Titus 2

kumaoni

← Chapter 1 Jump to: Chapter 3 →

1लेकिन तीतुस तैखिन यो ठीक छै कि तैंस विश्वासीन सिर्फ उई सिखून चैछो जो यीशु मसीह की सच्ची शिक्षा छै।

2बुढ़ा लोगून अपून आप में काबू राखून, और इसो तरीका को ब्यवहार करून ताकि लोग उनोरो आदर करून, और समझदारी ले जीन सिखौ। और उनून विश्वास में मजबूत हुन चैछो और दुसरान का दगाड़ प्रेम करून चैछो और सहन करूना की शक्ति हुन चैछी।

3उसीकैं बुढ़ी स्यैनिन को ले इसीकैं ब्यवहार करून चैछो जो हर बात में परमेश्वरो को आदर दीन वाली। और केमें दोष लगून वाली और मदिरा पिन वाली नै हुन चैछी, बल्कि निकी बात सिखून वाली हो

4ताकि उन जवान स्यैनिन खिन एक उदारण बन सकून। और यो ले सिखा सकून कि अपून घरवाला का और नान्तिनान का दगाड़ कसो प्रेम करून चैछो।

5जवान स्यैनिन अपून आप में काबू राखून वाली, और अपून घरवाला का दगाड़ वफादार रौ और अपूनो घर स सभालून वाली और अपून-अपून घरवालान का अधीन रून वाली हो, ताकि परमेश्वर बचन की निन्दा नै पौ।

6इसोई जवान आदिमीन ले समझदारी ले ब्यवहार करून खिन मजबूत करनै रौ कि उन ले अपून आप में काबू करूनवाला हुन।

7तैंस हमेशा भल काम करून चैछो, ताकि तैं दुसारा लोगून खिन उदारण बनौ। जब तैं विश्वासीन परमेश्वरा का बारिमें सिखूछै, त तैंस निका इरादा ले सिखून चैछो, जैले लोग तेरो आदर कर सकून।

8और तैंस सिखून चैछो जो सही छै, ताकि कोई ले तैमें दोष नै लागा सको, जैले त्यारा बिरोधीन शर्मिन्दा हुन क्याखिनकि उ शिक्षा में कोई बुरी बात नाहातिन, जैले कि उ त्यारा खिलाफ के कै सकून।

9अपून विश्वासीन की मण्डली में दासून सिखौ कि उन हमेशा अपून मालिकून को हुकमो को पालन करून। उनून ऊसो करून खिन जेले उनार मालिक खुश रून, और उन उनार काम का बारिमें शिकायत नै करून।

10चोरी-चालाकी जन करून; बल्कि उन साबित करून की उन हमेशा ईमानदार छन, ताकि लोग उनार निका ब्यवहार में ध्यान दीन और जो कुछ ले उन करनान उन लोगून का द्वारा हमार मुक्तिदाता परमेश्वरा का बारिमें संदेश सुणून को कारण बना।

11उन विश्वासीन इसीकैं सिखौ, किलैंकी परमेश्वर ले सब लोगून को पाप भटे उद्धार को बाटो दिखाभेरन अपूनो अनुग्रह उनूनमें करछ्य।

12यो अनुग्रह का कारण परमेश्वर हमून सिखूछो, कि हम उ स्वभाव स छोड़ून सिखा, जो परमेश्वरो को अपमान करछो और उन चीजून की इच्छा स ले छोड़ून चैंछो, जिनरी इच्छा अविश्वासी करनान। और जब कि हम यो संसार में छा त बुद्धिमानी ले और धार्मिकता का दगाड़ इसा तरीका जीवन जीया जैले परमेश्वर खुश हुछो।

13हम इसीकैं ब्यवहार करनू जब हम उ दिनो को इन्तजार करूनमर्यान, जैकी हमून आश छै, उ दीन जब यीशु मसीह, जो हमोरो महान परमेश्वर मुक्तिदाता छै, अपूनी पुरी महिमा का दगाड़ संसार में वापस आलो।

14यीशु मसीह ले अपून आपस हमून खिन सूली में बलिदान कर दीछ ताकि हमून हर प्रकार का बुराई भटे छुड़ा ले और हमून पापून भटे आजाद करभेरन अपून खिन एक इसी प्रजा बना ले जो भल काम करून खिन पुर जोश दगाड़ तैयार रौ।

15येक कारण तीतुस मैं चाछूँ कि तैं क्रेते का विश्वासीन यो बातुन सिखौ जो मैंले तैंस बताईना का छन। अपून लोगून मजबूत कर और जाँ जरूरी हो, वाँ उनूनमें सुधार कर, तैंस इसो करून में म्यारा तरफ भटे पुरो अधिकार छै, कोई ले तेरो निरादर नी कर सकोलो।

← Chapter 1 Jump to: Chapter 3 →