1 Kings 20 — Kikuyu Bible (IBUKU RĨRĨA ITHERU RĨA NGAI)

1Na rĩrĩ, Beni-hadadi, mũthamaki wa Suriata, agĩcokanĩrĩria mbũtũ ciake ciothe cia ita; na hagĩkĩgĩa athamaki mĩrongo ĩtatũ na erĩ me hamwe nake, o na mbarathi na ngari cia ita; nake akĩambata, akĩrigicĩria Samaria arĩtunyane, akĩhũrana narĩo.

2Nake agĩkĩrekia andũ mathiĩ kũu itũũra rĩu thĩinĩ kwĩ Ahabu, mũthamaki wa Isiraeli, makamwĩre atĩrĩ, Beni-hadadi oiga ũũ:

3Betha ciaku na thahabu ciaku nĩ ciakwa; o na atumia aku no akwa, o nacio ciana ciaku iria njega mũno wĩ nacio nĩ ciakwa.

4Nake mũthamaki wa Isiraeli agĩgĩcokia akiuga atĩrĩ, Ĩĩ, ũguo uugĩte noguo, mũthamaki ũyũ mwathi wakwa; niĩ ndĩ waku, o na indo ciothe iria ndĩ nacio no ciaku.

5Nao andũ acio maareketio magĩthiĩ kuo rĩngĩ, makiuga atĩrĩ, Ũhoro ũyũ nĩguo Beni-hadadi aarĩtie, akoiga atĩrĩ, Ti-itherũ nĩndakũrekeirie andũ ngiuga atĩrĩ, Nĩũkũ’nengera betha ciaku, na thahabu ciaku, o na atumia aku, o na ciana ciaku;

6no rĩrĩ, rũciũ nĩngakũrekeria ndungata ciakwa, ihinda o ta rĩrĩ, ciũke ciururie nyũmba yaku, o na nyũmba cia ndungata ciaku; na nĩgũgakinya atĩrĩ, atĩ kĩndũ kĩrĩa gĩothe gĩkwendeka nĩ maitho maku, nĩmagakĩoya mathiĩ nakĩo.

7Nake mũthamaki wa Isiraeli agĩgĩĩta athuri othe a bũrũri wake, akĩmera atĩrĩ, Rĩu ndamũthaitha ta barai muone ũrĩa mũndũ ũyũ acarĩtie rũũgiti; nĩ ũndũ andekeirie andũ akanjĩtia atumia akwa, na ciana ciakwa, na betha ciakwa, o na thahabu ciakwa; na icio ciothe ndimũregeire.

8Nao athuri acio othe, na andũ ake othe, makĩmwĩra atĩrĩ, Menya ũigue ũguo oigĩte, kana wĩtĩkĩre.

9Tondũ ũcio agĩkĩĩra andũ acio maareketio nĩ Beni-hadadi atĩrĩ, Ĩrai mũthamaki ũcio mwathi wakwa ũũ: Maũndũ mothe marĩa wandekanĩirie niĩ, ndungata yaku, hĩndĩ ya mbere-rĩ, nĩngũmeka; no rĩrĩ, ũndũ ũyũ wa rĩu ndingĩwĩka. Nao areio acio magĩgĩthiĩ, makĩmũcokeria ũhoro.

10Ningĩ Beni-hadadi akĩmũrekeria mũndũ, akiuga atĩrĩ, ngai ciakwa iro’thũũra, o na ikĩrĩrĩrie gũ’thũũra, rũkũngũ rũa Samaria rũngĩigania andũ othe arĩa manũmĩrĩire, atĩ nĩguo o mũndũ wao arũrũme ngundi ĩmwe.

11Nake mũthamaki wa Isiraeli agĩgĩcokia akiuga atĩrĩ, Mwĩrei atĩrĩ, Nĩ kaba mũndũ ũrĩa ũkwĩoha indo ciake cia mbaara atige kwĩgatha ta mũndũ ũrĩa ũgũciohora.

