Habakkuk 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩ ũtw'ĩo wĩ vinya ũla Ngai wavuanĩisye mwathani Avakũki.

2Ame Mwĩai Ngai, nĩendeea ũkwĩkaĩla nginya ĩndĩĩ, naku ndũkwenda kwĩw'a? Kana nĩendeea ũkwĩkaĩla ngĩkwĩa, “Kwĩ ithokoo!” Naku ndũkwenda kũtũtangĩĩa?

3Ũtumaa nona maũndũ mathũku na kũsyaĩĩsya mathĩna nĩkĩ? Wanangĩko na ithokoo ninthyũlũlũkĩte, ĩteta na ngananĩo syĩ kĩla vandũ.

4Kwondũ wa ũu mĩao ndĩ na vinya, na sila wa katĩ ndũatĩĩawa. Andũ ala athũku nĩmasindaa ala alũngalu kĩsilĩlonĩ, na kwoou sila wa katĩ nĩwelelũkaw'a.

5Nĩvo ĩndĩ Mwĩai Ngai weeie andũ make atĩĩ, “Syaĩĩsyai nthĩ ila imũthyũlũlũkĩte; seng'ai na mũisaanĩw'a, nũndũ nĩngwĩka ũndũ ĩvindanĩ yĩĩ mwĩ thayũ, ũndũ mũtakaĩkĩĩa o na mwatavw'a.

6Nĩngũtuma andũ ma Mbavilonĩ methĩwa na ũtonyi, mbaĩ yĩ andũ athũku na athangaau, ala maendaa kĩla vandũ ĩũlũ wa nthĩ, na kwĩyosea motũo mate moo.

7Andũ asu nĩ ma ũkĩwa na nĩmatumaa andũ matw'ĩka nda; nĩmo metw'ĩĩaa ũla waĩlu na ũla ũte waĩlu.

8Mbalasi syoo syĩ maũũ mbee wa ikoyo, na nĩ mbai mbee wa nzũi syĩ na nzaa ĩa mawĩoo. Asikalĩ moo malĩsĩte mbalasinĩ maendaa na ngathĩĩo, ĩĩ, asikalĩ moo malĩsĩte mbalasinĩ mokaa kuma kũasa, maendaa mĩtũkĩ ta ndiũ ĩtheete ĩkwate nyamũ ĩye.

9Onthe mokaa kũete kĩthokoo, kĩla mũndũ nũtelemaa yĩla mokĩte, na mombanasya andũ aingĩ ta kĩthangathĩ me atave.

10Nĩmavũthĩĩasya asumbĩ, na kũthekeea anini ma asumbĩ. Nĩmathekeeaa kĩla ndũa mbiĩĩe, nũndũ mombanasya mbumbu sya mũthanga, na kũkwata ndũa isu.

11Nĩvo ĩndĩ mavĩtũkaa mĩtũkĩ ta kĩseve makathi; andũ avĩtany'a, ala ũtonyi woo nĩw'o ngai yoo!”

12“We Mwĩai Ngai, Ngai wakwa, Ngai wakwa Mũtheu, nĩkũlya, nũndũ ũtekalaa tene na tene? Tũikakw'a. We Mwĩai Ngai, nũnyuvĩte andũ ma Mbavilonĩ matũsilĩle; we Ĩvia yakwa, nĩwamanengie ũtonyi wa kũtũkany'a!

13Metho maku nĩ matheu mũno, ndũtonya kũsisya ũthũku; ndũtonya kũsyaĩĩsya andũ meke mothũku. Nĩkĩ ũekanaa na ala me na ũseleke? Nĩkĩ ũũvindya yĩla ala athũku mekũmina andũ alũngalu kwĩ mo?

14Ũtumĩte andũ methĩwa mailyĩ ta makũyũ me ũkanganĩ; ta tũsamũ tũla tũtambũkaa tũte na mũtongoi.

15Andũ ma Mbavilonĩ nĩmakwatasya andũ na ndoano ta makũyũ, nĩmamakwatasya na kĩtei kyoo, na kũmombanĩsya ĩkengenĩ yoo. Nĩvo ĩndĩ matanaa na kwĩw'a mũyo.

16Kwoou nĩmathembeaa itei syoo nthembo, na kũvĩvĩsya ĩkenge yoo nthembo ya ũvani, nĩkwĩthĩwa itei syoo nĩsyo itumaa mekala thayũ wa kwĩtanĩthya, na maiya lĩu ũla mũseo vyũ.

17Nĩkũlya, andũ asu meendeea kumya andũ iteinĩ syoo, na mate na tei maimina andũ ĩũlũ wa nthĩ?”

Jump to: Chapter 2 →