Joel 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩw'o ũtũmani ũla Mwĩai Ngai wanengie Yoeli mwana wa Vethũeli.

2Ĩthukĩĩsyei inyw'ĩ andũ akũũ, Teai matũ andũ onthe ma Yuta! Nĩkũlya, ũndũ wa mũthemba ũũ waaĩkĩka ĩvindanĩ yenyu, kana ya aaũmae menyu?

3Tavyai syana syenyu ĩũlũ waw'o, nasyo syana syenyu iitavya syana syasyo, nasyo syana isu syasyo iitavya nzyawa ila syĩ ĩtina wasyo.

4Kĩla kyatialilw'e nĩ itooli, nĩkyaĩwe nĩ kĩthuĩ kya ngie; kĩla kyatialilw'e nĩ kĩthuĩ kya ngie, nĩkyaĩwe nĩ tũtooli; kĩla kyatialilw'e nĩ tũtooli, nĩkyaĩwe nĩ ngie sya mũthemba ũngĩ.

5Amũkai inyw'ĩ athengi, na mũiĩa! Kayai inyw'onthe anywi ma ndivai, nũndũ nzavivũ sya kũseũvya ndivai nzaũ nĩ mbanange.

6Nthĩ yaitũ nĩvithũkĩĩtwe nĩ kĩthuĩ kya ngie; ngie isu syĩ na vinya, na iitalĩka. Syĩna maeo mailyĩ ta ma mũnyambũ, mbosela ta sya mũnyambũ mũka.

7Nĩsyanangĩte mĩsavivũ yakwa, na o ta ũu ikananga mĩkũyũ yakwa. Nisyũlĩtye makonde mayo, na ikamekya kũasa, ikatia mbonge syayo syĩ nzaũ.

8Ĩai ta mwĩĩtu ũtaamanyana kĩ-mwĩĩ na mũndũ-ũme, wĩkĩĩte ngũa ngaamu sya makunia, wĩ na kyeva nũndũ mwanake ũla ũnesaa kũmũtwaa nĩ mũkw'ũ.

9Nthembo ya ngetha ya mbaa mbeke, na nthembo ya kũnyuwa ya ndivai niekete kũtwawa Ĩkalũnĩ. Athembi me na kyeva, athũkũmi ma Mwĩai Ngai me na kyeva.

10Mĩũnda nĩ mĩthei na nthĩ yĩ na kyeva, nũndũ lĩu wa mbaa mbeke nĩmwanange na mĩsavivũ nĩ mbũmũ, na mĩtĩ ya mĩthata nĩ mbũmũ.

11Inyw'ĩ aĩmi, kw'ai ngoo; ĩai inyw'ĩ aĩmĩi ma mĩsavivũ. Ĩai nũndũ wa nganũ, na nganũ yĩtawa mbaale, nũndũ ngetha ya mĩũndanĩ nĩ mbanange.

12Mĩsavivũ nĩyũmĩte, na mĩkũyũ nĩvovete; mĩkũngũmanga, mĩkĩndũ na mĩevo, mĩtĩ yonthe ya mũũndanĩ nĩ mbũmũ. Kwa w'o andũ mai na ũtanu.

13Athembi ĩkĩai ngũa ngaamu sya makunia na kũĩa, ĩai inyw'ĩ athũkũmi ma kĩthembeonĩ. Endai Ĩkalũnĩ mwĩkĩĩte ngũa ngaamu sya makunia mũĩe ũtukũ mũima, inyw'ĩ athũkũmi ma Ngai wakwa, nũndũ vai nthembo ya mbaa mbeke, na ya kũnyuwa ya ndivai ya kũthembea Ngai wenyu Ĩkalũnĩ.

14Vathai ĩvinda ya kũtĩĩa kũya; ĩtai wũmbano mũtheu! Ũmbanĩsyai atumĩa, na andũ onthe ma Yuta, Ĩkalũnĩ ya Mwĩai Ngai, Ngai wenyu na mũimwĩkaĩla.

15Kyeva nĩ kwitũ nũndũ wa Mũthenya wa Mwĩai Ngai; Mũthenya wa Mwĩai Ngai wĩ vakuvĩ, mũthenya ũla Mwene Ũtonyi W'onthe ũkaete wanangĩko.

16Lĩu nĩwanangĩtwe ũkathela tũsyaĩĩsye, Ĩkalũnĩ ya Ngai waitũ vai ũtanu na mũyo.

17Mbeũ nĩsyoee mũthanganĩ mũmũ, makũmbĩ nĩ mathei, makũmbĩ nĩ manangĩku, nĩkwĩthĩwa vai ngetha ya mbaa mbeke.

18Indo nikwany'a nũndũ syĩ na thĩna, nũndũ iina nyeki itonya kũya; o ta ũu mbũi na malondu niũthĩna.

19Ame Mwĩai Ngai, nĩngũkwĩkaĩla, nĩkwĩthĩwa mwaki nũvĩvĩtye nyeki weũnĩ. Mũĩ sya mwaki nivĩvĩtye mĩtĩ isesinĩ.

20O na nyamũ sya kĩthekanĩ niũkwĩkaĩla, nũndũ tũlũsĩ twa kĩw'ũ nĩ tũng'alu, na mwaki nũvĩvĩtye nyeki weũnĩ.

Jump to: Chapter 2 →