2 Peter 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Kwaĩ athani ma ũvũngũ katĩ wa andũ ĩvinda ya tene, o tondũ kũkethĩwa amanyĩsya ma ũvũngũ katĩ wenyu. Amanyĩsya asu makeethĩwa na momanyĩsyo ma kwasya andũ na mate maw'o; makaleana na Mwĩai ũla wamovoisye, na kwĩyĩetee ũsilĩlo mũnene wa mĩtũkĩ.

2O na kũilyĩ ũũ, andũ aingĩ makaatĩĩa mwĩkalo woo mũthũku, na meko moo makatuma andũ maneenea nzĩa ya ũla w'o naĩ.

3Ĩtomo ya amanyĩsya asu yĩkatuma makwata syĩndũ kuma kũla mũĩ kwa kũmũtavya ngewa syoo sya kwĩseũvĩsya. Kuma tene Ngai nĩwavangie kũmaetee ũsilĩlo wa wanangĩko, nĩkwĩthĩwa we ndesa kũlea kwĩanĩsya mũvango wake.

4Ngai ndaaekea alaĩka ala mavĩtisye. Ĩndĩ nĩwamekisye ĩianĩ ya mwaki vala mekalaa me ovany'e kĩvindunĩ, meteelete Mũthenya wa Ũsilĩlo.

5Ngai ndaalea kũmasilĩla andũ ma ĩvinda ya tene, ĩndĩ nĩwaetie mbua ya kĩw'ũ kingĩ ĩũlũ wa nthĩ kwa ala mataĩ na kĩkĩo kya Ngai; andũ ala watangĩĩie nĩ Noa, ũla watavanasya ũla ũlũngalu, na andũ angĩ mũonza.

6Ngai nĩwasilĩle ndũa ya Sondomu na ya Ngomola kwa kwivĩvya vyũ na mwaki. Ũsu watw'ĩkie ta ũkany'o kwa mũndũ o na wĩva ũla ũte na kĩkĩo kya Ngai.

7Ngai nĩwamũtangĩĩie Loto mũndũ waĩ mũlũngalu, ũla wathĩnĩkaa mũno nũndũ wa mwĩkalo mũthũku wa ũlaalai wa andũ mataatĩĩaa mĩao.

8Mũndũ ũsu mũlũngalu ekalaa katĩ woo, na kĩla mũthenya nĩwathĩnĩkaa mũno na kwĩw'ĩthw'a woo nĩ maũndũ moo mathũku ala weew'aa na woonaa.

9Kwoou Mwĩai nĩwĩsĩ ũndũ ũtonya kũvonokya kuma matatwanĩ andũ ala me na kĩkĩo kyake, na ũndũ ũtonya kũendeea kũmasilĩla ala mate alũngalu ameteeletye ũsilĩlo wa mũthya.

10Ũu wĩthĩawa mũno mũno kwa ala matongoeaw'a nĩ mawendi mathũku ma mwĩĩ, na ala mavũthasya vinya wa Ngai. Amanyĩsya asu me ũkũmbaũ wa kwĩkathĩĩa, na mwĩkalo woo wonanasya kĩvũthya kwa syũmbe ila ikumaw'a na syĩkalaa ĩtunĩ.

11O na kau alaĩka me vinya na ũtonyi mwingĩ kwĩ amanyĩsya asu ma ũvũngũ, maineenaa ndeto sya kũvinganĩsya syũmbe isu mbee wa Ngai.

12Ĩndĩ andũ asu mekaa maũndũ asu mateũtũmĩa kĩlĩko ta nyamũ sya kĩthekanĩ, ila isyaawa ikwataw'e na kũawa; maneenaa ndeto sya kũumanga syĩndũ syonthe ila matekũmanya. Makaanangwa o ta nyamũ isu sya kĩthekanĩ,

13na makaĩvwa ũthũku kwondũ wa ũthũku ũla meekie. Ũtanu woo nĩ kwĩka maũndũ menekee nĩ andũ, nĩ kana meanĩsye mawendi mathũku ma mwĩĩ; nĩmamwĩkĩĩthasya nthoni na kũtuma mũvũthw'a, yĩla mekũtanĩa mothũku moo o maendee kũĩsanĩa nenyu mbokanĩ sya ngwatanĩo.

14Mausũĩtwe nĩ wendi mũthũku mũno wa kwĩka molaalai; wendi woo wa kwĩka naĩ ndũthelaa. Nĩmakusasya aĩkĩĩi ala onzu makamalikya naĩnĩ. Nĩmemanyĩĩtye ene kwĩthĩwa na ĩtomo. Asu nĩ andũ aumanĩe nĩ Ngai!

15Nĩmatiĩte mwĩkalo ũla wa w'o makaa, na kũatĩĩa mwĩkalo wa ũla mũndũ weetawa Mbalaamu mwana wa Mbeoli, ũla wendie kũkwata mbesa kumana na kwĩka maũndũ mathũku.

16Ĩndĩ nĩwakaniw'e kwondũ wa mwĩkalo ũsu wake mũthũku. Ĩng'oi yake nĩyaneenie ta mũndũ, na yamũsiĩĩa mwathani ũsu kwĩka ũndũ wa ũtumanu.

17Andũ asu mailyĩ ta ithima ng'alu, na ta mũumbĩ ũvĩtĩte ũkuĩtwe nĩ kĩseve; Ngai nũmeteeletye ũsilĩlo wa kĩvindu kingĩ.

18Maneenaa ndeto sya kwĩkathĩĩa na sya ũtumanu, na kũtũmĩa mawendi mathũku ma mwĩĩ kũmakusya mamatũnge naĩnĩ ala manaumie mwĩkalonĩ ũsu wa naĩ mĩtũkĩ.

19Mathaa andũ ũthasyo o yĩla mo ene nĩ ngombo sya mothũku onthe, nũndũ mũndũ atw'ĩkĩthaw'a ngombo nĩ kĩndũ kyonthe kĩla kyamũsumbĩka.

20Nũndũ ethĩwa mũndũ nĩwavonoka kuma maũndũnĩ mathũku ma nthĩ ĩno, kwa nzĩa ya kũmũmanya Mwĩai na Mũtangĩĩi waitũ Yesũ Klĩsto, na aisyokea maũndũ asu ĩngĩ mamũkwate na kũmũsumbĩka, mũndũ wa mũthemba ũsu ethĩawa na mwĩkalo mũthũku kwĩ ũla waĩ naw'o mbeenĩ.

21Kwĩthĩwa kwĩ kavaa kwoo kethĩwa mayaamanya nzĩa ya ũlũngalu, vandũ va kũmĩmanya na kũeka kwĩanĩsya mĩao mĩtheu ĩla manengiwe.

22Ũu wĩkĩkĩte kwoo nĩwosanĩte na ndeto sya nthimo ĩno: “Ngitĩ nĩsyokaa ĩkaya ĩngĩ matavĩka mayo,” na, “Ngũlũe ĩthambaw'a na ĩisyoka ĩngĩ kwĩyiliitya ndakanĩ.”

← Chapter 1 Jump to: Chapter 3 →