12Na gũgĩkinya atĩrĩ, atĩ hĩndĩ ĩrĩa Beni-hadadi aaiguire ũhoro ũcio aatwarĩirũo, tondũ nĩ kũnyua aanyuaga njohi me na athamaki acio maarĩ nake hema-inĩ-rĩ, akĩĩra ndungata ciake atĩrĩ, Wĩthabei. Nao magĩĩthaba nĩguo makahũre itũũra rĩu.

13Na atĩrĩrĩ, mũnabii ũmwe agĩkuhĩhĩria Ahabu, mũthamaki wa Isiraeli, akĩmwĩra atĩrĩ, Jehova oigĩte ũũ: Nĩũrona kĩrĩndĩ gĩkĩ gĩothe kĩingĩ ũũ? Atĩrĩrĩ, nĩngũkĩrekereria ndĩkĩneane moko-inĩ maku ũmũthĩ; nawe nĩũkũmenya atĩ nĩ niĩ Jehova.

14Nake Ahabu agĩkĩũria atĩrĩ, Na ũndũ wa ũ? Nake akiuga atĩrĩ, Jehova oigĩte ũũ: Na ũndũ wa muumo wa anene a ng’ongo cia bũrũri waku. Ningĩ akĩũria atĩrĩ, Nũ ũgũtata ita? Agĩgĩcokia atĩrĩ, Nĩwe.

15Agĩgĩcokanĩrĩria muumo wa anene a ng’ongo, naguo warĩ andũ magana merĩ ma mĩrongo ĩtatũ na erĩ; na thutha wa acio, agĩcokereria andũ arĩa angĩ othe, naguo ũguo nĩ ta kuuga ciana cia Isiraeli ciothe, marĩ andũ ngiri mũgwanja.

16Nao magĩkiumagara mĩaraho. No rĩrĩ, Beni-hadadi nĩ kũnyua aanyuaga njohi, na aarĩ mũrĩu, arĩ hema-inĩ hamwe na athamaki, o acio mĩrongo ĩtatũ na erĩ arĩa maarĩ a kũmũteithia.

17Naguo muumo ũcio wa anene a ng’ongo cia bũrũri wa Ahabu ũkĩamba kuumagara; nake Beni-hadadi akĩrekania, nao andũ magĩcoka makĩmũhe ũhoro, makĩmwĩra atĩrĩ, Nĩ harĩ andũ maroka moimĩte Samaria.

18Nake agĩkiuga atĩrĩ, Mangĩkorũo mokĩte macirĩire kũgĩe thayũ-rĩ, magwatei mĩgwate; kana hihi mangĩkorũo mokĩte macirĩire kũgĩe mbaara-rĩ, nĩmagwatwo mĩgwate.

19Nao andũ acio magĩkiumagara moimĩte itũũra-inĩ, o muumo ũcio wa anene a ng’ongo cia bũrũri ũcio, o na athigari a ita arĩa maamoimĩte thutha.

20Nao o mũndũ agĩkĩũraga mũndũ wake; nao Asuriata magĩkĩũra, Aisiraeli magĩkĩmateng’eria; no Beni-hadadi, mũthamaki wa Suriata, akĩhaica mbarathi akĩĩhonokia, me hamwe na andũ ake arĩa maathiaga mahaicĩte mbarathi.

21Nake mũthamaki wa Isiraeli akiumagara, akĩhũranĩria mbarathi na ngari cia ita, agĩkĩũraga Asuriata rĩũragana inene mũno.

22Nake mũnabii ũcio agĩcoka agĩthengerera mũthamaki wa Isiraeli, akĩmwĩra atĩrĩ, Thiĩ ũgethagathage, na wĩbarĩrĩre wega ũmenye ũrĩa ũgeka; nĩ ũndũ mwaka ũyũ ũngĩ ũgĩũka kwambĩrĩrio, mũthamaki ũcio wa Suriata nĩagoka kũhũrana nawe.

23Na rĩrĩ, ndungata cia mũthamaki wa Suriata ikĩmwĩra atĩrĩ, Ngai yao nĩ ngai ya irĩma-inĩ, na ũndũ ũcio nĩguo watũmire magĩe na hinya kũrĩ ithuĩ; no rĩrĩ, reka tũkarũĩre nao kũndũ kwaraganu, na ti-itherũ nĩtũkũmakĩria hinya.

