Ruth 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Naũmi aĩ na mũndũ wa mũsyĩ wa mũũme wake Elimeleki; mũndũ ũsu eetawa Mboasi, na aĩ mũndũ mũthwii wĩ nguma.

2Mũthenya ũmwe Lũthi nĩwamwĩie Naũmi atĩĩ, “Eka nĩthi mũũndanĩ ngakolanasye iia sya mbaale ila syĩthĩawa itiĩtwe, nĩ ĩtina wa mũndũ ũla ũkũmbĩtĩkĩlya.” Naũmi amũsũngĩa amwĩa atĩĩ, “Enda ũkeke ũu mwĩĩtu wakwa.”

3Kwoou Lũthi nĩwaumaalile athi mĩũndanĩ, na auma athũkũmi ĩtina osanĩtye iia ila maendaa maitia. Mũũnda ũla Lũthi waendie waĩ wa Mboasi, ũla waĩ wa mũsyĩ wa Elimeleki.

4Ĩtina Mboasi nĩwookie kuma Mbetheleemu na akethya athũkũmi make kwa kũmea atĩĩ, “Mwĩai Ngai nĩethĩwe vamwe nenyu.” Nĩmamũsũngĩie mamwĩa, “Mwĩai Ngai nĩakũathime.”

5Nĩvo ĩndĩ Mboasi wakũlilye mũndũ ũla waũngamĩĩte athũkũmi ala makethaa atĩĩ, “Mũndũ mũka ũya wa mũika nũũ?”

6Mũndũ ũsu amũsũngĩa amwĩa atĩĩ, “Nĩ ũla mũndũ mũka Mũmoavi ũnookanisye na Naũmi kuma Moavi.

7Angũlilye nĩmwĩtĩkĩlye athi aumĩte andũ ala meũketha ĩtina, osany'e na kũmbany'a iia ila iendaa itiĩtwe. Atindie vaa kuma kĩoko tene kũvika yu athũkũmĩte ate kũthũmũa o na vanini.”

8Nĩvo ĩndĩ Mboasi weeie Lũthi atĩĩ, “Mbĩthukĩĩsye mwĩĩtu wakwa, ndũkathi kwosany'a iia mũũndanĩ ũngĩ kana kuma vaa, ĩkala vakuvĩ na eĩtu athũkũmi makwa,

9na ũithi ũmaumĩte ĩtina kũla mamina kũmbany'a kĩla kyakethwa nĩ aũme. Nĩnakany'a anake aa maikaũthĩny'e. Weew'a waũni endaa ũkanyw'a kĩw'ũ mĩtũnginĩ ĩla ĩutĩĩwe nĩ anake asu.”

10Lũthi nĩwakumanie atina nthĩ na ũthyũ na akũlya Mboasi atĩĩ, “Nĩkĩ nyie noona ũseo methonĩ maku? Wambĩw'ĩa tei nĩkĩ na nyie nĩ mũndũ wa nthĩ ĩngĩ?”

11Mboasi nĩwamũsũngĩie amwĩa atĩĩ, “Nyie nĩndavĩtw'e maũndũ onthe ala ũmwĩkĩte inyia wa mũũme waku, kuma mũũme waku akw'a; ũndũ watiie asyai maku na nthĩ ĩla yenyu na wooka kwĩkalany'a na andũ ũtamesĩ o na kuma tene.

12Mwĩai Ngai nĩakũĩve nũndũ wa kĩla wĩkĩte. Mwĩai Ngai wa Ĩsilaeli ũla wũkĩte kwĩvitha nthwaunĩ syake nĩakũnenge ĩtuvi yĩanĩu.”

13Nĩvo ĩndĩ Lũthi weeie Mboasi atĩĩ, “Mũnene, nĩwambĩw'ĩa ĩnee ĩnene mũno, nĩkwĩthĩwa nĩwangiakisya na waneena nakwa wĩ mũuu, o na kau ndi ũmwe wa eĩtu athũkũmi maku.”

14Ĩvinda ya kũya, Mboasi nĩwathokisye Lũthi amwĩa atĩĩ, “Ũka vaa na ũyosa kĩlungu kya mũkate ũkĩvokethye ndivainĩ.” Lũthi nĩwaendie ekala nthĩ vakuvĩ na andũ ala makethaa, na Mboasi amũnengeleelya lĩu wa mbaale ũla waĩ mũkaange, nake aya avũna na atialya.

15Yĩla Lũthi wasyokie mũũndanĩ akaendee kũkolany'a iia, Mboasi nĩweeaĩie aũme ala makethaa amea atĩĩ, “Mũekei akolany'e iia o na kũla mwiĩte syove na mũikamũkũlye ũndũ.

16O ta ũu, mumĩasyei iia imwe syovenĩ ila mũkethete mũkamũtiĩa okolany'e.”

17Kwoou Lũthi nĩwaendeeie kũkolany'a iia mũũndanĩ ũsu nginya kwavika wĩoo. Nĩvo ĩndĩ wavũie iia isu syauma mbaale mbingĩ ĩtonya kusũa ta ĩleve yĩmwe.

18Nĩwakuie ngetha ĩsu asyoka nayo ndũanĩ na oony'a inyia wa mũũme ũndũ yĩana. O ta ũu nĩwaumisye lĩu ũla watialĩtye ĩtina wa aya na kũvũna, na amũnenga.

19Naũmi nĩwamũkũlilye atĩĩ, “Ũkolanilye mbaale ĩno yonthe va? Wĩĩ mũũndanĩ waũ? Ngai nĩ aathime mũndũ ũsu ũkũthokisye nesa ũu.” Kwoou Lũthi nĩwatavisye Naũmi vala ũkũtethasya wĩa amwĩa, “Ũmũnthĩ nĩtethasya wĩa kwa mũndũ wĩtawa Mboasi.”

20Naũmi nĩwamwĩie atĩĩ, “Mwĩai Ngai ũla ũtolawa nĩ ũtianĩo wake kwa ala me thayũ na ala akw'ũ nĩ aathime Mboasi mũno.” Naũmi nĩwasyokie amwĩa, “Mũndũ ũsu nũileny'e ũndũ naitũ, na nĩ ũmwe katĩ wa andũ ala maĩlĩte kũtũsũvĩa.”

21Lũthi nĩwasyokie eea Naũmi atĩĩ, “O na ambĩie nĩendee kwĩkala vakuvĩ na athũkũmi make kũvika ngetha ĩthele.”

22Naũmi nĩwamwĩie atĩĩ, “Mwĩĩtu wakwa, ũndũ ũũ wa kũatĩanĩaa na eĩtu athũkũmi make nĩ ũndũ mũseo mũno, nũndũ nũtonya kũthi ũkathĩnĩw'a mũũndanĩ ũngĩ.”

23Kwoou Lũthi nĩwekalaa vakuvĩ na eĩtu athũkũmi ma Mboasi akĩkolany'a iia nginya mbaale na nganũ syakethwa syathela. Ĩvindanĩ yĩu yonthe ekalaa na inyia wa mũũme.

← Chapter 1 Jump to: Chapter 3 →