Habakkuk 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1“Nĩngũũngama vandũnĩ vakwa va kũsyaĩĩsya, na ngĩkala kĩtaanĩ kyakwa ĩũlũ, na kweteela nĩw'e ũndũ ũkũmbĩa, na ngĩmanya ũndũ ũkũsũngĩa ĩũlũ wa kũnyungunyĩsya kwakwa.”

2Nĩvo ĩndĩ Mwĩai Ngai wanzũngĩie ambĩa atĩĩ, “Andĩka woni ũũ; ũandĩke wenekee nesa masengeanĩ, wĩthĩe ũla ũvĩtĩte nũtonya kũũsoma.

3Nĩkwĩthĩwa woni ũũ weteelete ĩvinda yĩla yaĩlĩte; wĩneena ĩũlũ wa ĩvinda ya mũminũkĩlyo, na ndũkalea kwĩanĩa. Eteela woni ũũ, o na woona ũilyĩ ta ũkwĩkalanga, vate nzika ũkeanĩa, na ndũkekala.

4Mũndũ ũla ũte mũlũngalu ndakaendeea kwĩkala thayũ, ĩndĩ ũla mũlũngalu akekala thayũ nũndũ wa mũĩkĩĩo wake.”

5Kwa w'o ũkĩ nũtumaa mũndũ aa; mũndũ wĩ ngathĩĩo ndatũaa. Ethĩawa eyũmbanĩtye kũmelya andũ ta vala maveva ma ala akw'ũ mekalaa; o tondũ kĩkw'ũ kĩteanĩawa, o nake ndeanĩawa. Eyũmbanĩasya andũ onthe ĩũlũ wa nthĩ, na kwĩyũmbanĩsya andũ onthe ta ũthwii wake.

6Andũ onthe makathekeeaa mũndũ wa mũthemba ũsu na kũmũvũthya. Makaneenaa mayasya atĩĩ, “Kyeva nĩ kwaku we mũndũ ũla wosaa syĩndũ ite syaku, na kũkua mũio wa mathiĩ! Wĩendeea kwĩka ũu nginya ĩndĩĩ?”

7Ĩvinda yĩmwe andũ asu makookĩla ũtataĩĩe, ala matonya kũtuma ũtetema makaamũka, nĩvo ĩndĩ wĩtw'ĩka mũtavo kwoo.

8Nĩkwĩthĩwa nũtavĩte andũ ma nthĩ ingĩ mbingĩ, onthe ala matialĩte makakũtava. Makakũtava nũndũ nĩwũaĩte andũ, na kwananga nthĩ, ndũa, na andũ onthe ala matũaa nthĩnĩ wasyo.

9Kyeva nĩ kwaku we mũndũ ũla ũkwatĩaa mũsyĩ waku ũthwii kwa nzĩa nthũku, we ũla wakaa nyũmba yaku kĩĩmanĩ ĩũlũ, ũisũanĩa kana wĩ ũsũvĩonĩ na ndũkwatwa nĩ mũisyo.

10Ĩndĩ mĩvango yaku nĩtumĩte mũsyĩ waku ũkwatwa nĩ nthoni; kwa kũmina andũ ma nthĩ mbingĩ, wĩyĩetee wanangĩko we mwene.

11O na mavia ala me ngũtanĩ nĩmeũkaya nũndũ waku, na mbwaũ ila syĩ kĩalanĩ o nasyo niũkaya.

12Kyeva nĩ kwaku we ũla wakaa ndũa na wũaani, we ũla ũlũlũmĩĩlasya ndũa na mothũku!

13Mwĩai Ngai Mwene Ũtonyi W'onthe, nũtumaa kĩthito kya andũ kĩthelela mwakinĩ, na andũ ĩũlũ wa nthĩ maithĩnĩka mana.

14Nĩkwĩthĩwa nthĩ yonthe ĩkausũwa nĩ ũmanyi wa ũkumyo wa Mwĩai Ngai, o tondũ kĩw'ũ kyusũĩte ũkanganĩ.

15Kyeva nĩ kwa ũla ũtumaa atũi make mamilwa, kwa kũmekĩa ndivai kuma kĩkuunĩ kya kĩthuma nginya makamilwa, nĩ kana amone me athei.

16Ũkausũwa nĩ nthoni vandũ va ndaĩa. Nyw'a we mwene woneke wĩ mũthei! Mwĩai Ngai mwene akatuma ũnyw'a kĩkombe kya ũkany'o, na ndaĩa yaku ĩkatw'ĩka kĩvũthya!

17Mothũku ala weekie Levanoni makakũkwata we mwene; nĩwooaie nyamũ, na kwoou nyamũ ikakũtelemya, nĩkwĩthĩwa nĩwũaĩte andũ, nĩwaanangie nthĩ, ndũa na andũ onthe ala matũaa nthĩnĩ wasyo.

18“Nĩkũlya, ngai ya mũvw'anano yĩ vata mwaũ, na no mũndũ ũmĩseũvĩtye? Nĩ mũvw'anano ũmanyĩasya ũvũngũ, nĩkwĩthĩwa ũla ũũseũvasya aĩkĩĩaa wĩa wake mwene, ũla nĩ mũvw'anano ũtaneenaa.

19Kyeva nĩ kwa ũla wĩaa kĩndũ kĩseũvĩtw'e na mũtĩ, ‘Amũka!’ Kana wĩaa ĩvia yĩtew'aa nthĩ, ‘Ũkĩla!’ Nĩkũlya, kwa w'o ngai ya mũvw'anano nĩtonya kũmanyĩsya mũndũ? Yĩthĩawa ĩvakĩtwe thaavu na silĩva, ĩndĩ ndĩ na thayũ o na ũmwe.”

20Ĩndĩ Mwĩai Ngai e Ĩkalũnĩ yake ĩtheu; andũ onthe ĩũlũ wa nthĩ nĩmavindye me mbee wake.

← Chapter 1 Jump to: Chapter 3 →