2 Peter 1

Kamba (MBIVILIA ŨVOO MŨSEO)

Jump to: Chapter 2 →

1Kuma kwakwa nyie Simioni Vetelo, mũthũkũmi na mũtũmwa wa Yesũ Klĩsto; kwenyu inyw'ĩ ala kwĩsĩla ũlũngalunĩ wa Ngai waitũ na Mũtangĩĩi Yesũ Klĩsto, twĩ ngwatanĩo ya mũĩkĩĩo wa vata mũno.

2Mumo na mũuo nĩsyĩthĩwe nenyu kwa wingĩ kwondũ wa kũmũmanya Ngai, na kũmũmanya Yesũ Mwĩai waitũ.

3Ngai nũtũnengete kwĩsĩla ũtonyinĩ wake wa kĩ-ũngai syĩndũ syonthe ila syĩ vata thayũnĩ, na ila itumaa twĩthĩwa na kĩkĩo kyake, kwa nzĩa ya kũmũmanya ũsu ũtwĩtĩte kwa ũkumyo na ũseo wake.

4Kwa nzĩa ĩsu Ngai nũtũnengete mĩthĩnzĩo mĩnene mũno na yĩ vata ĩla watwathie, nĩ kana mũtonye kũvonoka kuma wanangĩkonĩ wa wendi mũthũku wa nthĩ ĩno, na kwĩthĩwa na mwĩkalo wa kĩ-ũngai.

5Kwa kĩtumi kĩu tatai ũndũ vatonyeka mwongele mũĩkĩĩo wenyu ũseo, na ũseonĩ wenyu ũmanyi,

6na ũmanyinĩ wenyu wĩting'o, na wĩting'onĩ wenyu wũmĩĩsyo, na wũmĩĩsyonĩ wenyu kĩkĩo kya Ngai.

7O ta ũu nthĩnĩ wa kũmũkĩa Ngai kwenyu ongelai ũnyanya wa Aklĩsto, na nthĩnĩ wa ũnyanya wa Aklĩsto mũyongela wendo.

8Nũndũ mweethĩwa na maũndũ asu kwa wingĩ, makatuma mũeka kwĩthĩwa mwĩ atulu na mũte na ũsyao nthĩnĩ wa kũmũmanya Mwĩai waitũ Yesũ Klĩsto.

9Ũla ũte na maũndũ asu nĩ kĩlalinda kana mũndũ ũtonaa vaasa. Nĩwũlĩtwe kana nũtheetw'e naĩ syake sya tene.

10Kwoou ĩndĩ mbaitũ, thangaai mũno nĩ kana mũlũlũmĩĩlye wĩto na kũnyuvwa kwenyu nĩ Ngai, nĩkwĩthĩwa mweeka maũndũ asu mũikavalũka.

11Kwa nzĩa ĩsu mũkeetĩkĩlw'a kũlika vate kĩsiĩĩi o na kĩmwe, ũsumbĩnĩ wa tene na tene wa Mwĩai na Mũtangĩĩi waitũ Yesũ Klĩsto.

12Kwoou ngekalaa ngĩmũlilikany'a maũndũ aa kĩla ĩvinda, o na kau nĩmũmesĩ na makalũlũmĩĩlwa ũw'onĩ ũla mwakwatie.

13Nĩsũanĩa nĩ waĩlu kwakwa kũvindũaa ilĩko syenyu, ngĩmũlilikany'a maũndũ aa ĩvindanĩ yonthe yĩla nĩ thayũ.

14Nĩkwĩthĩwa nĩnĩsĩ nĩngilĩlye kũkw'a, o tondũ Mwĩai waitũ Yesũ Klĩsto wandavisye.

15Nĩngwĩka ũndũ ndonya nĩ kana ĩtina wa namina kũkw'a, mwĩthĩawe mũtonya kũlilikana maũndũ aa kĩla ĩvinda.

16Ithyĩ tũyaatũmĩa ngewa sya kwĩseũvĩsya yĩla twamũtavisye ĩũlũ wa ũtonyi wa Mwĩai waitũ Yesũ Klĩsto na kũka ĩngĩ kwake, ĩndĩ ithyĩ nĩtwoonie ũkumyo wake na metho maitũ.

17Ithyĩ twaĩ vo yĩla Yesũ wanengiwe ngatho na ũkumyo nĩ Ngai Ĩthe wake, yĩla wasya wookie vala ũĩ kuma vala ve ũla wĩ na ũkumyo mũnene ũkyasya, “Ũũ nĩwe mwana wakwa mwendwa, na nĩnendeeaw'a mũno nĩwe.”

18Ithyĩ ene nĩtweewie wasya ũsu wooka kuma ĩtunĩ, yĩla twaĩ nake kĩla kĩĩmanĩ kĩtheu.

19Kwoou nĩtũkũĩkĩĩa vate nzika ũvoo ũla watavaniw'e nĩ athani. O nenyu mũkeeka nesa kwĩthukĩĩsya ũvoo ũsu, nũndũ ũilyĩ ta taa wakanĩte vandũ kĩvindunĩ nginya kwakya, na kyeni kya ndata ya kwakya kĩikena ngoonĩ syenyu.

20Ĩũlũ wa maũndũ onthe, manyai kana vai wathani wa Maandĩko Matheu wumanĩte na kũalyũla kwa mũndũ mwene.

21Nũndũ vai wathani waaũka kumana na kwenda kwa mũndũ, ĩndĩ andũ maneenie kĩla kyumĩte kwa Ngai matongoew'e nĩ Veva Mũtheu.

Jump to: Chapter 2 →