1 Thessalonians 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Yĩla tweewie tũtomĩĩsya kũthonoka vau, nĩtwavangie kwĩkala Athene twĩ ithyoka,

2na twatũma mwana-a-asa waitũ Timotheo kwenyu, nake athũkũmaa naitũ wĩa ũũ wa Ngai wa kũtavany'a Ũvoo Mũseo wa Klĩsto. Twamũtũmie amũlũlũmĩĩlye mũĩkĩĩonĩ wenyu na kũmũthangaasya,

3nĩ kana vaikethĩwe ũmwe wenyu ũsyoka na ĩtina nũndũ wa mathĩna ala mekw'o. Inyw'ĩ ene nĩmwĩsĩ kana no nginya tũkathĩna.

4Yĩla twaĩ nenyu nĩtwamũtavisye kana tũkathĩnw'a, na o tondũ mwĩsĩ, ũu now'o kweethĩiwe.

5Kwa kĩtumi kĩu, yĩla nĩneewie ndekalanga kũthonoka vau, nĩnĩnamũtũmie Timotheo oke kũmanya ũndũ mũĩkĩĩo wenyu ũendee. Nĩnakĩaa Satani ũndũ wĩthĩwa ookie akamũtata, wĩa witũ ũkethĩwa waĩ wa mana.

6Timotheo nũsyokie kuma kwenyu, na nũtũtavisye ũvoo wa kũtanĩthya ĩũlũ wa mũĩkĩĩo wenyu na wendo wenyu. O ta ũu nũtũtavisye kana nĩmũtũlilikanaa kĩla ĩvinda na mwĩ na mea ma kũtwona, o ũndũ naitũ twĩ na wendi mũnene wa kũmwona.

7Kwoou mbaitũ nũndũ wenyu, nĩtũkiakiĩtw'e thĩnanĩ na ũnyamaonĩ witũ w'onthe nũndũ wa mũĩkĩĩo wenyu,

8nĩkwĩthĩwa yu twĩĩkala thayũ ethĩwa nĩmũkũendeea kũũngama na ũlũmu nthĩnĩ wa Mwĩai.

9O na tũyĩsĩ ũndũ tũtonya kũmũtũngĩa Ngai mũvea kwondũ wenyu, nũndũ wa ũtanu mwingĩ ũla twĩ naw'o methonĩ make kwondũ wenyu.

10Tũvoyaa na kĩthing'ĩĩsyo ũtukũ na mũthenya, tũtonye kũkwata mwanya wa kwonana nenyu ĩngĩ metho kwa metho, tũmũlũlũmĩĩlye mũĩkĩĩonĩ wenyu.

11Twĩvoya Ngai Asa waitũ, na Mwĩai waitũ Yesũ, atũseũvĩsye nzĩa ya kũka kwenyu.

12Mwĩai nĩamwongeleele inyw'ĩ kwendanaa, na kũmenda andũ ala angĩ onthe mbee na mbee o ũndũ ithyĩ tũmwendete.

13Nalũlũmĩĩlye ngoo syenyu syĩkalae itaweteka ũthũku, na syĩ ntheu methonĩ ma Ngai Asa waitũ, ĩvindanĩ yĩla Mwĩai waitũ Yesũ ũkoka na atheu make onthe.

← Chapter 2 Jump to: Chapter 4 →