Joel 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Vuvĩai soo Saioni; usyai ngemi mwĩ kĩĩmanĩ kyakwa kĩtheu! Andũ onthe ma Yuta mateteme, nĩkwĩthĩwa mũthenya wa Mwĩai Ngai nĩwũkĩte na wĩ vakuvĩ.

2Ũkeethĩwa mũthenya wĩ kĩvindu na kĩmako kingĩ, mũthenya wĩ matu na kĩvindu kĩkamu. Kĩthuĩ kĩnene kya ngie kĩna vinya nĩkyũkĩte, kĩilyĩ kĩvindu kĩla kĩvw'ĩkaa iĩma; kũyaaĩthĩwa kĩndũ kĩngĩ kĩilyĩ ta kĩu, o na kĩikethĩwa ĩngĩ nzyawanĩ syonthe.

3Ngie isu iĩsaa mĩmea ũndũ mwaki ũvĩvasya. Mbee wasyo nthĩ yĩthĩawa ĩilyĩ Mũũnda wa Eteni, ĩndĩ ĩtina wasyo nĩ weũ mũthei, vai kĩndũ itialasya.

4Iilyĩ ta mbalasi, na isembaa ta mbalasi sya kaũ.

5Ithaanyũkangaa iĩmanĩ ĩũlũ, ikaumya wasya ta wa makasya ma kaũ. Syumasya wasya ta wa nyeki iũvya, na syĩthĩawa syĩvangĩte ta asikalĩ aingĩ meyũmbanĩsye kaũ.

6Andũ masyona nĩmethĩawa na thĩna; nĩmatukasya mothyũ moo.

7Ivĩthũkĩaa ta ngũmbaũ; ilĩsaa ngũta ta asikalĩ. Kĩla ĩmwe ĩatĩĩaa mũthĩa wayo, na ndyumaa ũtee wa nzĩa ĩla ĩatĩĩe.

8Vai ĩmwe ĩsukumaa ĩla ĩngĩ, kĩla ĩmwe ĩatĩĩaa mũthĩa wayo. Itonyelaa kũla kwĩkĩĩtwe isiĩĩi, na vai kĩndũ kĩtonya kũisiĩĩa.

9Nivithũkĩaa ndũa; nisembelaa ngũtanĩ. Nilĩsaa nyũmba ĩũlũ, na kũlikĩla ndĩlĩsyanĩ ta ing'ei.

10Syũkĩte, nthĩ nĩthingithaa, na matu nĩmatetemaa. Syũa na mwei nimeasya kĩvindu, na ndata niekaa kumya kyeni.

11Mwĩai Ngai nĩwumasya mĩao e mbee wa asikalĩ make ma kaũ, asikalĩ asu make nĩ aingĩ mũno, na mekaa ũndũ mĩao yake ĩkwasya na me vinya mwingĩ. Mũthenya wa Mwĩai Ngai nĩ mũnene na nĩ wa kũtĩsya. Nũũ ũtonya kũwũmĩĩsya?

12“Mwĩai Ngai easya atĩĩ, “Nzyokeai na thayũ wenyu w'onthe, mũtĩĩte kũya, na mũĩĩte mwĩ na kyeva.

13Tembũangai ngoo syenyu, na ti ngũa syenyu. Nzyokeai nyie Mwĩai Ngai, Ngai wenyu.” Syokeai Mwĩai Ngai, Ngai wenyu, nũndũ nĩ mũseo na e tei. Ndathataa mĩtũkĩ, na e wendo mwingĩ ũtaolekaa. Nĩwĩthĩawa eyũmbanĩtye kũekea na kũlea kũete ũthũku.

14Nĩkũtonyeka Mwĩai Ngai, Ngai wenyu, akaalyũla mosũanĩo make na kũmwĩw'ĩa tei, na kũmũathima, mũkethĩwa na nthembo ya ngetha ya mbaa mbeke, na ya kũnyuwa ya ndivai, ya kũthembea Mwĩai Ngai, Ngai wenyu.

15Vuvĩai soo Saioni, na mũivatha ĩvinda ya kũtĩĩa kũya. Ĩtai wũmbano mũtheu.

16Ũmbany'ai andũ; matavyei nĩmeyũmbanĩsye wũmbano mũtheu. Ũmbany'ai atumĩa, na mũyũmbany'a syana na tũũkenge, o na ala manatwaanie mĩtũkĩ nĩmatie nyũmba syoo na mayũka.

