Habakkuk 3

Kamba (MBIVILIA ŨVOO MŨSEO)

← Chapter 2 Jump to:

1Ĩno nĩyo mboya ya mwathani Avakũki:

2We Mwĩai Ngai, nĩnĩw'ĩte nguma yaku; nĩngũkĩa mawĩa maku we Mwĩai Ngai. Ĩka maũndũ asu ĩngĩ ĩvindanĩ yitũ; meke nĩ kana mamanyĩke ĩvindanĩ yĩĩ yitũ. Ĩw'a tei, o na yĩla wathata.

3Ngai nĩwookie kuma Temani, Ũla Mũtheu kuma Kĩĩmani kya Valani. Ũkumyo wake nĩwausũie matunĩ, na ndaĩa yake yausũa ĩũlũ wa nthĩ.

4Ũtisu wake wailyĩ ta wa syũa; syeni nĩsyaumaa kw'okonĩ kwake, vala nĩvo vinya wake ũvithĩtwe.

5Nĩwatũmie ũwau mũthũku wathi mbee wake, na kĩkw'ũ kyamũatĩĩa ĩtina.

6Nĩwaũngamie, na nthĩ yathingitha; nĩwasyaisye, na nthĩ syatetema. Iĩma sya tene nĩsyanyaĩĩkie, na tũlĩma twa tene twathelekelya. Isu nĩsyo nzĩa ila wesĩlaa ĩvinda ya tene.

7Nĩnoonie andũ ma Kusani maithĩna, na andũ ma Mitiani maitetema.

8We Mwĩai Ngai, ko ũthatĩtw'e nĩ mbũsĩ? Ko ũthatĩtw'e nĩ tũlũsĩ, ũkathatĩa ũkanga, na ũkathi na mbalasi syaku, na makasya maku ma kaũ ũkasinde?

9Nĩwoombanisye ũta waku, na weekĩa maangi maku thyakanĩ. Nĩwaatũangie nthĩ na mbũsĩ.

10Iĩma nĩsyakwonie na syatetema; kĩw'ũ kingĩ nĩkyesĩlile kũu. Kũla kũliku ũkanganĩ nĩkwauumie, na kwookĩlya itulumo syakw'o ĩũlũ.

11Syũa na mwei nĩsyaũngamie matunĩ, yĩla syoonie kyeni kya maangi maku ala wekisye, yĩla syoonie ũtisu wa ĩtumo yaku yĩitisatisa.

12Nĩwesĩlile ĩũlũ wa nthĩ wĩ mũthatu, na wakũna andũ ĩũlũ wa nthĩ nũndũ wa ũthatu waku.

13Nĩwaendie kũtangĩĩa andũ maku, kũtangĩĩa mwĩtĩkĩw'a mauta waku. Nĩwakũnie mũtongoi wa nthĩ ya ũthũku, na wamina aatĩĩi make onthe.

14Nĩwaathie mĩtwe ya ngũmbaũ syake na maangi maku, ngũmbaũ ila syookĩte ta kĩlingi kũtũvalaany'a, syĩ na ũtanu ta iũmina ngya kĩmbithĩnĩ.

15Nĩwesĩlile ũkanganĩ na mbalasi syaku, kĩw'ũnĩ kingĩ kĩna itulumo.

16Neew'a ũu nĩnĩtetemaa, ilomo syakwa nithĩlĩaa nĩ w'ĩa. Mavĩndĩ makwa nĩmakwatawa nĩ wonzu, na maũũ makwa maitetema. Neteelaa na wũmĩĩsyo mũthenya wa wanangĩko, mũthenya ũla wĩmokĩa ala matũvithũkĩaa.

17O na mĩkũyũ yalea kũlaũka, kana mĩsavivũ ĩlee kũsyaa, na mĩthata ĩyĩthĩwa ĩte na ũsyao, na mĩũnda ĩilea kwĩthĩwa na ngetha, na mbũi na malondu iithela syengonĩ, na o ta ũu indo iyaa itũũnĩ,

18nyie ngaendeea kũtana nthĩnĩ wa Mwĩai Ngai, ngatanĩa Ngai mũtangĩĩi wakwa.

19Mwĩai Ngai Mũsumbĩ nĩwe vinya wakwa; nũtumaa maũũ makwa methĩwa mailyĩ ta maũũ ma nthia, nũndonyethasya kũthi kũndũ kũtũlu.

← Chapter 2 Jump to: