Matthew 12

kumaoni

1जब यीशु और उक शिष्य सबत दिन ग्यूका गाँड़ान भटे हो भेरन जानमरेछ्या, तब उक शिष्यून भुख लागछी और उन बालान टोड़-टोड़ भेरन खान लाग्यान।

2तब फरीसी लोगून ले यो देखिभेरन यीशु थैं क्योछ, “देख तुमार शिष्य इसो काम किलैं करनान, जो काम मूसा का नियम का अनुसार सबत दिन करून ठीक नाहातिन?”

3तब यीशु ले उनूनथैं क्योछ, “क्या तुमूनले परमेश्वरा का बचन में कभै नै पढ़यो कि जब दाऊद राजा और उक दगड़ियान भुख लागछ्य त उनूनले कि करछ्य?

4कसीकैं परमेश्वरा का घर में ग्योछ और अपून दगड़ियान का दगाड़ भेंट चढ़ाईना रोटा खयान, उन भेंट चढ़ाईना का रोटान दाऊद और उक दगड़ियान खानो नियम-कानून का अनुसार मना छ्यो। भेंट चढ़ाईना का रोटा केवल याजक खा सकछ्या।

5क्या तुमूनले मूसा का नियम में नै पढ़यो कि याजक सबता का दिन मन्दिर में सबता का दिन की विधि स तोड़ून में निर्दोष ठहरनानी?

6मैं तुमून बतून चाँछू की येको की मतलब छै, मैं तुमार पास आयूँ, और मैं मन्दिर है ले बढ़भेरन छू।

7तुम जाणछा की पवित्र-शास्त्र में इन बातुन को की मतलब छै, ‘मैं खिन, बलिदान चढ़ूना का बजाय, मैं चाछूँ की तुम दुसरान खिन दयालु बना।’ तो तुम म्यारा इन निर्दोष शिष्यून की निन्दा नी करना।

8क्याखिनकि मैं आदिमी का च्योलो, सबतो को ले प्रभु छूँ।”

9यीशु वाँ भटे निकल भेरन उनार यहूदी सभाघर में आयान।

10वाँ एक आदिमी छ्यो, जैक एक हात सुखी ग्यो छ्यो। तब उन लोगून ले यीशु में दोष लगून खिन पुछनान, “क्या सबता का दिन चंगो करून उचित छै?”

11यीशु ले उनूनथैं क्योछ, “तुमून में इसो को छै जैकी एक भेड़ हो, और उ सबता का दिन गड्डा में खितीजो, त उ ऊस पकड़ भेरन भ्यार नी निकाल?

12त एक आदिमी का मोल भेड़ भटे कतुक बढ़भेरन छै, येक कारण सबता का दिन लोगून चंगो करून ठीक छै।”

13तब यीशु ले उ सुखीना का हात वाला आदिमी थैं क्योछ, “अपून हात सिददो कर।” और उले अपूनो हात अघिल बढ़ा छै, और तब उको हात दुसारा हात की नियाती बिल्कुल ठीक है ग्यो।

14तब कुछ फरीसी लोग यहूदी सभाघर है भ्यार निकलनान और उनार दगाड़ मिलभेरन योजना बुन मरेछ्या, कि “यीशु की हत्या कसकैं करूनू?”

15यो जाणिभेरन यीशु वाँ भटे न्हैजानान, और भौत लोग उक पछिल जानान, और उले सब लोगून चंगा करछै।

16और यीशु ले उनून चेतावनी दीभेरन हुकुम दीछ, “कैसे जन बताया कि मैं परमेश्वरो को पुत्र छूँ।”

17ताकि जो परमेश्वरो को संदेश दिनवाला यशायाह द्वारा परमेश्वर ले कईना को छ्यो उ बात पुरी हो।

