Nahum 3

Kamba (MBIVILIA ŨVOO MŨSEO)

← Chapter 2 Jump to:

1Kyeva nĩ kwaku we ndũa ya wũaani! Wusũĩte ũvũngũ na mũtavo, ndwĩsaa kũeka kũtava!

2Ĩw'a kũtoleka kwa mũsalisa, kĩuumo kya ndĩa, mbalasi isembete, wasya wa makasya ma kaũ!

3Asikalĩ malĩsĩte mbalasinĩ maivithũkĩa, ũvyũ ũũtisatisa, na ĩtumo yĩũtisatisa, andũ oae matatalĩka, mbumbu nene ya simba, mĩĩ ya andũ akw'ũ aingĩ ki, andũ metulangw'a nĩ mĩĩ ĩsu!

4Ũu w'onthe wĩkĩkĩte nũndũ wa ũmalwaya waku mwingĩ, wĩ wa kwendeesya na ũkusasya andũ na ũwe waku, we ũla watumie mbaĩ itw'ĩka ngombo kwa ũmalwaya waku, na mbaĩ sya andũ kwa ũwe waku.

5Mwĩai Ngai Mwene Ũtonyi W'onthe easya atĩĩ, “Nyie nĩndw'ĩkĩte mũmaitha waku, ngookĩlya ngũa yaku nginya mũtwe, nĩeke andũ ma nthĩ ingĩ mone wĩ mũthei, na mosumbĩ mayona nthoni syaku.

6Ngakwĩkĩsya ĩko, na kwonany'a ũndũ ngũvũthĩtye mũno wĩana, na ngĩkũtw'ĩkĩthya kĩndũ kya kũsyaĩĩw'a nĩ andũ.

7Nĩvo ĩndĩ onthe ala mekwona mesemba makũkĩe na mayasya atĩĩ, ‘Nineva nĩyanangĩtwe; nũũ ũla wĩĩa nũndũ wayo? Nĩmĩmanthĩa akiakisya kuma nakũ?’ ”

8Nĩũkũlya we Nineva, nue mũseo mbee wa Thevesi, ndũa yaakĩtwe ũtee wa Ũsĩ wa Naeli ĩla yathyũlũlũkĩtwe nĩ kĩw'ũ, ũsĩ waĩ wĩvitho wayo, na kĩw'ũ ũkũta wayo?

9Ethiovia yaĩ vinya wayo, na Misili o ta ũu, yaĩ vinya wayo ũtathela; Vutu na Limbya syaĩ atetheesya mayo!

10Ĩndĩ o na ũu wĩ o vo, ndũa ya Thevesi nĩyataviwe, andũ mayo nĩmatwaiwe nthĩ ya ũeninĩ; syana syoo nĩsyang'atanganiw'e nthĩ mwambĩlĩĩlyonĩ wa kĩla nzĩa nene ya ndũa syatilĩkanga ilungu; aũme mayo me ndaĩa nĩmakũnĩiwe kula, na andũ mayo me nguma nĩmooviwe na mĩnyololo.

11O naku we Nineva ũkalũa ta mũndũ mũmile, ũkathi kwĩvitha, ũkamantha wĩvitho ũkĩĩte amaitha maku.

12Kũndũ kwaku kũlũmu kwa kwĩvitha kũilyĩ ta mĩkũyũ, yĩna matunda ala mew'aa mbee; yĩla mathingithw'a nĩmavalũkaa kanyw'anĩ wa ũla ũkũmaya.

13Kwa sisya asikalĩ maku, mailyĩ ta aka katĩ waku. Amaitha maku nĩmavingũĩwe vyũ mĩvĩa ya nthĩ yaku; mwaki nũvĩvĩtye vyũ ivingi sya mĩvĩa ya ndũa yaku.

14Tava kĩw'ũ wĩyũmbanĩsye kũvithũkĩwa kwaku, lũlũmĩĩlya kũndũ kwaku kwa kwĩvitha; lika yũmbanĩ, anga ndaka, na ũiseũvya ndumbĩa ya kũvĩvya mavali!

15Ĩndĩ o na wĩ vau ũkavĩvw'a nĩ mwaki, ũkooaĩwa kaũnĩ. Kaũ ũkakũmina o tondũ ngie iminaa mĩmea. Ongelekai mwingĩve ta ngie, ĩĩ, ongelekai mwingĩve ta itooli!

16Nĩwingĩvĩtye atandĩthya maku kwĩ ndata sya ĩtunĩ, ĩndĩ yu nĩmathelete, o tondũ ngie itambũũkasya nthwau syasyo na kũũlũka.

17Anene ma ũsumbĩ waku mailyĩ ta itooli, athũkũmi maku mailyĩ ta kĩthuĩ kya ngie, ila syũmbĩĩaa wiionĩ mũthenya ũla kwĩ mbevo, ĩndĩ syũa yaumĩla, nĩsyũmbũũkaa ikathi; vai mũndũ ũmanyaa kũla syathi!

18Atĩĩ we mũsumbĩ wa Asuli, aĩthi maku nĩmakomete, na andũ maku ma ndaĩa nĩmekwombosya. Andũ maku nĩmanyaĩĩkĩe iĩmanĩ, na vai mũndũ ũtonya kũmombany'a.

19Vai kĩndũ kĩtonya kũvosya maũũmĩsye maku; itau syaku nĩ sya kũaa. Onthe ala mew'aa ũvoo wa kũvalũka kwaku, nĩmakũnangaa moko nĩ kũtana; nũndũ nũũ ũla waavonoka kuma ũng'endunĩ waku ũte kĩthimo?

← Chapter 2 Jump to: