1 Thessalonians 5

Kamba (MBIVILIA ŨVOO MŨSEO)

← Chapter 4 Jump to:

1Mbaitũ vai vata wa kũmũandĩkĩa ĩũlũ wa syathĩ na mavinda yĩla maũndũ asu makethĩwa.

2Nũndũ inyw'ĩ ene nĩmwĩsĩ nesa kana mũthenya wa kũka ĩngĩ kwa Mwĩai, ũkavika o tondũ kĩng'ei kyũkaa ũtukũ.

3Yĩla andũ mekwasya, “Kĩla kĩndũ nĩ kĩuĩtye na kũi mũisyo,” saanĩ ũsu nĩw'o kĩndũ kya kũmananga kĩmathũlũmũkĩlaa, o tondũ woo wa kwaũnya wũkĩaa kĩveti kĩisyaa, na andũ asu maitonya kũsemba makakĩa.

4Ĩndĩ inyw'ĩ mbaitũ mũi kĩvindunĩ ũndũ mũthenya ũsu ũmũthũlũmũkĩla ta kĩng'ei.

5Inyw'onthe mwĩ syana sya kyeni, syana sya mũthenya; ithyĩ tũi ma ũtukũ kana ma kĩvindu.

6Kwoou tũikakome ta andũ ala angĩ; twĩkale tũsyaĩĩsye na twĩting'ĩte.

7Nĩkwĩthĩwa ala makomaa makomaa ũtukũ, na ala manyusaa makamilwa mamilawa ũtukũ.

8Ĩndĩ nũndũ ithyĩ twĩ ma mũthenya, nĩtwĩkalei twĩting'ĩte. Nĩtwĩvw'ĩkei mũĩkĩĩo na wendo ta syo ngao ya kũseseea kĩthũi, naw'o wĩkwatyo witũ wa ũtangĩĩo ta w'o ngovia ya kwĩsiĩĩa mũtwe.

9Nĩkwĩthĩwa Ngai ndaatũnyuva nĩ kana tũminwe nĩ ũthatu wake, ĩndĩ atũnyuvie nĩ kana tũkwate ũtangĩĩo kwĩsĩla kwa Mwĩai waitũ Yesũ Klĩsto,

10ũla wakwie kwondũ witũ nĩ kana twĩkale vamwe nake, twĩ thayũ kana twĩ akw'ũ yĩla wĩũka ĩngĩ.

11Kwoou thangaany'ai na kũtethany'a ũmwe kwa ũla ũngĩ, o ũndũ yu mũendee na kwĩka.

12Nĩtũũmwĩsũva mbaitũ, mũnenge ndaĩa andũ ala maendee kũthũkũma na kĩthito katĩ wenyu, ala mamũtongoesye na mamũmanyĩasya mwĩkalo wa Ũklĩsto.

13Manengei ndaĩa nene na kũmenda, nũndũ wa wĩa ũla matethasya. Inyw'ĩ nenyu ĩkalanasyai na mũuo.

14Mbaitũ nĩtũũmũkũlya mũkany'e andũ ala atulu, mũthangaasye ala me ngoo mbũthũ, mũtetheesye ala onzu, na mũyũmĩanĩsya na kĩla mũndũ.

15Sisyai vaikatate mũndũ ũĩvanĩsya naĩ kwa naĩ, ĩndĩ kĩla ĩvinda endeew'ai nĩ kwĩkanaa nesa, na kũmeka nesa andũ ala angĩ onthe.

16Ĩthĩawai mwĩ atanu kĩla ĩvinda,

17voyaai mavinda onthe,

18na mũitũngaa mũvea nthĩnĩ wa kĩla ũndũ. Ũu nĩw'o Ngai ũkwenda mwĩthĩwe mũilyĩ nthĩnĩ wa Klĩsto Yesũ.

19Mũikavindĩthye Veva Mũtheu;

20mũikavũthye maũndũ ala mathanĩtwe kuma kwa Ngai.

21Oasyai maũndũ onthe; ĩkaai ala maseo,

22na mũyĩvetana na kĩla ũndũ mũthũku.

23Ngai mwene ũla ũnenganae mũuo nĩamũthesye vyũ nthĩnĩ wa kĩla ũndũ, na aisũvĩa ngoo syenyu, na thayũ na mĩĩ yenyu syĩthĩwe itaweteka ũthũku ĩvindanĩ ya kũka ĩngĩ kwa Mwĩai waitũ Yesũ Klĩsto.

24We ũla ũmwĩtaa inyw'ĩ nĩ wa kũĩkĩĩwa na nũkwĩka ũu.

25Mbaitũ, tũvoyeei o naitũ.

26Kethyai aĩkĩĩi onthe na ngethi ya wendo.

27Nĩngũmũkũlya ĩsyĩtwanĩ ya Mwĩai, mũsomee aĩkĩĩi onthe valũa ũũ.

28Mumo wa Mwĩai waitũ Yesũ Klĩsto nĩwĩthĩwe nenyu.

← Chapter 4 Jump to: