Acts 2

kumaoni

1यहूदीन को पिन्तेकुस्त को त्यारो को दिन आछ, त सब विश्वासी लोग एक जाग में जाम छ्या।

2तब अचानक आकाश भटे तेज आँधी की जसी आवाज भैछ, और उले पुरो घर जाँ उन बैठिना का छ्या, गूँजीग्यो।

3तब उनार सामुनि आगा का इसा लपटून प्रगट भ्यान जिनोरो आकार जिबाड़ान जसो छ्यो, जो अलग होभेरन उनूनमें भटे हरेक जन का मलिमें आछ।

4और उन सब पवित्र आत्मा ले भरि ग्या, और जसी काबलियत पवित्र आत्माले उनून दीछ उक अनुसार अलग-अलग भाषान में बोलनून लाग्यान।

5उ बखत, परमेश्वरो को डर मान्या वाला कई यहूदी पर्यटक लोग जो कि हरेक देश भटे त्यार मनून खिन यरूशलम शैहर में आईना का छ्या।

6जब उनून कई भाषान में आवाज सुणाई दीछ, तो पर्यटक की भौत भीड़ लाग गै और उन हैरान हो ग्या, क्याखिनकि हरेक अपून-अपून भाष में विश्वासी बोलून सुणून मरेछ्या।

7और उन सब हैरान हो भेरन कुन लाग्यान, “देखा, यो जो बोलून मर्यान क्या इन सब गलील प्रदेशा का रूनवाला लोग न्हैतिनी?

8तो यो कि हुन मर्योछ, जो हमून में भटे हरेक इनून अपूनी-अपूनी मातृ-भाष में बात करून सुणू मर्या?

9हमून में भटे कुछ लोग पारथी इलाका भटे छा, कुछ मेदी, और कुछ एलामी, मेसोपोटामिया यहूदिया, कप्पदूकिया, पुन्तुस, आसिया प्रदेश,

10और कुछ लोग फ्रूगिया और पंफूलिया प्रदेश भटे, और कुछ मिस्र और लिबियाका देशाका इलाक भटे छन जो कुरेन शैहरा का आश-पास छन, और रोम देश भटे आईना का पर्यटक।

11उन यहूदी और गैर-यहूदी जिनूनले यहूदी धर्म अपना हाल छ्यो, क्रेती टापू का लोग और अरब देशा का लोग ले छन, लेकिन अपूनी-अपूनी भाषा में उनूनथैं परमेश्वरा का ठूला-ठूला कामून का बारिमें सुणून मर्यान।”

12और उन सब हैरान होभेरन उलझन में पड़ ग्या और एक दुसरथैं कुन लाग्यान, “यो कि हुन मर्योछ?”

13लेकिन कुछ लोगून ले मजाक उड़ाभेरन क्योछ, “उन त शराबाक नशा में चूर है र्यान।”

14पतरस उन इग्यारा प्रेरितून का दगाड़ ठाड़ भ्योछ और जोरले कुन लागछ्य, तुम जो यहूदी छा, और यरूशलम शैहरा का रूनवाला छा, और मेरि बातुन ध्यान ले सुणा मैं तुमून बतूछो की इनोरो कि मतलब छै।

15तुमून में कुछ लोगून लागछो कि हम नशा में छा, लेकिन हम नशा में नाहातिन, क्याखिनकि ऐल त रात्तै का नौ बाज र्यान।

16लेकिन जो हमार दगाड़ होर्योछ यो उ बात छै जो परमेश्वरो का तरफ भटे संदेश दिनवालो योएल का द्वारा पवित्रशास्त्र में कईना छै:

17परमेश्वर कुंछो, “आखिरी दिनून में इसो होलो, कि मैं अपूनी आत्मा सब लोगून दयूंलो, और तुमार च्याला-चेलि भविष्यवाणी करला, और तुमार जवान दर्शन, और बुढ़ा-बुजुर्ग स्यून देखाला।

18उन दिनून में, मैं अपून दास और दासीन में अपूनो आत्मा द्यूलो, और उन भविष्यवाणी कराला।

19और मैं आकाश में अद्धभुत काम और उक तलि धरती में चिन दिखूलो, मतलब खून और आगो और धुआँको बादल दिखूलो।

20प्रभु को न्याय को दिन उन है पैलि सूरज अन्यारो हो जालो और चाँद खून जस लाल हो जालो। उ दिन महान और तेजस्वी दिन होलो।

21और जो कोई प्रभुको नाम ल्यलो, उई उद्धार पालो।”

22हे इस्राएल देशा का रूनवालो, यो बातुन सुणा, कि नासरत गौं को यीशु एक इसो आदिमी छ्यो, जैस परमेश्वरा का तरफ भटे हुना को प्रमाण उन सामर्थ का कामून और चमत्कारा का कामून और चिन्नूनले प्रगट छै, जो परमेश्वर ले तुमार बीच में उक द्वारा दिखायान जैस तुम खुद जाणछा कि यो सच्ची छै।

23उ परमेश्वरा का द्वारा पैलि भटे बनाईना की योजनाक अनुसार, उ तुमार हात पकड़ाई ग्यो और तुमून ले ऊस बुर लोगून की मद्दत ले कीलून ले ठोकभेरन सूली में लटका भेरन मार दीछ।

24लेकिन परमेश्वरे ले ऊस मौत का दर्द भटे छुड़ाभेरन मरिनान में भटे ज्यून कर दीछ, क्याखिनकि उ बिल्कुल मुशकील छ्यो कि मौत ऊस अपून बंधन में राँख सको।

25क्याखिनकि राजा दाऊद मसीह का बारिमें लिखछो, मैं प्रभु स हमेशा अपून सामुनि देखनै रयूँ, क्याखिनकि उ म्यारा दैन तरफ छै, मैं उन लोगून है नी डरूलो जो मैंस नुकशान पुजून चाँनान।

26येक कारण मैं खुश छूँ, और खुश हो भेरन बोलछूँ। क्याखिनकि परमेश्वर भटे मैंस एक नय्या आश मिलछी।

27क्याखिनकि तैं मैंस मरिना को नी रून देले। और नै अपून पवित्र जन की लाश स सड़ून देले। और म्यार प्राणस अधलोक में नी छोड़ले।

28तैले मैंस जीवनो को बाँटो बताछ; तैं मैंस अपून दर्शन का द्वारा खुशिले भर देले।

29“हे भाईयों, मैं उ कुलपिता दाऊदाका बारिमें तुमूनथैं हिम्मतले यो कै सकछूँ, कि उ मरिग्यो और उकी लाश कबर में ले राँखि गै, और उ कबर आज ले वाँई छै।”

30उ परमेश्वरो को संदेश देने वाला छ्यो, उ जाणछ्यो कि परमेश्वरे ले कसम खाभेरन उक दगाड़ वादा करछ्य, “मैं त्यारा वंश में भटे एक आदिमी स त्यारा राजगद्दी में बैठूलो।”

31उले भविष्य में परमेश्वरे की करून जानमर्योछ, और यो देखिभेरन मसीह का ज्यून हुना का बारिमें यो भविष्यवाणी करछ्य, कि नै त ऊस मरीना को रून दीछ, और नै उकी लाश सड़ून पाछ।

32योई यीशु स परमेश्वरे ले ज्यून करछ्य, जैक हम सब गवाह छा।

33अब उ स्वर्ग में परमेश्वरा का दैन हाता का तरफ सबून है ऊँचा जाग में बैठिनाका छै। पिता परमेश्वरे ले जसो वादा करिना को छ्यो, ऊस पवित्र आत्मा दीछ, और उले पवित्र आत्मा हमून दीछ। जो आज तुम देखछा और सुणछा।

34क्याखिनकि राजा दाऊद यीशु मसीह का नियाती शरीर सहित स्वर्ग में नै उठाई ग्यो; लेकिन उ खुद कुंछो, “प्रभु परमेश्वरे ले म्यारा प्रभु थैं क्योछ, म्यारा दैन तरफ बैठ,

35जब तक मैं त्यारा बैरिन दीन करूँलो, उनून त्यारा खुटान की चौका नियाती नै कर दयू।”

36येक कारण इस्राएल देशा का सब लोगून यो बात स जरूर जाण लीन कि परमेश्वरे ले उई यीशुस जैस तुमूले सूली में लटकाछ, ऊस प्रभु और मसीह ले ठैहराछ।

37जब उन लोगूनले यो बात सुणछ्य, तब उनार मन भौत दुखी भ्यान। और उन पतरस और दुसारा प्रेरितून थैं पुछून लाग्यान, “हे विश्वासी भाईयो, हम कि करनू?”

38तब पतरसले उनून जबाब दीछ, “तुम लोग पश्चताप करा। तुमून में भटे हरेक आदिमी अपून-अपून पापून की माफी खिन यीशु मसीह का नामले बपतिस्मा ली। इसकैं तुम पवित्र आत्मा को बरदान मिलोलो।

39यो वादा तुम, तुमेरि और सन्तानून, और उन सब दूर-दूरा का लोगून खिन ले छै जिनून प्रभु हमार परमेश्वर अपून पास बुलाला।”

40पतरसले भौत और बातुन में गवाही दी-दीभेरन उनूनथैं बिनती करछ्य, “कि अपून आपस इन बुर लोगून भटे बचा।”

41जो केले पतरस ले क्योछ, उनूनले प्रभु में विश्वास करछ्य और बपतिस्मा लीछ; और उ दिना तीन हजार लोग लगभग विश्वासीन का झुण्ड में मिल ग्या।

42और उन प्रेरितून थैं शिक्षा पान में और संगति करून में और प्रभु भोज में, और विश्वासी लोग एक दगाड़ खाँछ्या, और आपस में मिलभेरन प्रार्थना करछ्या।

43और प्रेरितून का द्वारा भौत अद्धभुत काम और चिन्न हुनै र्यान, और यरूशलम शैहरा का सब लोगून में डर छा ग्यो।

44सब विश्वासी आपस मिलछ्या, और जो केले उनार पास छ्यो ऊस उन आपस में बाँड़ छ्या।

45और उन अपूनी सम्पत्ति और समान स बेचभेरन जस उनेरि जरूरत हुछी, ऊस उनूनमें बाँड़ दीछ्या।

46और उन रोज मन्दिर में जाम हुछ्या। और उन घर-घर में प्रभु भोज लीभेरन यीशुक बलिदान याद छ्या।

47और उन परमेश्वरेकि अराधना करछ्या, और सब लोग उनून देखिभेरन खुश छ्या और जो उद्धार पा जाँछ्या, उनून प्रभु हर रोज उनूनमें मिला दी छ्यो।

← Chapter 1 Jump to: Chapter 3 →