2 Peter 3

Kamba (MBIVILIA ŨVOO MŨSEO)

← Chapter 2 Jump to:

1Endwa makwa, ũũ nĩw'o valũa wakwa wa kelĩ kũmũandĩkĩa. Nĩmũandĩkĩe valũa ii syelĩ nĩ kana nĩvindũe ilĩko syenyu syĩthĩwe na mosũanĩo maseo, kwa kũmũlilikany'a maũndũ aa:

2Nĩenda mũlilikane ndeto ila syaneeniwe tene nĩ athani atheu, na mwĩao ũla wanenganiwe nĩ Mwĩai na Mũtangĩĩi waitũ, kwĩsĩla kwa atũmwa menyu.

3Mbee wa maũndũ onthe, nĩmwaĩlĩte kũmanya kana ĩvindanĩ ya mũminũkĩlyo kũkaumĩla andũ me kĩvũthya, ala makethĩwa makĩtongoew'a nĩ mawendi mathũku ma mwĩĩ. Makeethĩwa maivũthĩĩsya

4na kwasya, “Nĩwathanie asya akooka ĩngĩ. We ndaisye ũu? Aĩva yu? Aaũmae maitũ nĩmakwie, ĩndĩ maũndũ maendeea o tondũ kwailyĩ kuma mwambĩlĩĩlyonĩ wa nthĩ!”

5Kwondũ wa kwenda kwoo ene, nĩmolawa kana kuma tene kwa nzĩa ya ndeto ya Ngai, ĩtu na nthĩ nĩsyoombiwe; nthĩ yoombwa kuma kĩw'ũnĩ na kwĩsĩla kĩw'ũnĩ.

6Na o ta ũu kwa nzĩa ya kĩw'ũ kya mbua ĩla yaĩ ya kĩw'ũ kingĩ, nthĩ ĩla ya tene nĩyaanangiwe.

7Ĩndĩ kwĩsĩla ndetonĩ o ĩsu ya Ngai, ĩtu na nthĩ ila syĩ vo yu syeteeletw'e kwanangwa na mwaki Mũthenyanĩ wa Ũsilĩlo, ũla now'o ala matamũkĩaa Ngai meanangwa.

8Endwa makwa mũikolwe nĩ kĩndũ kĩmwe, kana kwa Mwĩai mũthenya ũmwe nĩ ta myaka ngili ĩmwe, na myaka ngili ĩmwe nĩ ta mũthenya ũmwe.

9Mwĩai ndaseleawa nĩ kwĩanĩsya kĩla wathanĩte kwĩka ũndũ andũ amwe mesilasya. Ĩndĩ omĩĩasya eteelete mũalyũle ngoo, nĩkwĩthĩwa ndendaa mũndũ o na wĩva ae; kwenda kwake nĩ andũ onthe melile kwondũ wa naĩ syoo.

10Ĩndĩ Mũthenya wa kũka ĩngĩ kwa Mwĩai ũkavika andũ matesĩ, o tondũ kĩng'ei kĩthokeaa andũ matesĩ. Mũthenyanĩ ũsu ĩtu yĩkeevetanga yae na kĩlitũko kĩnene, na syĩndũ ila syĩ yayayanĩ ikavĩvw'a na mwaki, na o ta ũu nthĩ na syĩndũ syonthe ila syĩ vo ikavĩvw'a vyũ.

11Ethĩwa kĩla kĩndũ kĩkaanangwa kwa nzĩa ĩsu, mwaĩlĩte kwĩthĩwa mwĩ andũ mailyĩ ata? Mwaĩlĩte kwĩthĩwa na thayũ mũtheu na wĩ na kĩkĩo kya Ngai,

12mũkyeteela na kwenda mũno mũthenya ũsu Ngai wĩsilĩla andũ ũvike na mĩtũkĩ. Mũthenyanĩ ũsu ĩtu yĩkavĩvw'a nĩ mwaki yanangwe, vamwe na syĩndũ syonthe ila syĩ yayayanĩ.

13Ĩndĩ ithyĩ tweteelaa kĩla Ngai watwathie, nayo nĩ ĩtu yeũ na nthĩ nzaũ vala vakekala ala alũngalu.

14Kwoou endwa makwa, nũndũ nĩmweteelete Mũthenya ũsu, ĩkalaai mũyenda mũno Mwĩai amwĩthĩe mwĩ atheu na mũte na ĩvĩtyo o na yĩmwe, na mathayũ menyu mayĩthĩwa me na mũuo mbee wa Ngai.

15Manyai kana kũmĩĩsya kwa Mwĩai waitũ nĩ mwanya ũmũnengete, nĩ kana mũtonye kũtangĩĩwa, o tondũ mwana-a-asa waitũ mwendwa Vaũlo wamũandĩkĩie aitũmĩa ũĩ ũla wanengetwe nĩ Ngai.

16Kĩu nĩkyo ũandĩkĩte akaelesya valũanĩ syake syonthe. Ve maũndũ amwe valũanĩ isu syake me vinya kũeleeka. Andũ mate na ũmanyi na mate alũmu mũĩkĩĩonĩ nĩmaeleasya maũndũ asu kwa nzĩa ĩtaĩlĩte, o tondũ mekanaa na mĩsoa ĩngĩ Maandĩkonĩ Matheu, na kwoou mayĩyĩetee ũsilĩlo mo ene.

17Kwoou ĩndĩ endwa makwa, nũndũ nĩmũminĩte kũmanya maũndũ asu, ĩsũvĩei mũikaw'e nĩ mavĩtyo ma andũ athũku na kũvalũka kuma ũlũmunĩ wenyu.

18Ĩndĩ endeeai na kwĩana mumonĩ wa Ngai, na kwongeleka kũmũmanya Mwĩai na Mũtangĩĩi waitũ Yesũ Klĩsto. Kwake nĩkwĩthĩwe ũkumyo, yu na kũvika tene na tene! Ameni!

← Chapter 2 Jump to: