Romans 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Kwoou ve ũseo mwaũ mũndũ kwĩthĩwa e Mũyuti, kana ve ũunĩko mwaũ nthĩnĩ wa nzaĩko?

2Kwa w'o ve moseo maingĩ! Mbee motũmani ma Ngai manenganiwe kwa Ayuti.

3Nata ĩndĩ ethĩwa amwe moo mayaĩ na mũĩkĩĩo? Kũlea kũĩkĩĩa kwoo nĩkũtuma Ngai atw'ĩka ti wa kũĩkĩĩwa?

4Aiee, ti w'o! Ngai aneenaa w'o kĩla ĩvinda, o na kau andũ nĩ akengani. Maandĩko Matheu nĩmawetete ĩũlũ wa Ngai makasya, “Ndeto syaku ikoosawa kwĩthĩwa sya w'o yĩla waneena, na ũkasindaa ĩkoani yĩla ũũsila.”

5Ĩndĩ ethĩwa kwĩka naĩ kwitũ kwonanasya nesa kana Ngai ekaa ũla waĩlu, vaa twĩasya ata? Nĩtũtonya kwasya kana Ngai nĩwĩkaa naĩ yĩla ũkũtũkany'a? (Vaa nĩneena ta mũndũ).

6Aiee, ũu ti w'o! Ta kethĩwa Ngai ti mwaĩlu, atonya ata kũsilĩla nthĩ?

7Andũ amwe nĩmatonya kwasya atĩĩ, “Ethĩwa kwĩka naĩ kwakwa kũkatuma andũ mona nesa kana Ngai ekaa ũla waĩlu, na kwoou mayongeleela kũmũkumya, nĩkĩ nyie ngũtw'ĩĩwa kwĩthĩwa mũvĩtany'a?”

8Ũu nĩ ta kwasya, “Twĩkei naĩ nĩ kana ũndũ ũseo wũke kuma vo,” o tondũ andũ amwe meũtũneenea naĩ mayasya atĩ tũmanyĩasya ũu. Andũ asu makasilĩlwa ũsilĩlo ũla ũmaĩlĩte.

9Twĩasya ata ĩndĩ? Ithyĩ Ayuti twĩ aseo kwĩ Andũ-ma-mbaĩ-ingĩ? Aiee, ũu ti w'o o na vanini, nũndũ Ayuti o vamwe na Andũ-ma-mbaĩ-ingĩ onthe masumbĩkĩtwe nĩ naĩ, o tondũ naweta.

10Maandĩko Matheu maĩtye kana: “Vai mũndũ o na ũmwe mũlũngalu methonĩ ma Ngai.

11Vai ũmwe wĩ na ũmanyi, kana o na ũmũmanthaa Ngai.

12Andũ onthe nĩmamũtiĩte Ngai, onthe matw'ĩkĩte ma mana. Vai mũndũ o na ũmwe wĩkaa ũla ũseo.

13Mĩnuka yoo nĩyũwaĩthasya, na nĩmĩ syoo ineenaa ũvũngũ. Mĩneenele yoo ĩilyĩ ta sumu wa nzoka.

14Vai kĩndũ kĩngĩ maneenaa eka iumo ila nthũku.

15Mekatĩĩaa mũno kũũmĩsya na kũaa andũ.

16Kw'onthe kũla mesĩla matiaa kwĩ kwanange na kwĩ mathĩna.

17Mo mayĩsĩ kwĩkala na mũuo,

18o na mai na kĩkĩo kya Ngai.”

19Nĩtwĩsĩ kana maũndũ onthe ala mĩao ĩwetete, ĩmawetete kwa andũ onthe ala me ungu wa Mĩao. Mĩao ĩwetete maũndũ asu nĩ kana vaikethĩwe ũndũ mũndũ wĩlingya naw'o, na o ta ũu yonany'e kana Ngai akasilĩla andũ onthe ĩũlũ wa nthĩ.

20Kwoou vai mũndũ ũkatw'ĩka mũlũngalu methonĩ ma Ngai, nũndũ wa kwĩthĩwa nĩwĩkaa ũndũ Mĩao ĩkwasya, nũndũ kĩla Mĩao yĩkaa nĩ kũtuma andũ mamanya naĩ nĩ myaũ.

21Ĩndĩ yu nzĩa ĩla Ngai ũtw'ĩkĩthasya andũ kwĩthĩwa alũngalu nĩvuanĩtw'e, ĩndĩ ti kumana na ĩla mĩao, o na kau Mĩao ya Mwose na momanyĩsyo ma athani niwetete ĩũlũ wayo.

22Ngai atw'ĩkĩthasya andũ kwĩthĩwa alũngalu kwa nzĩa ya kwĩthĩwa na mũĩkĩĩo nthĩnĩ wa Yesũ Klĩsto, na ũu nĩ kwa andũ onthe ala maĩkĩĩaa Klĩsto. Vai kĩvathũkany'o,

23nĩkwĩthĩwa andũ onthe nĩmeekie naĩ na maivikĩaa ũkumyo wa Ngai.

24Ĩndĩ kwa mumo ũla ũnenganĩtwe mana nĩ Ngai, onthe nĩmatw'ĩkĩthaw'a alũngalu kwĩsĩla kwa Yesũ Klĩsto ũla ũmovoasya.

25Ngai amũnenganie ethĩwe nthembo, nĩ kana kwa kĩkw'ũ kyake, atw'ĩke nzĩa ĩla andũ kwa kũmũĩkĩĩa makaekeawa naĩ syoo. Ngai eekie ũu onany'e kana ekaa ũla waĩlu, nũndũ wũmĩĩsyonĩ wake, nĩwekalile oou ta ũtene naĩ ila andũ meekĩte navu tene.

26Ngai eekie ũu nĩ kana onany'e ĩvindanĩ yĩĩ tũĩ kana we ekaa ũla ũlũngalu, na nĩwe ũtusaa mũndũ ũla ũmũĩkĩĩaa Yesũ kwĩthĩwa e mũlũngalu.

27Nĩ kyaũ ĩndĩ tũtonya kwĩkathĩĩa nũndũ wakyo? Vai kĩndũ! Nĩ kyaũ kĩũtuma tũtekathĩĩa? Nũndũ wa kwĩthĩwa na mũĩkĩĩo, na ti kwondũ wa kwĩthĩwa nĩtũkwataa mĩao.

28Nĩkwĩthĩwa nĩtũkwona kana mũndũ atw'ĩkĩthaw'a mũlũngalu kwondũ wa kũĩkĩĩa, ĩndĩ ti ũndũ wa kwĩka ũndũ mĩao ĩkwasya.

29Kana Ngai ko Ngai wa Ayuti me oka? We tyo Ngai wa Andũ-ma-mbaĩ-ingĩ? Ĩĩ, nĩ Ngai wa Andũ-ma-mbaĩ-ingĩ o namo.

30Nũndũ Ngai no ũmwe nake akatw'a Ayuti kwĩthĩwa alũngalu kwĩsĩla kũĩkĩĩanĩ kwoo, na o ta ũu aitw'a Andũ-ma-mbaĩ-ingĩ alũngalu kwondũ wa mũĩkĩĩo woo.

31Nĩkũlya, kũu nĩ kwasya nĩtũtw'ĩkĩthye ĩla Mĩao kwĩthĩwa ta ĩte wĩa? Aiee! Ũu ti w'o. Vandũ va ũu, twĩĩka kũmĩlũlũmĩĩlya.

← Chapter 2 Jump to: Chapter 4 →