18“देखा यो म्येरो सेवक छै, जैस मैंले चुन रैछ; और म्येरो प्रिय, जै भटे में भौत खुश छूँ, मैं ऊस अपूनी आत्मा ले भर दीयूलो, और उ गैर-यहूदी लोगून न्याय सुसमाचार द्योलो।

19उ नै त झगाड़ा करोलो, और उ लोगून का बीच में कोई घमण्ड ले भरि भेरन भाषण नी द्योलो।

20उ कैसे ले नुकशान नी पुजालो जो एक कुचलीना का सरकंडा की नियाती कमजोर हो, जैस ले परेशानी हो उ सुलगती बत्ती का नियाति छै, जब तक उ न्याय स जीत नै बदल दे।

21और अन्यजाति उक नाम में आश राखाला।”

22तब लोग एक अन्धा-गूँगा आदिमी स जैमें भूत लागिना को छ्यो, ऊस यीशु का पास ल्यान; और यीशु ले ऊस ठीक करछ्य, और उ बोलून और देखून लागछै।

23यो देखिभेरन सब लोगून ताजुब हुछो, और कुन लागनान, कि “क्या यो आदिमी मसीहा हो सकछी जो दाऊद राजा को वंशज हो, जेको हम उनाको इन्तजार करूनमर्या।”

24लेकिन फरीसी लोगून ले यो सुणिभेरन क्योछ, “यो त भूतून का सरदार शैतान का मद्दत का बिना भूतून नै निकालनो।”

25यीशु ले उनार मने की बात जाणिभेरन उनूनथैं क्योछ, “अगर एक देशा का लोग आपस मेंई लड़ते रून, उ देश नाश हो जानान; अगर नगर या केका घर में फुट पड़ जौ, त उ नगर या घरा का लोग कसीकैं मिलभेरन रै सकनान।

26और अगर शैतान, भूतून निकालो, त उ अपूनो विरोधी हो ग्यो; त फिर उक राज्य कसकै बनिना को रै सकछो?

27अगर मैं शैतान का मद्दत ले भूतून निकाल छूँ, त तुमार च्याला कैका मद्दले भूतून निकालनान? येक कारण उई तुमोरो न्याय करोलो।

28और अगर मैं परमेश्वरे का आत्मा की मद्दत ले भूतून निकाल छूँ, तो परमेश्वरो को राज्य तुमार पास आ पुजिग्योछ।

29या कोई ले आदिमी एक ताकतवर आदिमी का घर भितर घुस भेरन उकी सम्पत्ति लुट सकछो, जब तक कोई उ है ज्यादा ताकतवर हो उई ऊस हरा और बाँद सकछो, और उक घर स लुट सकछो।

30जो म्यारा दगाड़ नाहतिन उ म्यारा बिरोध में छै, और जो म्यारा दगाड़ नै बुटलनो उ बिखरछो।

31येक कारण मैं तुमूनथैं कुछूँ, आदिमीन को सब प्रकार को पाप और परमेश्वर की बुराई जो उन करनान, माफ करि जाला, लेकिन जो कोई पवित्र आत्मा खिन बुराई करोलो, परमेश्वर उ कभै ले माफ नी कराला।

32जो कोई ले आदिमी का च्याला का बिरोध केले बात कलो, उको अपराध माफ करि जालो, लेकिन जो कोई पवित्र आत्मा का बिरोध बुरो बोलोलो, परमेश्वर उकी यो गलती नै यो लोक में और नै उना वाला युग में माफ करोलो।

33अगर एक रूख निको छै, त उक फल ले निको होलो। अगर रूख खराब होलो, त उक फल ले खराब होलो क्याखिनकि रूख अपून फलून ले पछ्याणी जाछो।

34तुम जहरीला स्यापा का ननतिना का नियाति छा, तुम बुर हो भेरन कसीकैं भलि बात कै सकछा? क्याखिनकि जो तुमार मन में भरिना को छै, उई तुमार मुँख भटे उछो।

