Ecclesiastes 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Ve ũndũ mũthũku nonete ĩũlũ wa nthĩ ũla ũkwataa kĩla mũndũ.

2Mũndũ kũnengwa nĩ Ngai ũthwii, syĩndũ na ndaĩa ũkethĩa vai kĩndũ katĩ wa ila mũndũ wendaa ũte nakyo, ĩndĩ Ngai ailea kũmũtonyethya kũtanĩa syĩndũ isu, na mũndũ ũngĩ ayitanĩa. Ũu w'onthe nĩ mana na nĩ ũndũ wĩ woo mũno.

3Mũndũ nũtonya kwĩthĩwa na syana ĩana, na kwĩkala thayũ myaka mingĩ; ĩndĩ o na ethĩwa akekala thayũ myaka yĩana ata, ĩndĩ ndatonya kũtanĩa syĩndũ ila wĩ nasyo, kana akw'a ailea kwĩthĩwa na andũ ma kũmũthika, nyie ndonya kwasya kana mwana ũsyaĩtwe e mũkw'ũ e kavaa kwĩ mũndũ ũsu.

4Kana kau kai ũtethyo kaetae, na nĩ ka mana na kolaa mĩtũkĩ.

5Mbee wa ũu, kana kau kayaaona kyeni kya syũa na kai kĩndũ kamanyaa. Ĩndĩ ke kavaa kwĩ mũndũ ũsu,

6ĩĩ, o na ethĩwa akekala myaka ngili ilĩ ĩũlũ wa nthĩ, na ayĩthĩwa atatanĩa ũthwii wake. Nĩkũlya, asu elĩ maiendaa o vandũ vamwe?

7Mũndũ athũkũmaa akwate kya ũya ĩndĩ ndesaa kwĩanĩwa.

8Kwoou nĩkũlya, mũndũ mũĩ e kavaa kwĩ mũndũ mũtumanu kwa nzĩa myaũ? Mũndũ ngya akwataa kyaũ kwa kwĩthĩwa esĩ kwĩkalany'a na andũ ala angĩ?

9Nĩ kavaa mũndũ kwĩanĩwa nĩ syĩndũ ila wĩ nasyo, kwĩ ila ũkwenda kwĩthĩwa nasyo. Ũu o naw'o nĩ mana na no ta kũsembany'a na kĩseve.

10Kĩla kĩ vo kyeethĩiwe vo kuma tene, na nĩtwĩsĩ kana mũndũ ndatonya kũkananĩa na ũngĩ wĩ vinya kwĩ we.

11Mũndũ o na atũmĩa ndeto mbingĩ kũkananĩa no mana, nũndũ kũituma ethĩwa e mũseo mbeange.

12Nũũ ũla wĩsĩ kĩla kĩtonya kũuna mũndũ ĩvindanĩ ĩkuvĩ ya mana ya thayũ wake, yĩla yĩvĩtũkaa na mĩtũkĩ ta kyuu? Nũũ ũla ũtonya kũmanya kĩla kĩkekĩka ĩũlũ wa nthĩ twamina kũkw'a?

← Chapter 5 Jump to: Chapter 7 →