17Athembi, ala nĩ athũkũmi ma Mwĩai Ngai, nĩmaĩe me katĩ wa kĩthembeo na ũlikĩlo wa Ĩkalũ; nĩmaĩe na kũvoya mayasya atĩĩ, “Mwĩai Ngai, ĩw'ĩa andũ maku tei. Ndũkaeke andũ ma nthĩ ingĩ matũvũthye na kũtũmonda, maineena na kũkũlya atĩĩ, ‘Ngai woo aĩva?’ ”

18Nĩvo ĩndĩ Mwĩai Ngai woonanisye wendo wake mwingĩ kũla kwĩ nthĩ ya Yuta; nĩweew'ĩie andũ make tei.

19Mwĩai Ngai nĩwasũngĩie andũ make amea atĩĩ, “Nĩngũmũnenga ngetha ya mbaa mbeke, ndivai na mauta na nĩmũkwĩanĩwa; ndikatuma ĩngĩ mũvũthw'a nĩ andũ ma nthĩ ingĩ.

20Nĩngũvetanga kĩthuĩ kya ngie kĩla kyaumie ngalĩko ya ĩũlũ, na kũkĩtwaa weũnĩ, nthĩ ĩtatwĩe andũ. Ngie ila syĩ mbee ikalika Ũkanganĩ Mũkw'ũ, na ila syĩ ĩtina iilika Ũkanganĩ wa Menditelenia. Ngie isu ikoa na kũnyunga mũno, nĩkwĩthĩwa nĩsyĩkĩte maũndũ maingĩ.

21“We nthĩ, ndũkakĩe; ĩw'a mũyo na ũitana, nũndũ Mwĩai Ngai nĩwĩkĩte maũndũ manene.

22Inyw'ĩ nyamũ sya kĩthekanĩ, mũikakĩe, nĩkwĩthĩwa isesi ila syĩ kĩthekanĩ nĩ nthongoou; mĩtĩ nĩkũsyaa matunda, mĩkũyũ na mĩsavivũ nĩkũsyaa matunda maingĩ.

23“Inyw'ĩ andũ ma Saioni, tanai; tanai mwĩ nthĩnĩ wa Mwĩai Ngai, Ngai wenyu, nĩkwĩthĩwa nũmũeteae mbua ya nthwa na kĩthimi kya w'o. Nũmũeteae mbua mbĩanĩu, ya nthwa, na ya uũa ũndũ weekaa tene.

24Ivũĩo ikausũa ngetha ya mbaa mbeke, na maviva makausũa ndivai nzaũ na mauta maketĩkanga.

25“Nĩngũmũtũngĩa syĩndũ syonthe, ila mwaaisye myakanĩ ĩla ithuĩ sya ngie, itooli, tũtooli na ngie sya mũthemba ũngĩ, syaĩe syĩndũ ila syaĩ mĩũndanĩ yenyu. Ninyie namũtũmĩie nguthu ĩsu ya asikalĩ!

26Nĩmũkwĩthĩwa na lĩu mwingĩ wa kũya nginya mũvũne, na mũitaĩa ĩsyĩtwa ya Mwĩai Ngai, Ngai wenyu ũla ũmwĩkĩte maũndũ ma kũseng'ya. Andũ makwa maikavũthw'a ĩngĩ.

27Nĩvo ĩndĩ mwĩmanya kana nyie nĩ katĩ wa andũ ma Ĩsilaeli, na kana ninyie Mwĩai Ngai, Ngai wenyu, na vai ũngĩ. Andũ makwa maikavũthw'a ĩngĩ.

28“Ĩtina wa ũu, ngatulũla Veva wakwa andũnĩ onthe. Ana menyu, na eĩtu menyu makathana, na atumĩa menyu makaota ndoto. O ta ũu anake menyu makoona mawoni.

29Mĩthenyanĩ ĩsu, ngatulũĩla o na athũkũmi makwa ma aũme na ma aka Veva wakwa.

30“Ngoonany'a maũndũ ma kũseng'ya ĩtunĩ na ĩũlũ wa nthĩ; kũkeethĩwa nthakame, mwaki na syũki yingĩ.

31Syũa yĩkaalyũlwa yĩthĩwe kĩvindu, naw'o mwei ũitunĩva ta nthakame, mũthenya mũnene na wakũtĩsya wa Mwĩai Ngai ũtanamba kũvika.

32Nĩvo ĩndĩ kĩla mũndũ ũla wĩkaĩlaa ĩsyĩtwa ya Mwĩai Ngai wĩtangĩĩwa, nĩkwĩthĩwa Kĩĩmanĩ kya Saioni, na Yelũsalemu andũ makavonokw'a, O tondũ Mwĩai Ngai ũneenete akasya atĩĩ, ‘Katĩ wa ala makatiala vakeethĩwa amwe ala nyie Mwĩai Ngai nĩnyuvĩte.’ ”

← Chapter 1 Jump to: Chapter 3 →