Titus 1

kumaoni

Jump to: Chapter 2 →

1यो चिठ्ठी पौलुसाक तरफ भटे छै। मैं परमेश्वरो को दास और यीशु मसीह को प्रेरित छूँ। मैंस परमेश्वरा का चुनिना का लोगून को विश्वास मजबूत करून और उनेरि मद्दत करून खिन चुन रैछ, ताकि उन उ सच्चाई जाणभेरन इसो जीवन जियून, जैले परमेश्वर स आदर मिलछो।

2येक कारण उन परमेश्वरा का दगाड़ हमेशा खिन रून की आश करनान, क्याखिनकि परमेश्वर जो कभै झूठ नै बोलूनो, उले संसारा बनून है पैलि वादा करिना को छ्यो कि उक लोग हमेशा खिन ज्यूना रौला।

3और अब बिल्कुल ठीक बखत में परमेश्वर ले यो सुसमाचार स हमार सामुनि प्रगट करछ्य, और हम येको प्रचार सबून का बीच करनू। हमार मुक्तिदाता परमेश्वर ले यो हुकुम दीभेरन मैंस जिमेदारी दी रैछ, कि उखिन यो काम करू।

4मैं यो चिठ्ठी तीतुस खिन लिखूनमरयूँ। तैं म्यारा च्याला नियाती छै क्याखिनकि तैले मसीह में विश्वास करछै जसीकैं मैं करछूँ। मैं प्रार्थना करछूँ कि पिता परमेश्वर और हमोरो मुक्तिदाता यीशु मसीह तैंस अनुग्रह और दया, और शान्ति दीनै रून।

5मैं तुमून क्रेते टापू येक कारण छोड़ आईना को छूँ, कि तुम वाँ का कामून की पुरी ब्यवस्था करा ताकि हर नगर में म्यारा हुकुम का अनुसार इसा अगुवान चुना,

6जो निर्दोष, और अपून घरवाली का प्रति वफादार, और जिनारा बच्चाले विश्वासी हुन, और उन शरीराक इच्छान में चलूनवाला नै हुन, और ईजा-बबा को आदर करूनवाला हुन।

7क्याखिनकि अगुवान परमेश्वरा का मुन्सी हुना का कारण निर्दोष हुन चैछो; नै जिद्दी, नै क्रोधी, नै पियक्कड़, नै मारपीट करनवालो, और नै नीच कमाईको लालची हो।

8और घर में आईना का मेहमानून की इज्जत करून वालो, दुसारा लोगून खिन भलाई करून वालो, हर हालात में अपून में काबू राखून वालो, सच्चो न्याय करून वालो, धर्मी, और पवित्र जीवन जीन वालो, अपूनी इच्छान में काबू करून वालो हुन चैछो।

9ऊस यीशु मसीह का बचनून में मजबूती ले विश्वास करून चैछो जो हमूले ऊस सिखाईना को छ्यो। ताकि उ दुसरान सही शिक्षा मानून खिन हिम्मत दी सकून, और दुसरान का गलतिन ठीक कर सकून।

10मैं यो येक कारण कुछूँ, क्याखिनकि भौत लोग सही शिक्षा को बिरोध करनान, उन जो बक-बक करनान और दुसरान ध्वाका दीन सिखूनान। खास करभेरन उन यहूदीन का बारिमें जो सच्ची में विश्वासी बन ग्यान।

11इसा लोगून विश्वासीन सिखूना को हुकुम जन दीये, क्याखिनकि जब उन इन बातुन सिखूनान जो उनून सिखूनी चैछी, त उन पुर परिवारो को विश्वास नाश कर द्याल। उन इसो येक कारण करनान ताकि धन कमा सकून।

12क्रेते टापू में एक आदिमी ले जैस उन बुद्धिमान आदिमी माननान, उ कुंछो कि क्रेते का लोग हमेशा झूठ बोलनान और जानवरून की नियाती ब्‍यवहार करनान। उन आलसी और हमेशा भौत ज्यादा खानो खानान।

13और क्रेते का लोगून का बारिमें यो बात अब ले सच्ची छै। येक कारण उनून कड़ी चेतावनी दीनै रौ, ताकि उ यीशु मसीह की सच्ची शिक्षा में विश्वास करून।

14तुम यहूदीन की झूठ्ठी कथा-कहानीन और उन लोगून का हुकुमन को पालन जन कर्या, जो सच्चाई भटे भटक ग्यान।

15उन लोगून खिन जिनारा मन में बुरा बिचार नाहातिन, सब चीज नियम का अनुसार शुद्ध छन, लेकिन उन लोगून खिन जो बुरा छन जो यीशु मसीह में विश्वास नै करना, जो कुछ ले उन करनान उ ठीक नै करूना

16उन झूठ्ठी शिक्षा दीन वाला कुंनान कि हम परमेश्वर स जाणनू, लेकिन उन अपून काम ले दिखूनान कि उन जाणना। क्याखिनकि उन नफरत ले भरिना का छन और हुकुम नै मानून वाला छन और उन कोई ले भल काम करून योग्य नाहातिन।

Jump to: Chapter 2 →