Titus 3

kumaoni

← Chapter 2 Jump to:

1विश्वासी लोगून याद दिलो, कि शासकून और अधिकारीन को आदर करून, और उनेरि हुकुम माना और दुसारान खिन हरेक भल कामून खिन तैयार रौ।

2कैकी बदनामी जन कर, झगड़ालू नै हो, और शान्त आदत को हो, और सब लोगून का दगाड़ भौत दयालु बनभेरन रौ।

3क्याखिनकि हम सब विश्वास में उन है पैलि मूर्ख और परमेश्वरा का हुकमून नै मानूनवाला छ्या, और लोगून थैं भटे ध्वाका खान वाला छ्या, और हम बुरी इच्छा और संसारा का चीजून का गुलाम छ्या, जसीकैं बैर-भाव और डाह करून में जीवन जी छ्या, और लोगून थैं नफरत करछ्या, और एक दुसारा भटे बैर राख छ्या।

4लेकिन फिरले हमार मुक्तिदाता परमेश्वर ले अपूनी दया और प्रेम हम लोगून में दिखाछ,

5उनूनले हमून पापून का सजा भटे छुड़ाछ, यो हमार द्वारा करिना का भल कामून का कारण नै जो हमूले कर्यान, उले अपूनी दया का अनुसार, हमार पापून धोभेरन दूर कर्यान। और पवित्र आत्माक द्वारा हमून नय्या स्वभाव और नय्या जीवन दीछ।

6हमोरो मुक्तिदाता यीशु मसीहा ले जो उक द्वारा परमेश्वर ले पवित्र आत्मा दी रैछ, ताकि उ हमूथैं सामर्थ का काम करा सको।

7जैले हम उ अनन्त जीवन स पाना की आश राखभेरन जो परमेश्वर ले हमून अपूनी संतान का रूप दीना को वादा करछ्य। और येका बारिमें हम जाण सकनू क्याखिनकि परमेश्वर ले अपून अनुग्रह का द्वारा हमून अपून दगाड़ सही ठैहराछ।

8यो बात हर तरीका ले मानून लायक छै, जो मैंले तैंस बतायान और मैं चाछूँ कि तैं विश्वासीन इन बातूना का बारिमें मजबूती ले सिखौ। येक कारण कि जिनूनले परमेश्वर में विश्वास करछ्य, उन भल काम करून खिन अपूनो बखत दीन खिन ध्यान लगून। यो बात सबून खिन निकी और फैदा की छै।

9लेकिन बेकारा बहसून है दूर रौ। वंशावालिन की सूची में अपूनो बखत खराब जन करा, बैर-भाव और बिरोध, और उन झगड़ान है जो मूसा का नियम-कानून का बारिमें हुनान, उनून है बचभेरन रौ, क्याखिनकि उन बातुन को कोई फैदा नाहातिन और नै कैकी मद्दत कर सकछी।

10तैंस कम है कम द्वी बार उन लोगून चेतावनी दीन चैछी जो विश्वासीन की मण्डली में फुट डालनान, कि उन इसो करून बन्द करून। दुसारा बार चेतावनी दीन का बाद उनून है कोई सम्बन्ध जन राँखा।

11तैं यो पक्का जाण ले इसा लोग जो जान बुझ भेरन पाप करनान, उन जाणनान कि उन बुर काम करून मर्यान और उ ऊस लगातार करनै रूनान।

12जब मैं त्यारा पास क्रेते टापू में अरतियास और तुखिकुस विश्वासी भाईन भेजूलो, त म्यारा पास निकोपुलिस शैहर में उनाकी कोशिश करे, क्याखिनकि मैंले वाँई जाड़ान का मौसम में रूना को फैसाला करछ्य।

13जब जेनास वकील और अपुल्लोसे स अपूनी यात्रा खिन निको रियान, तैं उनेरि मद्दत खिन जैले कर सकछ्य, उनून खिन करे। यो ध्यान राखे उनून के बात की कमी नै हो।

14सिर्फ इतुकैं नै तैंस विश्वासीन सिखूनै रून चैंछो कि भल काम करून खिन लगातार मेहनत करनै रून ताकि उन लोगून की जरूरत पुरी हो सकौ। और यो विश्वासीन की मद्दत करोलो कि उन एक मक्शद का दगाड़ जीवन जी सकून।

15म्यारा दगाड़ याँ का सब विश्वासी तैंस नमस्कार करनान। वाँ क्रेते में हमार दगाड़ विश्वासीन जो हमून प्रेम करनान, उनूनले म्यारा तरफ भटे नमस्कार कये। मैं प्रार्थना करछूँ कि तुम सबून में प्रभु अनुग्रह करो।

← Chapter 2 Jump to: