Genesis 27

Kamba (MBIVILIA ŨVOO MŨSEO)

← Chapter 26 Jump to: Chapter 28 →

1Yĩla Isaka waĩ mũkũũ na akaeka kwona nthĩ, nĩwatũmanie Esaũ mwana wake ũla mũkũũ na amwĩa, “Mwana wakwa!” Esaũ asũngĩa, “Ĩĩ, ninyioo.”

2Isaka amwĩa, “Yu nyie nĩ mũkũũ na nĩndonya kũkw'a mĩtũkĩ.

3Osa mĩio yaku ya nzyĩma: Thyaka wa maangi na ũta, na ũithi kĩthekanĩ ũkasyĩme nyamũ ũndetee,

4na ũyĩua lĩu ũla wĩ mũyo nendete na ũindetee nĩye, nĩ kana nakwa ngũathime ndanamba kũkw'a.”

5Yĩla Isaka waneenaa na Esaũ Laveka nĩweethukĩĩsye. Kwoou yĩla Esaũ waumaalile athi kũsyĩma,

6Laveka nĩweeie Yakovo mwana wake atĩĩ, “Nĩneew'a ĩthe waku aineena na mwana-a-inyia waku Esaũ,

7aimwĩa, ‘Ndetee nyama sya nzyĩma na ũyĩua lĩu wĩ mũyo nĩye, nakwa ngĩkũathimĩa mbee wa Mwĩai Ngai ndanamba kũkw'a.’

8Yu ĩndĩ mwana wakwa mbĩthukĩĩsye nesa na ũyĩka ũndũ ngũũtavya,

9‘Enda vala ve ndĩthya ya mbũi na malondu ũndetee tũtena twĩlĩ twa mbũi tũnou nĩ kana nĩuĩe ĩthe waku lĩu wĩ mũyo ũla wendete.’

10Nĩvo ĩndĩ ũũtwaĩa ĩthe waku lĩu ũsu aye nĩ kana akũathime atanamba kũkw'a.”

11Ĩndĩ Yakovo eea inyia wake, “We nĩwĩsĩ kana Esaũ e maw'ĩa ĩndĩ nyie ndi maw'ĩa.

12Nĩvatonyeka ĩthe wakwa akangwatanga na aimanya nĩngũmũkenga; kwa nzĩa ĩsu ngĩkwata kĩumo vandũ va ũathimo.”

13Inyia wake amwĩa, “Mwana wakwa, kĩumo kĩu kĩngwate ne inyie. Ĩka ũndũ ngwasya; enda ũndetee tũtena tũu.”

14Kwoou Yakovo nĩwaendie aetee inyia wake tũtena tũu. Inyia wake nĩwauie lĩu wĩ mũyo o tondũ Isaka wendete.

15Laveka nĩwaendie nyũmba kwake na oosa ngũa ila nzeo sya Esaũ mwana wake ũla mũkũũ na asyĩkĩa Yakovo mwana ũsu wake mũnini.

16Laveka nĩweekĩie ithuma sya tũtena tũu mokonĩ na ngingonĩ ya Yakovo kũla kũte maw'ĩa,

17na ĩndĩ amũnenga ũla lĩu wĩ mũyo na mũkate ũla wauĩte.

18Yakovo nĩwaendie vala ve ĩthe wake na amwĩta, “Nau!” Nake Isaka eetĩka, “Nĩ vaa,” na amũkũlya, “Nue mwana wakwa wĩva?”

19Yakovo asũngĩa ĩthe, “Ninyie Esaũ mwana waku ũla mũkũũ; nĩneeka ũndũ ũndavisye. Yu ũkĩla ũye nyama sya nzyĩma ila nakũetee nĩ kana ũngathime.”

20Isaka nĩwakũlilye mwana wake atĩĩ, “Wakwata nyamũ ya nzyĩma mĩtũkĩ yĩana ũu ata mwana wakwa?” Yakovo amũsũngĩa, “Mwĩai Ngai, Ngai waku nĩwandethya namĩkwata.”

21Isaka nĩweeie Yakovo atĩĩ, “Thengeea vakuvĩ ngũkwatange nĩmanye kana kwa w'o nue Esaũ mwana wakwa.”

22Yakovo nĩwathengeeie vala ve ĩthe wake. Isaka nĩwamũkwatangie na asya atĩĩ, “Wasya ũsu nĩ wa Yakovo, ĩndĩ a moko nĩ ma Esaũ.”

23Isaka ndaamanya kana ũsu nĩ Yakovo, nũndũ moko make maĩ maw'ĩa ta ala ma Esaũ. Isaka e vakuvĩ kũathima

24Yakovo nĩwamũkũlilye atĩĩ, “Kwa w'o we nue Esaũ mwana wakwa?” Yakovo asũngĩa, “Ĩĩ ninyie.”

25Isaka amwĩa, “Mwana wakwa, nenge imwe sya nyama sya nzyĩma nĩ kana ngũathime.” Kwoou Yakovo nĩwamũnengie nyama isu aya na o ta ũu amũnenge ndivai anyw'a.

26Nĩvo ĩndĩ Isaka ĩthe wake wamwĩie, “Thengeangĩa vaa nĩĩ mwana wakwa ũngethye na ngethi ya wendo.”

