Jonah 1

Kamba (MBIVILIA ŨVOO MŨSEO)

Jump to: Chapter 2 →

1Ĩvinda yĩmwe Mwĩai Ngai nĩwaneenie na Yona mwana wa Amitai amwĩa atĩĩ,

2“Enda ndũanĩ nene ya Nineva ũkatavye andũ mayo kana nyie Mwĩai Ngai nĩnĩminĩte kwona ũthũku woo.”

3Vandũ va kwĩka ũu, Yona nĩwambĩĩie kyalo kya kũthi Talisisi akĩĩte Mwĩai Ngai. Nĩwatheeie Yova na eethĩa Meli yaendete Talisisi. Nĩwaĩvie na alika melinĩ ĩsu nĩ kana ĩmũtwae Talisisi aũme vala ve Mwĩai Ngai.

4Ĩndĩ Mwĩai Ngai nĩwaetie kĩseve kĩnene ũkanganĩ na kweethĩwa na itulumo nene weethĩa ikilĩlye kwananga meli.

5Andũ ala maĩ melinĩ nĩmakwatiwe nĩ w'ĩa na kĩla ũmwe ambĩĩa kwĩkaĩla ngai yake. Nĩmekangisye ũkanganĩ syĩndũ ila syaĩ Melinĩ nĩ kana ĩvũthe. Ĩvindanĩ yĩu Yona nĩwalikĩte kũndũ naku melinĩ nthĩnĩ na akakoma akalĩkwa.

6Mũnene wa meli ĩsu nĩwaendie vala ve Yona na amwĩa atĩĩ, “Ũtonya kũkoma ata? Ũkĩla ũvoye ngai yaku! Ngai yaku nĩtonya kũtwĩw'ĩa tei na kũtuma tũlea kũkw'a.”

7Nĩvo ĩndĩ andũ ala maĩ melinĩ maneenanisye ene kwa ene mayasya atĩĩ, “Ũkai tũkũne kula nĩ kana tũmanye nũũ ũla ũtumĩte mũisyo ũũ ũtũkwata.” Nĩmakũnie kula na yavalũkĩla Yona.

8Kwoou nĩmakũlilye Yona atĩĩ, “Tũtavye nũũ ũla ũtumĩte tũkwatwa nĩ thĩna wĩana ũũ. Ũtethasya wĩa mwaũ? Wumĩte va? Nthĩ yaku nĩ yĩkũ? Wĩ wa mbaĩ yĩva?”

9Yona nĩwasũngĩie amea atĩĩ, “Nyie nĩ Mũevelania. Nĩthaithaa Mwĩai Ngai, Ngai wa ĩtu, ũla woombie nthĩ nyũmũ na ũkanga.”

10Yĩla andũ ala maĩ melinĩ meewie ũu nĩmakwatiwe nĩ w'ĩa, nũndũ Yona aĩ anamatavya kana akĩĩte Mwĩai Ngai. Nĩvo ĩndĩ mamũkũlilye atĩĩ, “Wĩkĩte ũndũ mwaũ?”

11Itulumo nĩsyaendeeie kwingĩva ũkanganĩ na kwoou makũlya Yona atĩĩ, “Twĩkwĩka ata nĩ kana ũkanga ũusye?”

12Yona nĩwamasũngĩie amea atĩĩ, “Mbosei mũmbĩkye ũkanganĩ na ũkanga nũkũusya. Nĩnĩsĩ kana ĩvĩtyo yakwa nĩyo yĩtumĩte itulumo ii nene sya ũkanga syĩthĩwa.”

13Andũ ala maĩ melinĩ nĩmatatie na vinya kũtwaa meli ũtee wa ũkanga, ĩndĩ maemwa nĩ kwĩka ũu nũndũ itulumo sya ũkanga nĩsyaendeeie kwingĩva mbeange.

14Nĩvo ĩndĩ meekaĩlile Mwĩai Ngai mayasya atĩĩ, “Ame Mwĩai Ngai nĩtũũkũvoya, ndũkatũae nũndũ wa kũaa mũndũ ũũ. Ndũkatũtalĩle ũthũku nũndũ wa kũaa mũndũ ũũ ũte ĩvĩtyo, nĩkwĩthĩwa we Mwĩai Ngai wĩkĩte kwenda kwaku.”

15Nĩvo ĩndĩ moosie Yona mamwĩkya ũkanganĩ, na ũkanga wausya.

16Ũndũ ũsu nĩwatumie andũ ala maĩ melinĩ makĩa Mwĩai Ngai nginya mamũthembea nthembo na meevĩta.

17Mwĩai Ngai nĩwatumie ĩkũyũ ĩnene yĩmelya Yona, na Yona ekala ĩvunĩ ya ĩkũyũ yĩu mĩthenya ĩtatũ, ũtukũ na mũthenya.

Jump to: Chapter 2 →