Jonah 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Mwĩai Ngai nĩwaneenie na Yona ĩvinda ya kelĩ amwĩa atĩĩ,

2“Enda ndũanĩ nene ya Nineva ũkatavye andũ mayo ũtũmani ũla ngũnengete.”

3Nĩvo ĩndĩ Yona waendie Nineva kwĩanana na ũndũ Mwĩai Ngai wamwĩaĩĩte. Nĩneva yaĩ ndũa nene mũno ta mũendo wa mĩthenya ĩtatũ kuma ngalĩko ĩmwe kũthi ĩla ĩngĩ.

4Yona nĩwambĩĩie kũlika ndũanĩ ĩsu athi mũendo wa mũthenya mũima na aneena na andũ mayo amea atĩĩ, “Vatiele o mĩthenya mĩongo ĩna na ndũa ĩno ĩyanangwa!”

5Andũ ma Nineva nĩmeetĩkĩlile ũtũmani wa Ngai. Nĩmavangie kũtĩĩa kũya, na andũ onthe kuma ũla mũnene kũvika ũla mũnini, meekĩa ngũa ngaamu sya makunia nĩ kana monany'e kana nĩmaumbũla naĩ syoo.

6Yĩla mũsumbĩ wa Nineva weewie ũu, nĩwookĩlile auma kĩvĩlanĩ kyake kya kĩ-ũsumbĩ, aumya ngũa yake ndaasa, eekĩa ngũa ngaamu ya ĩkunia na ekala mũunĩ.

7Nĩwanenganie ũtũmani ũtwaĩwe andũ ma Nineva ũla waĩtye atĩĩ, “Ũũ nĩ mwĩao kuma kwa mũsumbĩ na anini make. Vai mũndũ o na ũmwe waĩlĩte kũya kana kũnyw'a kĩndũ. O na indo, mbũi kana malondu iyaĩlĩte kũya kana kũnyw'a kĩndũ.

8Andũ onthe na nyamũ no nginya syĩkĩe ngũa ngaamu sya makunia. Kĩla mũndũ nĩavoye Ngai na kĩthikii na kũekana na mwĩkalĩle wake mũthũku na meko mathũku ala wĩkaa.

9Nĩvatonyeka Ngai akaalyũla mosũanĩo make na aieka kũthata na tũilea kũkw'a.”

10Yĩla Ngai woonie ũndũ andũ asu meekie, na ũndũ maekie kwĩka maũndũ mathũku, nĩwamew'ĩie tei na alea kũmamina ũndũ waĩtye.

← Chapter 2 Jump to: Chapter 4 →