35भलो आदिमी अपून मन का भल भण्डार भटे भलि बातुन निकालछो, और बुरो आदिमी अपून बुर भण्डार भटे बुरी बात निकालछो।

36और मैं तुमूनथैं कुंछू कि जो-जो बुरी बात आदिमी कुंनान, न्याय का दिन उन हर एक बातुन को हिसाब द्याला।

37क्याखिनकि परमेश्वर न्याय करोलो और हरेक आदिमी का द्वारा कईना का बातुन का कारण निर्दोष, या दोषी ठैहरालो।”

38तब कुछ मूसा का नियम सिखून वालान ले और फरीसी लोगून ले यीशु थैं क्योछ, “हे गुरू हम तेरो एक चमत्कारो को चिन्न देखून चानू, जेले यो पत्तो लागोलो की तैंस परमेश्वर ले भेज रैछ।”

39और यीशु ले उनून जबाब दीछ, “यो बखत का बुर और ब्यभिचारी लोगून चमत्कारा का चिनै की माँग नै करून चैछी, लेकिन परमेश्वरो को संदेश दिनवाला योना का दगाड़ जो भ्योछ, उक अलावा यो बखत का लोगून चिन नी दिखाई जालो।

40योना तीन दिन और रात माछा का पेट में रियोछ, उसीकैं मैं आदिमी को च्योलो ले तीन दिन और तीन रात धरतीका भितर रौलो।

41नीनवे का लोग न्याय का दिन यो पीढ़ीका लोगून दगाड़ उठ ठाड़ होला और उनून दोषी ठहराल, क्याखिनकि उनूनले योना का प्रचार सुणिभेरन लोगून ले अपून पापून है पश्चताप करछै; और याँ उ छै जो योना है ले ठूलो छै, लेकिन तुम पश्चताप करून है इन्कार करछा।

42और न्याय का दिन दक्षिण की रानी यो पीढ़ी लोगून का दगाड़ ठाड़ होलि और इनून दोषी ठहराली, क्याखिनकि उ राजा सुलैमान को ज्ञान सुणून खिन धरतीका छोर भटे आयीना की छी, और देखा याँ उ छै जो राजा सुलैमान है ले ठूलो छै, लेकिन तुम पश्चताप करून है इन्कार करछा।

43जब भूत उ आदिमी में भटे निकल जाछो, त उ आराम करून खिन डाणा-काँणा में भटकछी; मगर ऊस आराम नै मिलूनो।

44तब उ अपून आप थैं कुंछी, ‘मैं जै आदिमी में जूलो।’ जा भटे आरयूँ और वाँ आभेरन उ आदिमी का जीवन स उ घरा का नियाती पाछी, जैस साफ-सुथरा करि ग्योछ, पर उ खाली छ्यो।

45तब उ भूत जाभेरन अपून है बुर सात भूतून अपून दगाड़ ल्यूछी, और उको भितर जाभेरन रून लागछी, और उ आदिमी की हालत पैलि भटे और ले बुरी हो जाछी। यो बखत का बुर लोगून का दगाड़ ले इसोई होलो।”

46जब यीशु भीड़ का दगाड़ बात करून मरेछ्यो, तब उकी ईजा और भाई भ्यार ठड़ा छ्या और उक दगाड़ बात करून चाँछ्या।

47कैले यीशु थैं क्योछ, “तेरि ईजा और त्यारा भाई भ्यार ठाड़ छन, और तेरा दगाड़ बात करून चाँनान।”

48यो सुणिभेरन यीशु ले ऊस जबाब दीछ, “को छै मेरि ईजा? और को छै म्येरो भाई?”

49और अपून शिष्यून का तरफ इशारा करभेरन क्योछ, “देखा यो छन मेरि ईजा और भाई।

50किलैकी जो कोई ले म्यारा स्वर्गीय पिता इच्छा में चलछो, उई म्येरो भाई और मेरि बैनि, और मेरि ईजा छै।”

← Chapter 11 Jump to: Chapter 13 →