Joel 3

Kamba (MBIVILIA ŨVOO MŨSEO)

← Chapter 2 Jump to:

1Mwĩai Ngai easya atĩĩ, “Ĩvindanĩ yĩu na mĩthenyanĩ ĩsu, yĩla ngatuma Yuta na Yelũsalemu iendeea nesa ĩngĩ,

2ngoombany'a andũ onthe ĩũlũ wa nthĩ, na kũmatheesya Mwandanĩ wa Yeosavati. Me vau ngamasilĩla, nũndũ wa ũtiĩwa wakwa na andũ makwa Ĩsilaeli. Nũndũ nĩmanyaĩĩkĩsye andũ makwa mbaĩnĩ sya andũ, na makaany'a nthĩ yakwa.

3Nĩmaanie andũ makwa kwa kũkũna kula; nĩmathooisye imwana nĩ kana maĩve malwaya, na mathoosya eĩtu nĩ kana mathooe ndivai manyw'e.

4“Nĩmũkũlya atĩĩ, inyw'ĩ andũ ma Tile, Sitoni na ma isio sya Vilisitia, mwĩ na ũndũ mwaũ nakwa? Mwĩenda kwĩyĩĩvanĩsya kũla nĩĩ nũndũ ve ũndũ nĩmwĩkĩte? Ethĩwa mwĩenda kwĩka ũu, nĩngũmũĩva mĩtũkĩ mũno kwĩanana na ũndũ mwĩkĩte,

5nũndũ nĩmwosete thaavu wakwa na silĩva, na mũkatwaa ũthwii wakwa makalũnĩ menyu.

6Nĩmũthooetye andũ ma Yuta na ma Yelũsalemu kũla kwĩ Akiliki, nĩ kana mũtume mekala kũasa na nthĩ yoo.

7Ĩndĩ yu nĩngũmaumya kũla mwamathooisye. Nĩngũmwĩka o ũndũ mwamekie.

8Nĩngũthoosya ana na eĩtu menyu kũla kwĩ andũ ma Yuta, namo maimathoosya kũla kwĩ andũ ma Seva, mbaĩ yĩ kũasa. Nĩasya ũu nyie Mwĩai Ngai.

9“Tavany'ai ũtũmani ũũ mbaĩnĩ sya andũ mwasye atĩĩ, ‘Ĩyũmbanĩsyei kaũ; thangaasyai ngũmbaũ syenyu, na asikalĩ menyu maithengeea mavithũkĩe.

10Tuai mĩthya ya mĩlaũ yenyu ĩtw'ĩke mbyũ, na tũvyũ twenyu twa kũsea tũtw'ĩke matumo.’ Ala onzu nĩmasye, ‘Nĩna vinya.’

11Andũ ma mbaĩ kuma kĩla ngalĩko ũkai mwĩkalaatĩte, mũmbanĩe Mwandanĩ wa Yeosavati. Ame Mwĩai Ngai, tũma asikalĩ maku.

12“Andũ ma mbaĩ ingĩ nĩmeyũmbany'e, na mayũka Mwandanĩ wa Yeosavati; vau nyie Mwĩai Ngai, ngekala nthĩ, nĩsilĩle mbaĩ syonthe kuma kĩla ngalĩko.

13Vyũlya kavyũ koĩ ka kũketha, nĩkwĩthĩwa ngetha nĩ mbĩu. Ũka ũkinyange nzavivũ, nĩkwĩthĩwa nĩsyusũĩte vala ivivĩawa, na maviva nĩmausũĩte maketĩkanga; ũthũku woo nĩ mwingĩ mũno!”

14Andũ aingĩ mũno me Mwandanĩ wa Ũsilĩlo! Nũndũ Mũthenya wa Mwĩai Ngai wĩ vakuvĩ kũvika, ũkooka Mwandanĩ ũsu wa Ũsilĩlo.

15Syũa na mwei ikamesya kĩvindu, na ndata ikaeka kumya kyeni.

16Mwĩai Ngai akaluluma e Saioni, na kumya wasya wake e Yelũsalemu. Nthĩ na matu ikathingitha, ĩndĩ Mwĩai Ngai akeethĩwa wĩvitho wa andũ make; akeethĩwa wĩvitho mũlũmu wa andũ ma Ĩsilaeli.

17“Nĩvo ĩndĩ mwĩmanya kana ninyie Mwĩai Ngai, Ngai wenyu, ũla wĩkalaa Saioni, kĩĩma kyakwa kĩtheu. Yelũsalemu ĩkeethĩwa yĩ ntheu, na aeni maikamĩkwata ĩngĩ.

18“Mũthenyanĩ ũsu iĩma ikeethĩwa syusĩe mĩsavivũ, na tũlĩma tw'onthe tũkeethĩwa tusũĩte ng'ombe; tũlũsĩ tw'onthe twa Yuta tũkavĩtya kĩw'ũ. Nthongo ĩkaumĩla Ĩkalũnĩ ya Mwĩai Ngai, na kĩw'ũ kyayo kĩkanyithya Mwanda wa Sitimu.

19“Misili ĩkatw'ĩka weũ, na Etomu ĩitw'ĩka weũ mũthei, nũndũ wa ũthũku ũla mekĩte andũ ma Yuta, na makoaĩa andũ mate ĩvĩtyo nthĩ yoo.

20Yuta ĩkatũwa tene na tene, na Yelũsalemu ĩitũwa nzyawanĩ syonthe.

21Naĩ yoo ya kũaa ĩla ndaamaekea, nĩngũmaekea. Nyie Mwĩai nĩkalaa Saioni.”

← Chapter 2 Jump to: