1 Kings 14

Kikuyu Bible (IBUKU RĨRĨA ITHERU RĨA NGAI)

← Chapter 13 Jump to: Chapter 15 →

1Na rĩrĩ, matukũ macio Abija, mũrũ wa Jeroboamu, akĩrũara.

2Nake Jeroboamu akĩĩra mũka atĩrĩ, Ũkĩra, ndagũthaitha, wĩgarũre ndũkamenyeke atĩ nĩwe mũka wa Jeroboamu, ũthiĩ Shiĩo, tondũ atĩrĩ, kũu nĩkuo Ahija mũnabii arĩ, o we ũrĩa waaririe ũhoro wakwa akiuga atĩ nĩngũtuĩka mũthamaki ’thamakagĩre andũ aya.

3Na ũthiĩ ũkuuĩte mĩgate ikũmi, na tũmĩgate tũngĩ tũhũthũ, o na kĩhembe kĩa ũũkĩ, ũkinye harĩ we; nake nĩegũkwĩra ũrĩa ũhoro wa kaana gaka ũgũtaĩka.

4Nake mũka wa Jeroboamu agĩgĩĩka o ta ũguo, agĩũkĩra agĩthiĩ Shilo, agĩkinya kwa Ahija mũciĩ. Nake Ahija agĩkorũo ndonaga, tondũ nĩorĩte maitho nĩ gũkũra.

5Nake Jehova agĩkĩĩra Ahija ũũ: Atĩrĩrĩ, mũka wa Jeroboamu nĩegũũka gũtuĩria ũhoro harĩ wee wa ũrĩa mũrũwe egũikara, nĩ ũndũ nĩ mũrũaru; nawe mwĩre ũna na ũna; nĩ ũndũ nĩkũrĩkinya atĩrĩ, atĩ hĩndĩ ĩrĩa arĩũka atonye gwaku arĩkorũo egarũrĩte agetua ta arĩ mũndũ-wa-nja ũngĩ.

6Na gũgĩtuĩka o ro ũguo, atĩ rĩrĩa Ahija aaiguire mũkinyo wa magũrũ make arĩ mũromo-inĩ agĩtonya nyũmba, akiuga atĩrĩ, Tonya, mũtumia ũyũ wa Jeroboamu; ũkwĩgarũra nĩkĩ ũgetua ta mũndũ-wa-nja ũngĩ? Nĩ ũndũ nĩ kũrekio ndeketio harĩ wee ’heetwo ũhoro wĩ kĩeha.

7Thiĩ, ũkere Jeroboamu ũũ: Atĩrĩrĩ, Jehova Ngai wa Isiraeli oigĩte atĩrĩ, O na harĩa ndagũtũũgĩririe ngĩgũthura thĩinĩ wa andũ arĩa angĩ, na ngĩgũtua mũnene wa gwathaga andũ akwa Isiraeli,

8o na ngĩtunya mbarĩ ya Daudi ũthamaki ngĩkũhe wee-rĩ, ndũrĩ watuĩka ta ũrĩa ndungata yakwa Daudi yatariĩ, o ĩo yamenyagĩrĩra maathani makwa, o na ĩkanũmĩrĩra na ngoro yayo yothe, na ĩgeka o maũndũ marĩa monagwo maagĩrĩire nĩ niĩ;

9no rĩrĩ, wee nĩwĩkĩte ũũru gũkĩra arĩa othe maarĩ mbere yaku, nĩ ũndũ nĩũthiĩte ũgethondekera ngai ingĩ, o na mĩhianano ya gũtwekio, ũkandakaria; ningĩ nĩũndeete ũkanjikia na thutha waku;

10tondũ ũcio ti-itherũ nĩngũrehithĩrie mbarĩ ya Jeroboamu ũũru, na nĩngũũraga njehererie Jeroboamu mwana o wothe wa kahĩĩ, ũrĩa ngombo, o na ũrĩa ũtarĩ ngombo gũkũ Isiraeli; nayo nyũmba ya Jeroboamu nĩ ta kũhaata ngũmĩhaatithia ĩninwo biũ, o nginya rĩrĩa ĩkaninũka, o ta ũrĩa mũndũ ahaataga mai magathira.

11Mũndũ wa Jeroboamu ũrĩa ũgakuĩra itũũra-inĩ-rĩ, akarĩĩka nĩ ngui; o na ũrĩa ũgakuĩra gĩthaka-inĩ-rĩ, akarĩĩka nĩ nyamũ cia rĩera-inĩ, nĩ gũkorũo Jehova nĩwe warĩtie ũhoro ũcio.

12Tondũ ũcio arahũka ũinũke gwaku mũciĩ; na rĩrĩ, hĩndĩ ĩrĩa magũrũ maku marĩkinya itũũra-inĩ ũkĩrĩtonya-rĩ, noguo kaana kau karĩkua.

13Nao Aisiraeli othe nĩmegũkarĩrĩra na magathike, nĩ ũndũ kau ka Jeroboamu goiki noko gegũkinyio wega mbĩrĩra-inĩ; nĩ gũkorũo thĩinĩ wako nĩkuonekire maũndũ mamwe mega makoniĩ Jehova, Ngai wa Isiraeli, thĩinĩ wa nyũmba ya Jeroboamu.

