Acts 20

kumaoni

← Chapter 19 Jump to: Chapter 21 →

1यो हाल्ला-गुल्ला खतम हुना क बाद पौलुसले सब विश्वासीन बुलाभेरन उनेरि हिम्मत बढ़ाछ। फिर उनूनथैं विदा लीभेरन मकिदुनिया प्रदेश खिन न्हैग्यो।

2और फिर उले पुर प्रदेश को दौर करछ्य, और उपदेश दी-दीभेरन विश्वासी लोगून हिम्मत दीनै, उ यूनान देश पुजछ्य।

3और वाँ तीन मैंन बितूना का बाद उ समुन्द्री जहाज ले सीरिया देश जानवालो छ्यो, पर जब ऊस यो पत्तो चलछ्य, कि थ्वाड़ा यहूदी ऊस सफरका बीच में मारना की योजना बनून मर्यान, येक कारण उले मकिदुनिया क प्रदेश भटे सीरिया देश जाना को फैसला करछ्य।

4और यो सफर में बिरीया प्रदेशो को रून वालो पुरूर्स को च्योलो सोपत्रुस, थिस्सलुनी की नगरो को रून वालो अरिस्तर्खुस और सिकुन्दुस, दिरबे को नगरो को गयुस, तीमुथियुस और आसिया प्रदेश को तुखिकुस और त्रुफिमुस उक दगाड़ सफर करून मरैछ्या।

5उन लोग जाभेरन त्रोआस शैहर में हमोरो इन्तजार करून मर्यान।

6तब हम फसह का त्याराक बाद फिलिप्पी नगर जो मकिदुनिया प्रदेश में छै, पानि का झीला का बाट अपून सफर शुरू करछ्य और पाँच दिनक बाद हम त्रोआस शैहर में पुजियाँ और अपून दगड़ियान थैं मिल्या। वाँ हम सात दिन तलक रया।

7हफ्ताका पैल दिन हम प्रभु भोज खान खिन जाम भयाँ। क्याखिनकि पौलुस दुसारा दिन जानवालो छ्यो, येक कारण पौलुस अधरात तलक वाँ प्रचार करनै र्योछ।

8और मलिवाला कमरा में हम जाम छ्या, उमें भौत दीया जला राख छ्या।

9और वाँ यूतुखुस नामोको एक लड़का खिड़की ले बैठिनाको छ्यो। पौलुस अधरात तलक बात करून में छ्यो, उ जवान खिड़की में बैठभेरन नीन में झुमून मर्यो छ्यो। त उ नीन क कारण तीन मंजिल भटे तलि खिती ग्यो और थ्वाड़ा लोग तलखिन दौड़ियान और ऊस उठाछ और देखछै की उ मर ग्यो।

10यो देखिभेरन पौलुस तलि आछ और झुकभेरन ऊस अपून छाती में लगाछ और सबूनथैं क्योछ, “डरा जन, किलैकी यो आजि ले ज्यून छै।”

11येक बाद पौलुसले मलि जाभेरन प्रभु भोज लीछ और संगति करछ्य, और रात्तै हुन तक उनूनथैं बात करनै र्योछ। फिर उ वाँ भटे न्हैग्यो।

12और यो बीच में उ जवान स ज्यूनै घर ल्यान, यैले उन भौत खुश भ्यान।

13पौलुसले अस्सुस नगर खिन पैदल सफर करना को फैसला करछ्य। हम बाकि लोग समुन्द्री जहाज ले अघिल जुँला, और हम वाँ भटे ऊस अपून दगाड़ जहाज में लिजाना की योजना बनून मरेछ्या।

14जब पौलुस अस्सुस नगर में हमून मिलछ्य त हम ऊस अपून दगाड़ जहाज में बैठाभेरन मितुलेने नगर लीभेरन आयान।

15वाँ भटे हम जहाज ले दुसारा दिन खियुस टापू का नजिक पुजियाँ। और दुसारा दिन समुद्र पार करभेरन सामुस टापू और उक दुसारा दिन मीलेतुस में आया।

16पौलुसले इफिसुस शैहर में उतरना को फैसला करछ्य क्याखिनकि उ आसिया प्रदेश में और ज्यादा बखत नै रून चांछ्यो; इफिसुस नगर छोड़िभेरन अघिल न्हैजूंलो ताकि उ पिन्तेकुस्त का त्यारा का दिन यरूशलम शैहर में रौ।

17जब हम मीलेतुस शैहर में उतरियाँ, तब पौलुसले इफिसुस शैहरा का विश्वासीन संदेश भेजवाछ और बुज़ुर्गून वाँ बुलवाछ।

18जब उन वाँ पुजियान तब पौलुसले उनूनथैं क्योछ, “तुम जाणछा कि म्यारा आसिया प्रदेश में आईनाक पैल दिन भटे मैं तुमार दगाड़ कसीकैं रयूँ।

