Matthew 24

kumaoni

1जब यीशु मन्दिर भटे निकल भेरन जानमरेछ्या, तो उक शिष्य यीशुस मन्दिर की बनावट दिखून खिन उक पास आयान।

2तब यीशु उनूनथैं क्योछ, “तुम जो यो सब कुछ देखून मरेछा! मैं तुमूनथैं सच्ची कुछूँ, यो सब ढ़ुगा का बनाईना का मकान एक दिन पुरी रीति ले नाश करि जाला।”

3जब यीशु जैतून का पहाड़ में बैठिना को छ्यो, तब यीशुका शिष्यून ले यीशु का पास आभेरन क्योछ, “गुरू जी, हमून बतो यो सब बात कब होला? तेरा वापस उनाको और संसार को अन्त को कि चिन होलो?”

4यीशु ले उनूनथैं क्योछ, “सतर्क रौ कि तुम कैका बहकाव में जन आया।

5क्याखिनकि भौतसा झूठ्ठा लोग तुमार पास म्यारा नाम ले आला, और मसीह हुना को दावा करभेरन भौत लोग बहका द्याला।

6और जब तुम लड़ै-झगड़ान की खबर सुणला, तब तुम डरिया जन, क्याखिनकि पैलि इसो हुन जरूरी छै, लेकिन उ बखत दुनिया का अन्त नी होलो।

7एक जाति को लोग दुसारा जाति का लोगून में हमला कराला, और एक राज्य दुसारा राज्य में हमला करोलो, और सब जागान में अकाल पड़ोलो और भूचाल आलो।

8लेकिन यो सब घटनान केवल मुसीबतून की शुरूवाद छै, जसीकैं एक गर्भवती स बच्चा पैद हुन है पैलि पीड़ हुछी।”

9तब उन लोग तुमोरो बिरोध करभेरन तुमून पकड़वा द्याला, और मार डालला, क्याखिनकि तुम मैंमें विश्वास करछा, येक कारण सब जातिन का लोग तुमून देखभेरन घृणा कराला।

10तब भौत लोग डरा कारण मैंमें विश्वास करून बन्द कर द्याला, और एक दुसरा स पकड़वाला, और एक दुसरा स देखिभेरन घृणा कराला।

11और भौत परमेश्वरा का संदेश दिनवाला झूठ्ठा लोग आला, और भौत लोगून ध्वाका द्याला।

12अधर्म और पाप का बढ़नाले भौत लोग एक दुसरा थैं प्रेम करून बन्द कर द्याला।

13लेकिन जो अपून जीन्दगी में आखरी तलक मैंमें विश्वास राँखाला, उको उद्धार होलो।

14और परमेश्वरो को राज्यो को यो सुसमाचार पुरा संसार में सुणायी जालो, ताकि सबै जातिन का लोगून ग्रहण करना को मौक मिल्लो, तब दुनिया को अन्त आ जालो।

15फिर यीशु ले उनूनथैं क्योछ, जो पढ़ो, उ समझ ले। येक कारण जब तुम पवित्र जाग में आदिमीन का हात की बनाईना की घृणित मुरतिन देखला, जैकी चर्चा परमेश्वरो को संदेश दिनवाला दानिय्येल कि किताब में बताईना की छै;

16तब जो यहूदिया प्रदेश में हो उन डाणान में भागी भेरन न्हैजून।

17और उ जो दिन में पाख में होला उ अपून सामान लीन खिन तलि जन उतरौ।

18और जो गाड़ान में होला उन अपून कपाड़ा लीन खिन वापस अपून घर खिन जन लौटिया।

19फिर यीशु ले क्योछ, उन स्यैनिन खिन भयानक बखत होलो, जो गर्भवती और जो नान्तिन दूध पिलून वाली होलि, उ बखत उनून खिन भाजून भौत मुश्किल होलो।

20परमेश्वर थैं प्रार्थना करा, कि तुमून जाड़ान में या सबता का दिन में भाजून नै पड़ो।

21किलैंकी उ बखत इसो भारी क्लेश होलो, जसो संसारा का शुरू भटे ले अब तक नै भ्यो और नै कभै होलो।

22अगर उन भयानक दिन कम नी करि जाना त कोई ले नी बचनो, लेकिन चुनिना लोगून का कारण उन दिन कम करि जाला।

23उ बखत लोग अगर तुमूनथैं कौलो, देखा, मसीह याँ छै! या वाँ छै। त तुम बिल्कुल उनूनमें विश्वास जन कर्या।

24क्याखिनकि झूठ्ठा मसीहा और परमेश्वरो को संदेश दिनवाला झूठ्ठा लोग आला, और उन चिन और चमत्कार दिखाला, और अगर है सको त परमेश्वरा का चुनिना का लोगून भरमा द्याला

25फिर यीशु ले क्योछ, देखा, क्याखिनकि मैंले तुमून पैलि बता हालछ्य कि संसार का अन्त में की-की होलो।

26अगर उन तुमूनथैं कुन, “कि मसीहा बिरान जागा में छै, त भ्यार जन निकल्या, देखा, उन कौला कि उ घर में छै, और उन केले कौला त उनोरो विश्वास जन कर्या।”

27क्याखिनकि द्य घड़कून बखत जसीकैं बिजिली आकाश में पूरब भटे पश्चिम तक चमकछी, उसीकैं मैं आदिमी को च्योलो ले ऊँनो होलो।

28जाँ काँई लाश होला वाँ गिद्ध जामा हुनान।

29लेकिन उन दिनून का क्लेश खतम हुना का बाद, तुरन्त बाद सूरज की रोशनी खतम हो जालि, और चन्द्रमा को उज्यालो दीन बन्द कर द्योलो, और आकाश भटे तारा भिमें खिती जाला और आकाश की शक्ति हिलाई जाला।

30तब आदिमी का च्याला का चिन आकाश में दिखाई द्योलो, और संसार का सब जातिन का लोग छाती पिटाल; और मैं आदिमी का च्याला स भौत सामर्थ और महिमा का दगाड़ आकाश भटे बादलून में उनो दिखाला।

31और तब मैं आदिमी को च्योलो तुरी का तेज आवाज का दगाड़ अपून स्वर्गदूतून भेजोलो, और उन आकाशा का चारो दिशाउन में भटे परमेश्वरा का चुनिना का लोग जाम कराला।

32फिर यीशु ले क्योछ, “कि तिमूला का रूख भटे यो बात सिखा, जब उक हांगा और पात निकलून लागनान, तब तुम जाण लीछा कि गर्मी को मौसम उनवालो छै।

33इसीकैं जब तुम इन सब बातुन हुन देखला जैका बारिमें मैंले तुमून बता रैछ, तब तुम जाणि लिया कि मैं आदिमी को च्योलो भौत जल्दी उनवालो छै, बल्कि द्वार मेंई छूँ।

34मैं तुमूनथैं सच्ची कुछूँ, कि यो पीढ़ी लोग तब तक नी मराला, जब तक यो सब बात पुरी नी हो जालि।

35यो आकाश और धरती ले नाश हो जाला, लेकिन जो बात मैंले कै राख्यान, उ हमेशा तक रौला।

36यीशु ले फिर क्योछ, कोई ले नै जाणनो उ दिन और उ बखता कब आलो, नै त स्वर्गदूत और नै त मैं आदिमी को च्योलो, यो केवल म्येरो स्वर्गीय पिता जाणछो।

37जसो नूह दिनून में भ्योछ, ऊसोई मैं आदिमी का च्याला को ले उनो होलो।

38क्याखिनकि जसीकैं जल प्रलय है पैलि का दिनून में, जब तक नूह जहाज में नै चढ़ियो, उ दिन तक लोग खान-पिन में और ब्या-बरयात करनै रियान।

39और जब तक जल प्रलय आभेरन उनून बगा नै लिग्यो, तब तक उनून के पत्तो नै चल्यो; उसीकैं मैं आदिमी का च्याला को ले उनो होलो।

40उ बखत द्वी जन गाड़ान में होला, एकेस स्वर्ग में उठा ली जालो और दुसोरो वाँई छोड़ी दी जालो।

41और द्वी स्यैनिन चक्की पिसून में होलो, एकेस स्वर्ग में उठा ली जालि और दुसरा स वाँई छोड़ी दी जालि।

42यीशु ले फिर अपून शिष्यून थैं क्योछ, किलैकी तुम नै जाणना कि तुमोरो प्रभु कै दिना आलो, येक कारण तुम जागनै रौ।

43और तुम यो बात निकीकैं समझ ली, अगर घरो को मालिकस यो मालूम हुनो कि चोर चोरी करून खिन कै बखत आलो, त उ बिजो रूनो, और अपून घर में चोरी नी हुन दीनो।

44येक कारण तुम तैय्यार रौ, क्याखिनकि उ बखता का बारिमें तुमूनले सोचीना को ले नै होलो, उई बखत आदिमी को च्योलो आ जालो।

45एक विश्वासी और दिमाकदार दास उ हुछो, जैस घरो को मालिक दुसारा दासून की निगरानी करून खिन ठैरूछो। उ ऊस ठीक बखत में खानो दिन खिन कुंछो। फिर उ खुद लम्बा सफर में न्हैजाछो।

46धन्य छै, उ दास जैस उको मालिक ऊसो काम करनै देखछो।

47मैं तुमूनथैं सच्ची कुंछूँ, उ मालिक उ दास स अपून पुरी जैजाद को अधिकारी ठहरालो।

48लेकिन अगर उ दुष्ट दास यो सोचून में रोलो कि म्यारा मालिका का उन में देर छै।

49और उ दास अपून दगड़िया दासून मारून और पीटून लागौ, और पियक्कड़ून का दगाड़ पिन-खान करौ।

50त उ दास को मालिक इसा दिन वापस आलो, जब उ उक बारिमें सोचिना को ले नै हो और इसा बखत जैस उ जाणनो ले नै हो।

51तब उ मालिक आभेरन, उ दास स कड़ी सजा द्योलो। और ऊस पापिन का दगाड़ काल कोठरी में डाल द्योलो, जा रून और दाँत किट-किटून होलो।”

← Chapter 23 Jump to: Chapter 25 →