1 Thessalonians 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala tũĩ nyie Vaũlo, Sila na Timotheo. Valũa ũũ nĩ kwenyu ĩkanisa ya andũ ma Thesalonika, ala ma Ngai Asa na Mwĩai Yesũ Klĩsto. Mumo na mũuo nĩsyĩthĩwe nenyu.

2Kĩla ĩvinda nĩtũmũtũngĩaa Ngai mũvea kwondũ wenyu inyw'onthe, na nĩtũmũlilikanaa mavinda onthe mboyanĩ sitũ.

3Nĩtũtavasya Ngai Asa waitũ ũndũ mwonanĩtye mũĩkĩĩo wenyu kwa meko, ũndũ kumana na wendo mũtethetye wĩa na kĩthito, na ũndũ mwĩ na wĩkwatyo ũlũmĩte nthĩnĩ wa Mwĩai waitũ Yesũ Klĩsto.

4Mbaitũ endwa ma Ngai, nĩtwĩsĩ kana Ngai nũmũnyuvĩte mwĩthĩwe make.

5Nũndũ Ũvoo Mũseo ũla twamũtavisye ndwaĩ o kwa ndeto syoka, ĩndĩ kwa ũtonyi na kwa Veva Mũtheu, na nĩtweesĩ nesa kana nĩ wa w'o. Nĩmwĩsĩ ũndũ twekalaa yĩla twaĩ katĩ wenyu na ũu waĩ kwondũ wenyu.

6Nenyu nĩmwaatĩĩie ngelekany'o yaitũ na ya Mwĩai, nĩkwĩthĩwa o na kau nĩmwathĩniw'e mũno, mwoosie ũvoo ũsu na ũtanu ũla ũnenganawe nĩ Veva Mũtheu.

7Kwoou mwatw'ĩkie ngelekany'o nzeo kwa aĩkĩĩi onthe ma Masendonia na ma Akaia.

8Nĩkwĩthĩwa kumana nenyu ũvoo ĩũlũ wa Mwĩai nĩwĩw'ĩkĩte Masendonia na Akaia, na tyo kũu kw'oka, ĩndĩ kĩla vandũ mũĩkĩĩo wenyu nthĩnĩ wa Ngai nũmanyĩkĩte ũkethĩa tũi na vata wa kũneena ũndũ ĩũlũ wa w'o.

9Andũ onthe nĩmekũweta mo ene ũndũ mwatũthokisye yĩla twamũthokeie, na ũndũ mwaekie kũthaitha ngai sya mĩvw'anano, mwambĩĩa kũthaitha Ngai ũla wĩ thayũ na wa w'o.

10O ta ũu nĩmekũweta ũndũ mweteelete Mwana wa Ngai asyoke kuma ĩtunĩ, ũla wamũthayũũkisye kuma kwa akw'ũ, nake nĩ Yesũ ũla ũtũtangĩĩaa kuma ũthatunĩ ũla wũkĩte wa Ngai.

Jump to: Chapter 2 →