24Na wĩke atĩrĩ, weherie athamaki acio, o mũndũ ũmũthengie handũ hake, ũcokie anene a mbũtũ cia ita mathenya mao;

25ũcoke wĩtarĩre athigari a ita maigana o ta arĩa aku moragirũo, ũcokie mbarathi ithenya rĩa mbarathi ĩrĩa yothe yũrĩte, o nayo ngari ũmĩcokie ithenya rĩa ĩrĩa yothe yũrĩte o ro ũguo; na tũkahũranĩra nao kũndũ kwaraganu, na tũtirĩ hingo tũtakamakĩria hinya. Nake akĩigua uuge wao, agĩĩka o ta ũguo.

26Na gũgĩkinya atĩrĩ, atĩ mwaka ũyũ ũngĩ ũgĩũka kwambĩrĩrio-rĩ, Beni-hadadi agĩcokereria Asuriata, akĩambata agĩkinya Afeki, akahũrane na Isiraeli.

27Nacio ciana cia Isiraeli igĩcokanĩrĩrio, igĩtumwo rĩĩgu, igĩgĩthiĩ kũhũrana nao; nacio ciana icio cia Isiraeli ikĩamba hema ciacio ing’ethanĩire nao, ihaana o ta tũrũũru twĩrĩ tũnini twa tũũri tũtheri; no rĩrĩ, Asuriata maaiyũrĩte bũrũri ũcio wothe.

28Na rĩrĩ, mũndũ ũmwe wa Ngai agĩkuhĩhĩria mũthamaki wa Isiraeli, akĩaria nake akĩmwĩra atĩrĩ, Jehova oigĩte ũũ: Tondũ Asuriata moigĩte ciugo ici: Jehova nĩ Ngai wa irĩma-inĩ, no ti Ngai wa kũndũ kwaraganu-rĩ, tondũ wa ciugo icio nĩngũrekereria kĩrĩndĩ gĩkĩ gĩothe ndĩkĩneane moko-inĩ maku, na inyuĩ nĩmũkũmenya atĩ nĩ niĩ Jehova.

29Nao magĩgĩikara hema-inĩ ciao matukũ mũgwanja mang’ethanĩire. Na gũgĩkinya atĩrĩ, atĩ mũthenya wa mũgwanja mbaara ĩgĩthenganĩrĩrũo nĩguo ĩhũranwo; nacio ciana cia Isiraeli ikĩũraga Asuriata arĩa maathiaga na magũrũ ngiri igana rĩmwe mũthenya o ro ũmwe.

30No arĩa angĩ makĩũra magĩkinya Afeki, magĩtonya itũũra; naruo rũthingo rũarĩo rũkĩgũĩra andũ ngiri mĩrongo ĩĩrĩ na mũgwanja thĩinĩ wa andũ arĩa maatigarĩte. Nake Beni-hadadi akĩũra, agĩthiĩ itũũra thĩinĩ, agĩtonya nyũmba yarĩ na kanyũmba ga thĩinĩ o thĩinĩ mũno ma.

31Nacio ndungata ciake ikĩmwĩra ũũ: Atĩrĩrĩ, tũiguĩte atĩ athamaki a nyũmba ya Isiraeli nĩmaiguanagĩra tha mũno; twagũthaitha ũreke twĩohe nguo cia makũnia njohero, o na twĩĩkĩre mĩhĩndo mĩtwe, tuumagare, tũthiĩ kwĩ mũthamaki wa Isiraeli; hihi no gũkorũo nĩegũkũhonokia ũtũũre muoyo.

32Tondũ ũcio magĩkĩĩoha nguo cia makũnia njohero, na magĩĩkĩra mĩhĩndo mĩtwe, magĩthiĩ magĩkinya kwĩ mũthamaki wa Isiraeli, makĩmwĩra atĩrĩ, Ndungata yaku Beni-hadadi yoiga atĩrĩ, Ndagũthaitha ũreke ndũũre muoyo. Nake Ahabu akiuga atĩrĩ, Githĩ o na rĩu arĩ muoyo? Ũcio nĩ mũrũ wa awa.

