bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
1 Corinthians 3
1 Corinthians 3
Kamba (MBIVILIA ŨVOO MŨSEO)
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 4 →
1
Mbaitũ, nyie ndyaĩ ndonya kũneena nenyu ta mwĩ ma mwĩkalĩle wa kĩ-veva; naneenie nenyu ta mwĩ ma mwĩkalĩle wa kĩ-mwĩĩ, na ta syana mwĩkalĩlenĩ wa Kĩ-klĩsto.
2
Namũnengae ĩia; ndyaamũnenga lĩu mũmũ nũndũ mũyaĩ mũnavikĩa kũya lĩu mũmũ. O nayu mũinamba kũvikĩa kũya lĩu ũsu,
3
nũndũ mwĩ ma mwĩkalĩle wa kĩ-mwĩĩ o na yu. Ethĩwa mwĩ o na kĩwĩu na ĩteta katĩ wenyu, kũu ti kwonany'a kana mwĩ ma mwĩkalĩle wa kĩ-mwĩĩ, na mwĩkalaa o ta andũ ma nthĩ?
4
Yĩla ũmwe wenyu ũkwasya, “Nyie nĩ wa Vaũlo,” na ũngĩ ayasya, “Nyie nĩ wa Avolo,” inyw'ĩ mũikwĩka o ta andũ ma nthĩ?
5
Avolo we nũũ? Na Vaũlo nake nũũ? Nĩ athũkũmi ma Ngai ala kwĩsĩla kwoo mwatw'ĩkie aĩkĩĩi, na kĩla ũmwe atethisye wĩa kwĩanana na ũndũ Mwĩai wamũnengete.
6
Nyie navandie mbeũ, Avolo nake amĩnyithya, ĩndĩ Ngai nĩwe wamĩnengie kwĩana.
7
Kwoou ũla ũvandaa na ũla ũnyithasya ti kĩndũ; no Ngai e weka wĩ vata, nũndũ nĩwe winengae kwĩana.
8
Mũvandi wa mbeũ na ũla ũmĩnyithasya onthe no ũndũ ũmwe, na kĩla ũmwe akaĩvwa kwĩanana na wĩa ũla ũtethetye.
9
Ithyĩ tũtetheanĩasya wĩa na Ngai, nenyu mwĩ mũũnda wa Ngai. Mwĩ mwako wa Ngai.
10
Kwa mumo ũla Ngai ũnengete, nyie ta vundi mũseo wa myako, nĩnaakie mũsingi, na mũndũ ũngĩ eaka ĩũlũ wa mũsingi ũsu. Ĩndĩ kĩla mũndũ nĩwaĩlĩte kwĩsũvĩa ũndũ ũkwaka ĩũlũ wa mũsingi ũsu.
11
Nũndũ vai mũsingi ũngĩ mũndũ ũtonya kwambĩlĩĩlya eka o ũla Ngai wambĩlĩĩlye, naw'o nĩ Yesũ Klĩsto.
12
Ethĩwa ĩndĩ mũndũ akaaka ĩũlũ wa mũsingi ũsu aitũmĩa thaavu, kana silĩva, kana mavia ma thooa mũnene, kana nding'ĩ, kana nyeki, kana matũ,
13
wĩa wake nũkoneka ũndũ ũilyĩ, nĩkwĩthĩwa Mũthenya wa Klĩsto ũkawumĩlya ũtheinĩ. Ũkavuanw'a na mwaki, na mwaki ũsu ũkasisya wĩa wa mũndũ ũsu ũndũ ũilyĩ.
14
Ethĩwa kĩla wakĩte kĩkavĩtw'a nĩ mwaki ũsu, akakwata ĩtuvi.
15
Ĩndĩ ethĩwa kĩkavya, akaasya ĩtuvi, o na kau we mwene akatangĩĩwa, ĩndĩ ta mũndũ wauma mwakinĩ.
16
Nomwĩsĩ kana inyw'ĩ mwĩ ĩkalũ ya Ngai, na kana Veva wa Ngai atwĩe nthĩnĩ wenyu.
17
Ethĩwa mũndũ akaananga ĩkalũ ya Ngai, Ngai nake akamwananga. Nĩkwĩthĩwa ĩkalũ ya Ngai nĩ ĩtheu, nayo ĩkalũ yĩu nĩ inyw'ĩ.
18
Mũikatate kwĩkenga. Ethĩwa ve ũmwe katĩ wenyu wonaa ta mũĩ maũndũnĩ ma ĩvinda yĩĩ, nĩetw'ĩkĩthye ndia nĩ kana oĩve.
19
Nũndũ kĩla andũ ma nthĩ ĩno monaa ta ũĩ, kwa Ngai nĩ ũtumanu. O tondũ Maandĩko Matheu maĩtye, “Ngai avinganĩasya andũ ala oĩ nthĩnĩ wa ũĩ woo,”
20
na ĩngĩ makasya, “Mwĩai nĩwĩsĩ kana mosũanĩo ma ala oĩ no vathei.”
21
Kwoou vai mũndũ waĩlĩte kwĩkathĩĩa ĩũlũ wa andũ; syĩndũ syonthe nĩ syenyu:
22
Vaũlo, Avolo, Vetelo, nthĩ ĩno, thayũ, kĩkw'ũ, ĩvinda yĩĩ tũĩ, o na yĩla yĩkoka; syonthe isu nĩ syenyu,
23
nenyu mwĩ ma Klĩsto, nake Klĩsto nĩ wa Ngai.
← Chapter 2
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 4 →
All chapters:
1
2
3
4
5
6
7
8
9
10
11
12
13
14
15
16