ mũndũ ũla waumie mũthanganĩ wailyĩ, now'o o namo ala ma kũũ nthĩ mailyĩ; na o ũndũ ũla waumie ĩtunĩ ũilyĩ, now'o ala ma ĩtunĩ mailyĩ.

49O tondũ twĩ na kĩtutya kya mũndũ ũla woombiwe kuma mũthanganĩ, now'o tũkethĩwa na kĩtutya kya mũndũ ũla waumie ĩtunĩ.

50Kĩla ngũweta mbaitũ nĩ kĩĩ: Kĩla kyũmbĩtwe na mwĩĩ na nthakame kĩitonya kũtiĩwa ũsumbĩ wa Ngai, na kĩla kĩna mwĩkalĩle wa kwoa kĩitonya kwĩthĩwa na mwĩkalĩle ũte wa kwoa.

51Kwa ĩthukĩĩsyei nĩmũtonyee nzama: Tũikakw'a ithyonthe, ĩndĩ ithyonthe tũkaalyũlwa

52kwa mĩtũkĩ vyũ, o ta ĩveny'a na ĩsalukya yĩla soo wa mũminũkĩlyo wĩvuvwa. Nĩkwĩthĩwa soo ũkavuvwa, na akw'ũ maithayũũkw'a matakakw'a ĩngĩ, na o ta ũu naitũ tũkaalyũlwa.

53Nũndũ wũmbo ũũ wĩ na mwĩkalĩle wa kwoa, no nginya ũalyũlwe wĩthĩwe na mwĩkalĩle ũte wa kwoa, na wũmbo ũũ ũkusaa no nginya ũalyũlwe wĩthĩwe na wũmbo ũte wa kũkw'a.

54Kwoou yĩla kĩla kĩna mwĩkalĩle wa kwoa kĩkethĩwa na mwĩkalĩle ũte wa kwoa, na kĩla kĩkusaa kĩkethĩwa na mwĩkalĩle ũte wa kũkw'a, nĩvo ĩndĩ Maandĩko Matheu meĩthĩwa meanĩa ala maĩtye, “Kĩkw'ũ nĩkyanangĩtwe na ũsindi ũkakwatĩkana.”

55“We kĩkw'ũ, ũĩva yu ũsindi waku? Kĩkw'ũ, ũĩva yu ũmoa waku?”

56Ũmoa wa kĩkw'ũ nĩ naĩ, nayo naĩ yumasya vinya wayo mĩaonĩ.

57Ĩndĩ nĩtũũmũtũngĩa Ngai mũvea, ũla ũtũnengae ũsindi kwĩsĩla kwa Mwĩai waitũ Yesũ Klĩsto.

58Kwoou ĩndĩ mbaitũ endwa makwa, ũngamai na ũlũmu mũteũthingithw'a nĩ kĩndũ, na mũyĩnengane vyũ wĩanĩ wa Mwĩai mavinda onthe, mũimanya kana vai wĩa mũkatethya ũthũkũminĩ wa Mwĩai ũkaa mana.