27Yakovo nĩwathengeeie na amũkethya na ngethi ya wendo. Yĩla Isaka weewie mũuke wa ngũa ila Yakovo weekĩĩte nĩwamũathimie ayasya atĩĩ, “Mũuke mũseo wa mwana wakwa, nĩ ta mũuke wa mũũnda ũla Mwĩai Ngai ũathimĩte.

28Ngai nakũetee ĩmwe kuma ĩtunĩ, na aituma mĩũnda yaku yĩthĩwa na ũnou mwingĩ! Nĩakũnenge ngetha mbingĩ ya mbaa mbeke na ya ndivai!

29Andũ onthe makũthũkũmae, na andũ ma mbaĩ syonthe makũnengae ndaĩa. Ĩthĩwa wĩ mũnene wa ana-a-sa maku, na ana-a-inyia maku makumanae mbee waku makũnenge ndaĩa. Mũndũ ũla ũkakũumanĩa akaumanĩwa na ũla ũkakũathima akaathimwa.”

30Isaka nĩwaminie kũathima Yakovo, na Yakovo ayuma vala ve ĩthe oou, mwana-a-inyia Esaũ avika kuma nzyĩma.

31Esaũ o nake nĩwauie lĩu wĩ mũyo na atwaĩa ĩthe wake. Nĩweeie ĩthe wake atĩĩ, “Nau ũkĩla ũye nyama sya nzyĩma yakwa nĩ kana ũngathime.”

32Isaka amũkũlya, “We nue ũũ?” Nake Esaũ amũsũngĩa, “Ninyie Esaũ, mwana waku ũla mũkũũ.”

33Isaka nĩwatetemie mũno na akũlya atĩĩ, “Nũũ ĩndĩ ũla ũsyĩmie nyamũ na andetee nyama syayo? Nĩĩ nĩnaya nyama isu ũtanamba kũvika, na nĩnamũathima, na kwa w'o akeethĩawa e mũathime.”

34Yĩla Esaũ weewie ndeto isu sya ĩthe wake nĩwaĩie kĩĩo kĩnene na kĩ woo, na asya, “Ame nau, o nakwa nenge ũathimo waku!”

35Ĩndĩ Isaka amwĩa, “Mwana-a-inyia waku Yakovo nĩwooka na angenga, na nĩwoosa ũathimo waku.”

36Nake Esaũ asya, “Yĩĩ nĩyo ĩvinda yake ya kelĩ kũngenga. Ti ũseng'yo ĩsyĩtwa yake nĩ Yakovo. Nĩwoosie kĩla kĩmbaĩlĩte ta inyie mwana wa mbee, nayu nĩwoosa ũathimo wakwa. Nau, ndũnandialĩlya ũathimo o na ũmwe?”

37Isaka amũsũngĩa, “Yu nĩnamũtw'a mũnene waku, na namatw'ĩkĩthya andũ ma mũsyĩ wake athũkũmi make. Nĩnamũnenga ngetha ya mbaa mbeke na ndivai. Yu mwana wakwa vai ũndũ ndonya ũkwĩka!”

38Esaũ nĩwaendeeie na kũmwĩsũva ĩthe aimwĩa, “Nau, wĩĩna ũathimo o ũmwe? Ame Nau, ngathime o nakwa!” Esaũ nĩwaĩie na wasya mũnene.

39Nĩvo ĩndĩ Isaka wamwĩie, “Ũkatũaa vaasa na mĩũnda ĩla nou, kũla kũtakethĩawa mbua.

40Ũkekalaa thayũ kwa nzĩa ya kaũ, na kwĩthĩawa mũthũkũmi wa mwana-a-inyia waku. Ĩndĩ yĩla wĩleana nake, ũkaeka kwĩthĩwa ũũngamĩwe nĩwe.”

41Esaũ nĩwamenie Yakovo nũndũ wa kũathimwa nĩ ĩthe. Esaũ nĩwasũanĩie asya, “Ĩvinda ya kũkw'a kwa ĩthe wakwa na ya kũĩa kwondũ wake yĩ vakuvĩ; ĩtina wa ũu ngooaa Yakovo.”

42Ĩndĩ yĩla Laveka wamanyie ĩũlũ wa mũvango wa Esaũ nĩwatũmanie Yakovo na amwĩa atĩĩ, “Mwana-a-inyia waku Esaũ eĩkiakisya kwa kũseũvya mũvango wa ũkũaa.

43Yu ĩndĩ mwana wakwa, ĩka ũndũ ngũkwĩa. Uma vaa mĩtũkĩ ũkĩe ũthi kwa mwana-a-ia Lavani ũla ũtwĩe ndũanĩ ya Aalani.

44Enda ũkekalany'e nake kwa kavinda, nginya ũthatu wa mwana-a-inyia waku Esaũ ũusye,

45na ayũlwa nĩ ũndũ ũla ũnamwĩkie. Nĩvo ĩndĩ nĩtũma mũndũ akwĩsĩe akũtũnge kũũ. Ve vata mwaũ nĩmwasye mwĩ elĩ mũthenya ũmwe?”

46Laveka nĩwaneenie na Isaka amwĩa atĩĩ, “Nĩna thĩna mwingĩ ngoonĩ nũndũ wa iveti ii Esaũ ũtwaĩte kuma mbaĩnĩ ya Aititi. Ethĩwa Yakovo nake akatwaa kĩveti kuma akanĩ ma Aititi ta aa, ngeethĩwa na vata mwaũ wa kwĩkala thayũ?”

← Chapter 26 Jump to: Chapter 28 →