19मैंले परमेश्वर कि सेवा आँसू बगाभेरन भौत दीनताले दुख मुसीबत करछ्य। मैंले उन साजिश जो यहूदीन का द्वारा रचिनाकी छी ऊस सहन करछ्य।

20और जो-जो बात तुमेरि भलाई का छ्या, उनून मैंले तुमून बतून में कभै के झिझक नै करि। बल्कि मैं सब लोगून का बीच में और घर-घर जाभेरन उन बातुन का बारिमें सिखूनै रयूँ।

21मैं यहूदी और गैर-यहूदी सब लोगून का सामुनि संदेश दीनै रयूँ कि उन ले परमेश्वरा का सामुनि पश्चाताप करभरेन हमार प्रभु यीशु में विश्वास करून।

22देख अब मैं पवित्र-आत्मा द्वारा मजबूर होभेरन यरूशलम शैहर जूंलो, और मैं नै जाणनू कि वाँ म्यार दगाड़ कि-कि होलो।

23बश इदुकैं जाणछूँ कि हरेक नगर में पवित्र आत्मा मैंस खबरदार करनै रै, कि वाँ जेल और दुख म्यार इंतजार करनान।

24पर मेरि नजर में मेरि जीन्दगी की के कीमत नाहातिन, मैं बश यो काम पुर करून चाँछू जो प्रभु यीशु ले मैंस सौंप रैछ, कि जो मैंले अनुग्रह का सुसमाचार में गवाही दीन खिन प्रभु भटे मैंस मिल रैछ।

25अब देखा, मैं जाणछूँ कि तुम सब जिनून में परमेश्वरो को राज्य क प्रचार करनै रयूँ पर अब तुम मैंस दुबारा कभै नी देखला।

26येक कारण मैं आज तुमूनथैं कुछूँ कि अगर तुमून में भटे कैको लै यीशु में विश्वास नै करना का कारण ले नाश होलो, तब मैं येक जिम्मेदार न्हैतिनू।

27क्याखिनकि मैले तुमूनथैं केले नै लुकायो और तुमून पुरी बात बता रैछ जो परमेश्वर चाँछ्या की तुम जाणौ।

28तुम सब लोग अपूनो ख्याल राखा और उ दलको ले जैक देख-भाल करून खिन पवित्र आत्मा ले तुमून चुन रैछ। की तुम परमेश्वरा का विश्वासीन की सबै मण्डलीन की देख-भाल करा जैस यीशु ले खुद अपूनो खून दीभेरन छुड़ै रैछ।

29मैं जाणछूँ कि म्यार जानाक बाद तुमार बीच में झूठ्ठा शिक्षक आला और विश्वासीन नुकशान पुजाला। उन खतरनाक भेड़िया क जस होला जो भेड़ून मार डालनान।

30याँ तक ले तुमार दल में भटे लै इस लोग निकलाल जो विश्वासीन झूठ्ठी शिक्षा सिखाला, और तुमून भटे कुछ लोग उनारा पछिल हो जाला।

31येक कारण चौकून्ना रया, और यो ले याद राख्या कि मैं इन चीजून का बारिमें तीन साल तलक भौत आँसू बगाभेरन मैं तुमून रात-दिन खबरदार करनै रयूँ।

32अब मैं तुमून परमेश्वर और उक अनुग्रहा बचनून की देख-रैख में सौंपून मरयू; कि तुमून विश्वास में मजबूत कर सकछूँ, परमेश्वर तुमून उ आशीष द्योलो जैस दीना को वादा उले उन सब लोगूनथैं करछ्य जो उक द्वारा पवित्र करि ग्यान।

33मैंले कभै कैको चाँदी, सुन और कपाड़ान को लोभ नै कर्यो।

34तुम सब जाणछा कि मैंले इनी हातून ले अपून और अपून दगड़ियान की जरूरतून पुर करून खिन खुद काम करछ्य।

35मैंले हमेशा तुमार सामुनि यो उदारण राखछ्य, कि हमून खुद काम करभेरन दीन-दुखियून की मद्दत करून चैंछी, और तुमून प्रभु यीशुक यो बातुन याद राखून जरूरी छै, उले खुद कैरेछ, ‘लीन है दिन में ज्यादा निकोछ।’”

36यो सब बातुन का बाद पौलुसले घुणा टेकभेरन प्रार्थना करछ्य।

37उन सब लोग पौलुसैस गल लगाभेरन डाड़ मारून और ऊस प्रेम करन लाग्यान।

38उन सब लोग खास कर यो बात ले दुखी छ्या, जो पौलुसले कईना को छ्यो, कि तुम ऊस कभै नी देखला। फिर उन सब लोग पौलुसैस छोड़ून खिन समुन्द्री जहाज तलक ग्यान।

← Chapter 19 Jump to: Chapter 21 →