Ruth 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Mũthenya ũmwe Naũmi nĩweeie Lũthi atĩĩ, “No nginya ngũmanthie mũũme nĩ kana wĩthĩwe na mũsyĩ waku mwene.

2Tyo ũũlilikana kana Mboasi ũla ũũtethasya wĩa vakuvĩ na athũkũmi make nĩ wa mũsyĩ witũ? Ĩthukĩĩsye ngũtavye, ũtukũ ũũ eĩthĩwa aiũlũkya mbaale kĩvũĩonĩ.

3Kwoou yu thamba, wĩvake mauta na ũyĩkĩa ngũa syaku ila nzeo vyũ. Wamina ũu enda kĩvũĩonĩ vala Mboasi ũkũũlũkĩlya mbaale, na ndũketĩkĩle amanye kana wĩ vau nginya amine kũya lĩu na kũnyw'a ndivai.

4Syaĩĩsya wone vala ũkũkoma, na akoma too ũithi ũkĩlye ngũa ũmũvue maũũ na ũikoma vakuvĩ namo. Nũkũũtavya ũndũ ũkwĩka.”

5Lũthi nĩwamũsũngĩie amwĩa atĩĩ, “Nĩngwĩka ũu w'onthe wandavya.”

6Kwoou Lũthi nĩwaendie kĩvũĩonĩ na eeka ũndũ inyia wa mũũme wamũtavisye.

7Mboasi amina kũya na kũnyw'a, ngoo yake nĩyatanie. Nĩwookĩlile athi akoma vala vaĩ kĩvumbu kya mbaale. Lũthi nĩwaendie kavola, ookĩlya ngũa na akomela vakuvĩ na maũũ ma Mboasi.

8Ũtukũ katĩ Mboasi nĩwathũlũmũkile na aseng'a eethĩa mũndũ mũka akomete vakuvĩ na maũũ make.

9Nĩwamũkũlilye atĩĩ, “Nue ũũ?” Mũndũ mũka ũsu amũsũngĩa, “Mũnene wakwa ninyie Lũthi. Tambũũkya mũthya wa ngũa yaku ũmbwĩke, nĩkwĩthĩwa we wĩ mũndũ wa mũsyĩ ũla waĩlĩte kũnzũvĩa.”

10Mboasi nĩweeie Lũthi atĩĩ, “Mwĩai Ngai nĩ akũathime. Ndaĩa ĩno ũkwonany'a mũsyĩnĩ witũ nĩ nene kũthonoka ĩla woonisye inyia wa mũemeu, nĩkwĩthĩwa wĩĩ ũtonya kũmantha mwanake mũthwii kana ngya ĩndĩ ndũneka ũu.

11Kwoou we Lũthi ndũkethĩwe na nzika, nĩngwĩka ũndũ w'onthe ũla ũũngũlya ngwĩke, nĩkwĩthĩwa andũ onthe ma ndũa ĩno nĩmesĩ kana we wĩ mũndũ mũka mũseo.

12Kwa w'o nyie nĩ mũndũ wa mũsyĩ na nĩnaĩlĩtwe nĩ ũkũsũvĩa, ĩndĩ ve mũndũ ũngĩ ũla mũthengeanĩe nake mũno kwĩ inyie.

13Kwoou ĩkala vaa ũtukũ ũũ, na ũnĩ kwakya tũkamanya kana mũndũ ũsu nũkũkwosa akũsũvĩae. Eetĩkĩla kũkwosa akũsũvĩae, nũseo; alea kũkwosa, nĩngwĩvĩta kwa Mwĩai Ngai ũla wĩ thayũ kana nĩngwosa mwanya ũsu wa mũndũ wa mũsyĩ ngũsũvĩae. Yu koma nginya kwakya.”

14Kwoou Lũthi nĩwakomie vakuvĩ na maũũ ma Mboasi nginya kĩoko, ĩndĩ nĩwaamũkie kũtanamba kũkya nesa. Mboasi nĩwamwĩie atĩĩ, “Ndũketĩkĩle mũndũ amanye kana ve mũndũ mũka wũkie kĩvũĩonĩ.”

15Nĩwasyokie amwĩa, “Ete ngũa ĩsu yaku wĩkĩĩte na ũimĩtambũũkya.” Lũthi nĩweekie ũu na Mboasi atavĩĩa mbakũli thanthatũ sya mbaale na amwaĩkya. Nĩvo ĩndĩ Lũthi wasyokie ndũanĩ.

16Avika nyũmba Naũmi nĩwamũkũlilye atĩĩ, “Maũndũ meeilyĩ ata mwĩĩtu wakwa?” Lũthi nĩwatavisye Naũmi maũndũ onthe ala Mboasi ũmwĩkie.

17Nĩwasyokie amwĩa, “Mboasi ambĩkĩĩie mbaale ĩno yonthe ngũetee, nũndũ aisye ndyaĩlĩte ũkũsyokea na moko mathei.”

18Nĩvo ĩndĩ Naũmi wamwĩie atĩĩ, “Kweeteela mwĩĩtu wakwa, nũkwona kĩla kĩkwĩkĩka. Mũndũ ũsu ndethũmũa ũmũnthĩ nginya atie ũndũ ũsu waumya mũthya.”

← Chapter 2 Jump to: Chapter 4 →