Nahum 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Mwanangi nĩwooka ũkũvithũkĩa we Nineva! Sũvĩa kũndũ kwaku kũlũmu kwa kwĩvitha! Ia andũ ma kũsyaĩĩsya nzĩanĩ! Ĩyũmbany'e! Ũmbany'a vinya waku w'onthe!

2Nũndũ Mwĩai Ngai nũkũtũnga ũnene wa Yakovo, ĩĩ, nũkũnenga andũ ma Ĩsilaeli ũnene woo ĩngĩ, o na vala ala mamavithũkĩie mayaamatiĩa kĩndũ, na nĩmaanangie mbonge sya mĩsavivũ yoo.

3Ngao sya asikalĩ ma mũmaitha nĩ ndune; asikalĩ make mekĩĩte ngũa ndune mũno. Makasya moo ma kaũ metisa ta mwaki, mavangĩtwe meyũmbanĩtye kũvithũkĩa, mbalasi syoo ithaanyũkangaa iyenda kũthi kũvithũkĩa.

4Makasya ma kaũ mesembela nzĩanĩ ta mekũũka, mesemba maisyokanĩsya nzĩanĩ nthanthau sya ndũa, meoneka maimulĩka ta mũĩ sya mwaki, methi mĩtũkĩ ta ũtisi.

5Anene ma asikalĩ nĩmekwĩtwa, nĩmeũluluutĩka maendete, maendete ũkũtanĩ wa ndũa mekalaatĩte, na kũseũvya kĩndũ kya kwĩsiĩĩa.

6Mĩvĩa ya mbũsĩ nĩyavingũwa, andũ ala me nyũmbanĩ ya kĩ-ũsumbĩ mausũĩtwe nĩ w'ĩa.

7Mũka wa mũsumbĩ nũkwatĩtwe akaumw'a ngũa, eĩtu make athũkũmi nĩmekũĩa, meng'ulya na wasya ta wa mavũĩ, na kwĩkũnanga ithũi nĩ kyeva.

8Nineva ĩilyĩ ta ndia ya kĩw'ũ mbomboku, ĩla kĩw'ũ kyayo kyumaa kĩkathi, anene meĩtana mayasya, “Ũngamai! Ũngamai!” Ĩndĩ vai ũmwe ũsiasya ĩtina.

9“Tavai silĩva! Tavai thaavu! Ũthwii wayo ndũthela! Yusĩe syĩndũ mbingĩ sya thooa mũnene!”

10Nineva ndĩ na kĩndũ! Nĩ nthei na nĩ mbomboku! Andũ nĩmakw'ĩte ngoo na mau nĩmeũkũnangana, Vinya woo nũthelete, mothyũ onthe nĩ matuku!

11Kĩĩva kĩsumo kya mĩnyambũ, ngunga ya mĩnyambũ ya mũika, vala tũswii twa mũnyambũ tũĩthĩaw'a? Vala mũnyambũ mũũme na mũnyambũ mũka, na maswii ma mũnyambũ syaendaa iteũtelemw'a.

12Mũnyambũ nĩwatembũangĩie tũswii twaw'o lĩu ũtwĩanĩe, na wakwatĩa mĩnyambũ yaw'o mĩka nyama; nĩwausũisye ngunga syaw'o na nyama sya nzyĩma, na isumo syaw'o na nyama ndembũange.

13Mwĩai Ngai Mwene Ũtonyi W'onthe easya atĩĩ, “Nyie nĩndw'ĩkĩte mũmaitha waku: Ngavĩvya makasya maku ma kaũ. Ngooaĩa asikalĩ maku kaũnĩ, na ngoosa syonthe ila watavie kuma andũnĩ ala angĩ, na wasya wa ala ũtũmĩte ndũkew'ĩka ĩngĩ.”

← Chapter 1 Jump to: Chapter 3 →