14O na ningĩ-rĩ, Jehova nĩakearahũrĩra mũthamaki wa gũthamakĩra Isiraeli, ũrĩa ũkeheria mbarĩ ya Jeroboamu, amĩnine biũ mũthenya o ro ũcio. Githĩ ũhoro ũcio o na rĩu ndũraambĩrĩrio?

15Nĩ gũkorũo Jehova nĩakahũra Aisiraeli matuĩke o ta kamũrangi karainaina ke maĩ-inĩ; na nĩakamarindũra biũ amarute bũrũri ũyũ mwega, o ũyũ aaheire maithe mao, amaharaganĩrie mũrĩmo ũrĩa wa Rũũĩ rũa Farati, nĩ gũkorũo nĩmethondekeire Maashera makĩrakaria Jehova.

16Nake nĩakarekereria Isiraeli o ro ũguo amatige, nĩ ũndũ wa mehia ma Jeroboamu, marĩa aatũire ehagia, na agatũma Isiraeli o nao mehie nĩ ũndũ wamo.

17Nake mũka wa Jeroboamu agĩkĩarahũka, agĩĩthiĩra, agĩkinya Tiriza; na gũgĩtuĩka atĩrĩ, atĩ o aakinya mũromo-inĩ wa nyũmba-rĩ, kaana gagĩkua.

18Nao Aisiraeli othe magĩgathika, na magĩkarĩrĩra, o ta ũrĩa uuge wa Jehova watariĩ ũcio aaririe na kanua ka ndungata yake Ahija ũcio mũnabii.

19Na atĩrĩrĩ, ciĩko iria ingĩ cia Jeroboamu, na ũrĩa aahũranire mbaara, o na ũrĩa aathamakire-rĩ, ũhoro wacio nĩwandĩkĩtwo ibuku-inĩ rĩa maũndũ ma ihinda rĩa athamaki a Isiraeli.

20Narĩo ihinda rĩrĩa Jeroboamu aathamakire rĩarĩ mĩaka mĩrongo ĩĩrĩ na ĩĩrĩ; nake agĩgĩkoma hamwe na maithe, nake Nadabu, mũrũwe, agĩthamaka ithenya rĩake.

21Na rĩrĩ, Rehoboamu, mũrũ wa Suleimani, nĩwe wathamakaga Juda. Na hĩndĩ ĩrĩa Rehoboamu ũcio aambĩrĩirie gũthamaka nĩaaninĩte mĩaka mĩrongo ĩna na ũmwe; nake agĩthamaka mĩaka ikũmi na mũgwanja o kũu Jerusalemu, itũũra rĩrĩa Jehova aathurĩte mĩhĩrĩga-inĩ yothe ya Isiraeli, nĩguo rĩĩtwa rĩake rĩikarage kuo; nake nyina etagwo Naama, Mũamoni.

22Nao andũ a Juda magĩĩka maũndũ marĩa monagwo marĩ moru nĩ Jehova, na magĩkĩmũthirĩkia nĩguo aigue ũiru nĩ ũndũ wa mehia mao marĩa mehirie, gũkĩra maũũru mothe marĩa maithe mao mekĩte.

23Nĩ gũkorũo o nao nĩmethondekeire matĩri ma kũndũ gũtũũgĩru, o na makehandĩra itugĩ cia kũhoyũo, o na magethondekera Maashera kĩrĩma-inĩ kĩrĩa gĩothe kĩraya, o na mũtĩ-inĩ ũrĩa wothe mũruru.

24O na ningĩ bũrũri ũcio gũkĩgĩa ũmaraya wa arũme; na arũme nao magekaga maũndũ mothe marĩa me thahu ma ndũrĩrĩ iria Jehova aaingatire ciehere mbere ya ciana cia Isiraeli.

25Na gũgĩkinya atĩrĩ, atĩ mwaka wa ĩtano ĩrĩa Rehoboamu aakorirũo athamakĩte, Shishaka mũthamaki wa Misiri akĩambata akahũrane na Jerusalemu;

26nake agĩgĩtunyana mũthithũ wa indo cia bata iria ciaigĩtwo nyũmba ya Jehova, o na wa indo cia bata cia nyũmba ya mũthamaki; agĩgĩthiĩ nacio ciothe biũ; o na agĩthiĩ na ngo ciothe cia thahabu iria Suleimani aathondekithirie.

27Nake mũthamaki, ti Rehoboamu, agĩthondekithia ngo ingĩ cia gĩcango, ithenya rĩa icio cia mbere, agĩcinengera anene a andũ arĩa maarangaga mũromo-inĩ wa nyũmba ya mũthamaki.

28Na gũgĩkinya atĩrĩ, atĩ mathiĩ mothe marĩa mũthamaki aathiaga gũtonya nyũmba ya Jehova araagĩri acio maacikuuaga, na thutha ũcio magacicokia kanyũmba karĩa gaatũũragwo nĩ arangĩri acio.

29Nacio ciĩko iria ingĩ cia Rehoboamu, o na maũndũ mothe marĩa akire-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?

30Na rĩrĩ, nĩkwagĩaga ita hĩndĩ ciothe, Rehoboamu makĩhũrana na Jeroboamu.

31Nake Rehoboamu agĩkoma hamwe na maithe, agĩthikwo o hamwe na maithe itũũra rĩa Daudi; nake nyina etagwo Naama, Mũamoni. Nake Abijamu, mũrũwe, agĩthamaka ithenya rĩake.

← Chapter 13 Jump to: Chapter 15 →