Ruth 4

Kamba (MBIVILIA ŨVOO MŨSEO)

← Chapter 3 Jump to:

1Mboasi nĩwaendie mũvĩanĩ wa ndũa vala andũ moombanĩaa, na ekala nthĩ vo. Nĩvo ĩndĩ ũla mũndũ wa mũsyĩ wa Elimeleki, ũla Mboasi wawetaa wavĩtĩle vau. Mboasi nĩwamwĩtie amwĩa atĩĩ, “Ĩsĩla vaa mũnyanyawa; ĩkala nthĩ.” Mũndũ ũsu nĩwaendie vala ve Mboasi na ekala nthĩ.

2Mboasi nĩweetie atumĩa ĩkũmi ma ndũa ĩsu, na amakũlya o namo mekale nthĩ vau, na mekala.

3Nĩvo ĩndĩ weeie ũla mũndũ wa mũsyĩ atĩĩ, “Naũmi ũla ũnasyokie kuma nthĩ ya Moavi, nũkwenda kũthoosya mũũnda ũla waĩ wa mwana-a-asa waitũ Elimeleki.

4Kwoou nonie nĩ ũseo ngũmanyĩthye ũvoo ũsu, na ngĩũkũlya ũthooe mũũnda ũsu andũ aa mailyĩ vaa masyaĩĩsye, na atumĩa ma mbaĩ yaitũ masyaĩĩsye. Ethĩwa nũkwenda kũthooa, thooa yu; ethĩwa ndũkwenda kũthooa ndavye nĩthooe, nũndũ nue wĩna mwanya wa mbee wa kũũthooa, na ĩndĩ ndyũka ĩtina waku.” Mũndũ ũsu asya, “Nĩngũũthooa.”

5Nĩvo ĩndĩ Mboasi wamwĩie atĩĩ, “Nũseo, ĩndĩ ethĩwa nũũthooa mũũnda ũsu kuma kũla kwĩ Naũmi, no nginya ũtwae Lũthi ũla Mũmoavi, na o ta ũu ũisyaĩa mũũme ũla wakwie syana, nĩ kana mũũnda ũsu wĩkale wĩ wa mũsyĩ ũsu.”

6Mũndũ ũsu amũsũngĩa amwĩa atĩĩ, “Ethĩwa vailyĩ ũu nyie ndiũthooa, nĩkwĩthĩwa nĩngwasya syĩndũ ila nĩ nasyo. Kwoou we thooa mũũnda ũsu vandũ vakwa, nũndũ nyie ndikwenda kũũthooa.”

7Kwĩanana na kĩthĩo kya Ĩsilaeli ĩvindanĩ yĩu, andũ maithooana kĩndũ kana kũkũana, ũmwe aumasya kĩatũ akanenga ũla ũngĩ, kwonany'a kana ũndũ ũsu nĩweetĩkĩlanw'a.

8Kwoou yĩla mũndũ ũsu weeie Mboasi athooe mũũnda, nĩwaumisye kĩatũ amũnenga.

9Nĩvo ĩndĩ Mboasi watavisye atumĩa, na andũ ala angĩ maĩ vau amea atĩĩ, “Ũmũnthĩ inyw'onthe mwĩ ngũsĩ, kana nĩnathooa kuma kwa Naũmi syĩndũ syonthe ila syaĩ sya Elimeleki, Kilioni na Maloni.

10O ta ũu, nĩnamwosa Lũthi ũla Mũmoavi watiiwe nĩ Maloni akw'a, atw'ĩke kĩveti kyakwa, nĩ kana syĩndũ isu sya mũndũ ũsu wakwie iikae, na ĩsyĩtwa yake yĩyũla katĩ wa andũ ma mũsyĩ wake, na ma ndũa ĩno watwĩe. Inyw'ĩ mwĩ ngũsĩ ũndũnĩ ũũ ũmũnthĩ.”

11Atumĩa na andũ onthe ala maĩ vau voombanĩawa nĩmaisye atĩĩ, “Ĩĩ, twĩ ngũsĩ. Mwĩai Ngai nĩ aathime mũndũ mũka ũsu ũũtwaa, ethĩwe ta Laeli na Lea ala masyaĩe Yakovo syana mbingĩ, naku ũitw'ĩka mũthwii mũnene mũsyĩnĩ wa Aevilathi, na mũndũ wĩ nguma ndũanĩ ya Mbetheleemu.

12O ta ũu kumana na syana ila Mwĩai Ngai wĩkũnenga kwĩsĩla kwa mũndũ mũka ũũ, mũsyĩ waku wĩĩthĩwa ũilyĩ ta ũla wa Velesi mwana wa Yuta, ũla wasyaiwe nĩ Tamalĩ.”

13Mboasi nĩwoosie Lũthi atw'ĩka mũka wake. Mwĩai Ngai nĩwamũathimie Lũthi aitava na asyaa kavĩsĩ.

14Aka ma kũu nĩmeeie Naũmi atĩĩ, “Mwĩai Ngai nĩakathwe nũndũ ũmũnthĩ nĩwakũnenga mwĩsũkũũu wa mũndũ-ũme akũsũvĩae. Mwana ũsu ethĩawe e nguma kĩla vandũ nthĩ ya Ĩsilaeli.

15Akatanĩthya ngoo yaku ĩngĩ na ai kũsũvĩa ũkũũnĩ waku, nĩkwĩthĩwa mũka-a-mwana waku ũla ũkwendete mũno, na ũkwĩkĩte maũndũ manene kũte ala wĩkwa nĩ ana mũonza nĩwe ũmũsyaie.”

16Nĩvo ĩndĩ Naũmi woosie mwana ũsu, amũkumbatĩlya kĩthũinĩ na ambĩĩa kũmũea.

17Aka ma vau ũtũinĩ nĩmatw'ĩĩie mwana ũsu ĩsyĩtwa mayasya atĩĩ, “Naũmi nũsyaĩwe kavĩsĩ.” Mamwĩtie Oveti. Oveti nĩwe ĩthe wa Yese, ũla nĩ ĩthe wa Ndeviti.

18Ũũ ĩndĩ nĩw'o ũatĩanĩo wa nzyawa sya Velesi: Velesi asyaie Esiloni,

19Esiloni asyaa Lamu, nake Lamu asyaa Aminatavu.

20Aminatavu asyaie Nasoni, Nasoni asyaa Salimoni,

21nake Salimoni asyaa Mboasi. Mboasi asyaie Oveti,

22Oveti asyaa Yese, nake Yese asyaa Ndeviti.

← Chapter 3 Jump to: