Ephesians 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Navu mbeenĩ mwaĩ akw'ũ kĩ-veva, nũndũ wa kwĩthĩwa mwaĩ mbaa matũ na eki ma naĩ.

2Ĩvindanĩ yĩu mwaĩ na mĩendele mĩthũku ya nthĩ ĩno, na mwaatĩĩaa mũnene wa mavinya ma maimũ ala me yayayanĩ, nayo nĩ ĩimũ yĩla yĩsumbĩkĩte ala matamwĩw'aa Ngai.

3Kwa w'o ithyonthe twailyĩ oou, na twekalaa tũyĩka maũndũ kumana na mawendi ma mĩĩ yaitũ; tweekaa ũndũ o w'onthe ũla ũkwendeesya mwĩĩ na ilĩko sitũ. Nthĩnĩ wa mwĩkalĩle witũ wa kĩ-mũndũ, ithyĩ o ta andũ ala angĩ, mũminũkĩlyo witũ waĩ wĩthĩwe kũsilĩlwa nĩ Ngai nthĩnĩ wa ũthatu wake.

4Ĩndĩ tei wa Ngai nĩ mwingĩ na wendo wake nĩ mũnene mũno kwitũ,

5ũkethĩa o na yĩla twaĩ akw'ũ kĩ-veva nũndũ wa kwĩthĩwa twaĩ mbaa matũ, nĩwatũnengie thayũ vamwe na Klĩsto. Mũtangĩĩtwe kwĩsĩla mumonĩ wake.

6Nthĩnĩ wa Klĩsto Yesũ, Ngai nĩwatũthayũũkisye vamwe nake tũsumbĩkae nake ĩtunĩ.

7Ngai nĩweekie ũu nĩ kana onanasye ĩvindanĩ yonthe yĩla yũkĩte, mumo wake mwingĩ ũla ũtumaa atwĩw'ĩa tei twamũĩkĩĩa Klĩsto Yesũ.

8Nũndũ kwĩsĩla mumonĩ wa Ngai nĩmũtangĩĩtwe kwondũ wa kũĩkĩĩa. Ti kwĩsĩla maũndũnĩ ala mwĩkĩte, ĩndĩ nĩ mũthĩnzĩo kuma kwa Ngai, nĩ kana mũndũ o na wĩva ndakekathĩĩe ũndũnĩ ũsu.

10Nĩkwĩthĩwa Ngai nĩwe ũtumĩte twĩthĩwa tũilyĩ ũndũ tũilyĩ, na nthĩnĩ wa Klĩsto Yesũ nĩwatũmbie twĩthĩwe na mwĩkalo wĩ na meko maseo, ala watũvangĩie twĩkae.

11Inyw'ĩ ala kwa wumo mwĩ Andũ-ma-mbaĩ-ingĩ, lilikanai kana mweetawa, “Ala-mate-aĩke” nĩ Ayuti, ala meyĩtaa, “Ala-aĩke” (kũũ nĩ kũweta ũndũ andũ mekanaa na mĩĩ yoo).

12Ĩvindanĩ yĩu mwaĩ vaasa na Klĩsto. Mũyaĩ andũ ma Ĩsilaeli; mwaĩ aeni na mũyaĩ ma mbaĩ ĩsu nyuve ya Ngai. Mũyaĩ atale syĩndũnĩ ila Ngai wathĩte andũ make. O na mwekalaa kũũ nthĩ mũte na wĩkwatyo, na mũte na mũĩkĩĩo nthĩnĩ wa Ngai.

13Ĩndĩ yu nũndũ mwĩ na mũĩkĩĩo nthĩnĩ wa Klĩsto Yesũ, o na kau mũyamũĩkĩĩaa Ngai navu mbeenĩ, nĩmũkwatĩte mũĩkĩĩo ũsu kwĩsĩla kĩkw'ũnĩ kya Klĩsto.

14Klĩsto nũtũnengete ithyĩ Ayuti na Andũ-ma-mbaĩ-ingĩ mũuo wa kwĩkalany'a vamwe, na akaveta kĩla kĩnatumaa tũmenana.

15Kũthĩnw'a kwake nĩkwavetangie maũndũ onthe ma Mĩao ya Mwose na motw'ĩo mayo, nĩ kana vandũ va twĩthĩwe twĩ Ayuti kana andũ ala angĩ mate Ayuti, atũtw'ĩkĩthye ithyonthe mbaĩ ĩmwe nzaũ na kũtũnenga mũuo.

16Na vau twĩ kĩndũ kĩmwe, Klĩsto atwĩw'anĩthya na Ngai kwĩsĩla kĩkw'ũnĩ kyake ngelany'onĩ, na kũtuma imena isu ithela vyũ.

17Kwoou Klĩsto nĩwookie atavany'a Ũvoo Mũseo ũla ũetae mũuo kwa Andũ-ma-mbaĩ-ingĩ ala maĩ vaasa na Ngai, na o ta ũu atavany'a kwa Ayuti ala maĩ vakuvĩ na Ngai.

18Ithyonthe kwĩsĩla vala ve Klĩsto, nthĩnĩ wa Veva ũmwe, twĩ na mwanya wa kũthi vala ve Ĩthe waitũ.

19Kwoou inyw'ĩ Andũ-ma-mbaĩ-ingĩ mũi aeni kana andũ mavĩtĩte, ĩndĩ mwĩ andũ ma ũsumbĩ ũmwe vamwe na andũ ala angĩ ma Ngai, na o ta ũu mwĩ ma mũsyĩ wa Ngai.

20Mũtw'ĩkĩte ta mwako wakĩtwe ĩũlũ wa mũsingi wa atũmwa na athani, Klĩsto Yesũ ailyĩ ta we ĩvia yĩla ya vata mũno mwakonĩ.

21Klĩsto nĩ we ũkwatanasya mwako ũsu w'onthe, na kũtuma wĩthĩwa ũilyĩ ta ĩkalũ ĩtheu ya Mwĩai.

22O ta ũu nthĩnĩ wa Klĩsto, inyw'onthe nĩmwakĩtwe vamwe mũkatw'ĩka wĩkalo ũla Ngai wĩkalaa kwa nzĩa ya Veva Mũtheu.

← Chapter 1 Jump to: Chapter 3 →