33Nao andũ acio makĩbarĩrĩra ũhoro ũcio na kĩyo, magĩkĩhiũha kũnyita mĩario ĩo yake, nĩguo mamenye kana nĩĩringanĩte na meciria make, magĩkiuga atĩrĩ, Ĩĩ, ũcio mũrũ wa thoguo, Beni-hadadi. Agĩgĩcoka akiuga atĩrĩ, Thiĩi mũmũndehere. Beni-hadadi agĩkiuma, agĩthiĩ harĩ we; nake Ahabu akĩmũhaicithia ngari-inĩ yake thĩinĩ.

34Nake Beni-hadadi akĩmwĩra atĩrĩ, Matũũra marĩa baba aatunyire thoguo nĩngũgũcokeria; nawe ũcoke wĩthondekithĩrie handũ ha wonjoria kũu Dameski, o ta ũrĩa baba ethondekithĩirie Samaria. Nake Ahabu agĩkiuga atĩrĩ, Niĩ o na niĩ nĩngũreka ũthiĩ, tũrĩkanĩrĩte kĩrĩkanĩro kĩu nawe. Ũguo nĩguo aakĩrĩkanĩire nake, agĩcoka akĩmũreka ethiĩre.

35Na rĩrĩ, mũndũ ũmwe wa thiritũ ya ariũ a anabii akĩĩra mũndũ ũngĩ wa thiritũ yake, na ũndũ wa uuge wa Jehova atĩrĩ, Ndagũthaitha ũngũthe. Nake mũndũ ũcio akĩrega kũmũgũtha

36Agĩkĩmwĩra atĩrĩ, Tondũ ndũnaigua uuge wa Jehova-rĩ, ngũkwĩra atĩrĩ, atĩ o ro rĩu woima haha harĩ niĩ ũthiĩ, nĩũkũũragwo nĩ mũrũthi. Nake oima harĩ we, mũrũthi ũkĩmũkora, ũkĩmũũraga.

37Ningĩ akĩona mũndũ ũngĩ, akĩmwĩra atĩrĩ, Ndagũthaitha ngũtha. Nake mũndũ ũcio akĩmũgũtha, akĩmũtihia.

38Thutha wa ũguo mũnabii ũcio agĩgĩĩthiĩra, agĩikara mũkĩra-inĩ wa njĩra, etereire mũthamaki, nake nĩegarũrĩte ndakamenyeke akeyoha maitho na tama wake wa mũtwe.

39Na rĩrĩa mũthamaki aahĩtũkaga, akĩanĩrĩra mũthamaki, akĩmwĩra atĩrĩ, Niĩ, ndungata yaku, nĩndoimagarire ngĩthiĩ ngĩtonya ita-inĩ thĩinĩ, na atĩrĩrĩ, mũndũ ũmwe akĩgarũrũka agĩũka na kũrĩa ndĩ, akĩndehere mũndũ, akĩnjĩra atĩrĩ, Menyerera mũndũ ũyũ; na rĩrĩ, angĩũra nĩ ũndũ wa ũndũ o na ũrĩkũ-rĩ, muoyo waku ũkoima muoyo wake, kana ũrute taranda ĩmwe ya betha.

40Na tondũ niĩ ndungata yaku ndarĩ na mĩhang’o ya ũũ na ũũ-rĩ, mũndũ ũcio agĩgĩĩthiĩra, akĩagwo. Nake mũthamaki wa Isiraeli akĩmwĩra atĩrĩ, Ũguo noguo ituĩro rĩaku rĩgũtuĩka; wee mwene nĩwe wetuĩra ũguo.

41Nake akĩhiũha kũruta tama ũcio wa mũtwe maitho, nake mũthamaki wa Isiraeli akĩmũmenya atĩ nĩ wa thiritũ ya anabii.

42Nake mũndũ ũcio agĩkĩmwĩra atĩrĩ, Jehova oigĩte ũũ: Tondũ nĩwareka mũndũ ũrĩa ndaamũrire wa kũninwo ore oime moko-inĩ maku-rĩ, muoyo waku ũkoima muoyo wake, nao andũ aku moime andũ ake.

43Nake mũthamaki wa Isiraeli agĩkĩinũka gwake mũciĩ e na kĩeha mũno, na akaigua ũũru; agĩkinya Samaria.