Nahum 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩ ũtw'ĩo wĩ vinya ũla Ngai waneenie ĩũlũ wa Nineva. Ĩvuku yĩĩ yĩeleetye woni ũla Naũmu kuma Elikosi woonie.

2Mwĩai Ngai ndetĩkĩla kũthaithanĩw'a na ngai ingĩ, na nũĩvanĩasya. Mwĩai Ngai nũĩvanĩasya na ausũĩtwe nĩ ũthatu mwingĩ. Mwĩai Ngai nũĩvanĩasya amaitha make, na nĩwiaa ũthatu wake nũndũ wa amaitha make.

3Mwĩai Ngai ndathataa mĩtũkĩ na e ũtonyi mũnene, Mwĩai Ngai ndakalea kũkany'a ũla wĩ na ĩvĩtyo. Mwĩai Ngai nĩwũkĩlasya kĩuutani na kĩlingi vala wĩsĩlĩte, na matu nĩ kĩtoo kya maũũ make.

4Nĩwĩaĩaa ũkanga ũkanyiaa; nũtumaa mbũsĩ ing'ala. Mbasani na Kĩĩma kya Kalimeli nithelaa nyeki, na malaa ma Levanoni nĩmavovaa.

5Iĩma nitetemaa nũndũ wake, na tũlĩma tũithela. Nthĩ nĩthingithaa yĩ mbee wake, nthĩ yonthe na syonthe ila syĩ nthĩnĩ wayo.

6Nũũ ũla ũtonya kũmĩĩsya ũthatu wa Mwĩai Ngai? Nũũ ũtonya kũmĩĩsya ũthatu wake mwingĩ? Ũthatu wake nĩwĩtĩkaa ta mwaki; nĩwatũangaa mavia manene.

7Mwĩai Ngai nĩ mũseo, nĩ wĩvitho ĩvindanĩ ya mathĩna; nũsũvĩaa ala mokaa kwĩvitha kwake.

8Ĩndĩ akamina amaitha make vyũ aitũmĩa kĩw'ũ kingĩ kĩendete, akaatĩĩa amaitha make nginya o na kĩvindunĩ.

9Mwĩvangĩa Mwĩai Ngai mũvango mũthũku nĩkĩ? Akamũmina vyũ na thĩna ndũkokĩla ĩngĩ.

10Makwatanĩte vyũ ta mĩw'a mĩthungu, nĩ amile ta athengi, makavya ũndũ nyeki mbũmũ ĩvĩsaa.

11Kwaku we nthĩ ya Asuli nĩkwaumie ũmwe, ũla wavangĩie Mwĩai Ngai mũvango mũthũku, ũla ũnenganae ũtao mũthũku.

12Mwĩai Ngai easya atĩĩ, “O na vala Asuli me na vinya na nĩ aingĩ, makaminwa na kũvetangwa. O na vala inyw'ĩ andũ makwa nĩnatumie mũthĩna, ndikamũthĩny'a ĩngĩ.

13Yu nĩngũvetanga ũtonyi wa Asuli kuma vala mũĩ, na kũtilanga nyololo ila mwovetwe nasyo.”

14Mwĩai Ngai nĩwĩaĩte ĩũlũ waku we Asuli akasya atĩĩ: “Ndũkethĩwa na nzyawa sya kũendeesya ĩsyĩtwa yaku. Ngaananga mĩvw'anano yaku ya kwasũvya na ya kũseũvw'a na kyũma, ĩla yĩ ĩkalũnĩ ya ngai syenyu. Ngakwĩnzĩa mbũa yaku, nũndũ ndwĩ vata o na vanini.”

15Sisyai iĩmanĩ mwone mũndũ ũla ũetae ũvoo mũseo okĩte, mũtũmwa ũla ũtavanasya mũuo. Inyw'ĩ andũ ma Yuta, tanĩai mboka syenyu, na mũyĩanĩsya mawĩvĩto menyu. Ũla mũthũku ndakamũvithũkĩa ĩngĩ; nĩmũmine vyũ.

Jump to: Chapter 2 →