Daniel 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1ATĨRĨRĨ, hĩndĩ ĩrĩa Jehoiakimu aathamakaga bũrũri wa Juda, o mwaka wa gatatũ wa gũthamaka kũu gwake-rĩ, Nebukadinezaru, mũthamaki wa Babuloni, nyĩokire akĩrigicĩria Jerusalemu nĩguo arĩtunyane.

2Nake Mwathani akĩrekereria Jehoiakimu, mũthamaki wa Juda, akĩmũneana moko-inĩ make, hamwe na indo imwe thĩinĩ wa iria ciarutagwo wĩra nacio nyũmba-inĩ ya Ngai; nake agĩgĩthiĩ nacio, agĩcitwara bũrũri wa Shinaru, o nyũmba-inĩ ya ngai yake; nacio indo icio agĩciiga nyũmba ĩrĩa yaigagwo mũthithũ wa indo cia ngai ĩo yake.

3Nake mũthamaki ũcio agĩcoka agĩatha Ashipenazi, ũrĩa warĩ mũrori wa andũ ake arĩa ehokeire wĩra wa nyũmba yake, akĩmwĩra amũrehithĩrie andũ amwe a ciana cia Isiraeli, nao makorũo marĩ a rũciaro rũa mũthamaki, o na kana rũa anene;

4na makorũo marĩ aanake matarĩ ũcuke, na marĩ athaka makĩonwo, o na marĩ akuũku maũndũ-inĩ mothe ma ũũgĩ, ningĩ makorũo me na wara mũingĩ, o na ũhoti wa kũmenya wega maũndũ, o arĩa marĩ na ũhoti wa gũtungatĩra mũthamaki maikaranĩtie nake nyũmba-inĩ yake thĩinĩ; ningĩ agĩkĩmwatha akĩmwĩra amatue ũũgĩ ũrĩa wa Akalidei, o na rũthiomi rũao.

5Nake mũthamaki agĩgĩtua atĩ maheagwo mũthenya o mũthenya rũĩga rũa irio iria aarĩaga we mwene, na maheagwo ndibei ĩrĩa aanyuaga, nao maikare ihinda rĩa mĩaka ĩtatũ makĩrĩaga irio o ro icio, nĩ getha thutha ũcio magetĩkĩrio maikaranagie na mũthamaki nyũmba yake thĩinĩ, mamũtungatĩre.

6Na rĩrĩ, thĩinĩ wa andũ acio maathurirũo-rĩ, hagĩkorũo harĩ aanake amwe a ciana cia Juda, nao nĩ Danieli, na Hanania, na Mishaeli, na Azaria.

7Nake mũnene wa andũ arĩa mehokeirũo wĩra wa nyũmba ya mũthamaki akĩmatua marĩĩtwa mangĩ, Danieli akĩmũtua Beliteshazaru, nake Hanania akĩmũtua Shadraka, nake Mishaeli akĩmũtua Meshaka, o nake Azaria akĩmũtua Abedinego.

8No rĩri, Danieli agĩtua na ngoro yake atĩ ndagetĩkĩra gwĩthahia na irio icio cia mũthamaki, o na kana na ndibei yake ĩo aanyuaga; tondũ ũcio agĩthiĩ harĩ mũnene wa andũ arĩa mehokeirũo wĩra wa nyũmba ya mũthamaki, akĩmũthaitha atĩ etĩkĩrio gũthema gwĩthahia kũu.

9Na rĩrĩ, Ngai agĩtũma Danieli etĩkĩrĩke nĩ mũnene ũcio, na aiguĩrũo tha nĩwe.

10Nake mũnene ũcio wa andũ arĩa mehokeirũo wĩra wa nyũmba ya mũthamaki akĩĩra Danieli atĩrĩ, Nĩndĩretigĩra mwathi wakwa, mũthamaki, ũcio ũtuĩte atĩ mũheagwo irio icio cianyu o na ndibei ĩo; hihi egũkĩmuona mũrĩ ahĩnju ũthiũ gũkĩra andũ arĩa angĩ a riika rĩanyu nĩ ũndũ kĩ? Ti-itherũ mũngĩtuĩka ũguo-rĩ, mwaikara ta mũ’neanĩte harĩ mũthamaki ngerũo ngero.

11Nake Danieli agĩkĩaria na mũndũ ũrĩa watuĩtwo mũmaikaria me na Hanania, na Mishaeli, na Azaria, nĩ mũnene ũcio wa andũ arĩa mehokeirũo wĩra wa nyũmba ya mũthamaki, akĩmwĩra atĩrĩ,

12Ndagũthaitha wambe ũgerie ũhoro witũ, ithuĩ ndungata ciaku, ũtwĩtĩkĩrie tũheagwo o irio cia mĩgũnda ciiki tũrĩage, na tũnyuage o maĩ matheri, matukũ ikũmi.

13Na rĩrĩ, matukũ macio maathira-rĩ, ũgacoka ũtũroranie na aanake arĩa marĩaga irio iria cia mũthamaki; ũkĩroranie mothiũ maitũ na mao, na thutha ũcio ũgĩcoke ũtwĩke o ta ũrĩa ũrĩona kwagĩrĩire.

14Nake akĩmetĩkĩria ũhoro ũcio, akĩmageria matukũ macio ikũmi.

15Na matukũ macio ikũmi maathira, mothiũ mao makĩonwo marĩ mathaka, nao makĩonwo marĩ anoru gũkĩra aanake acio angĩ othe maarĩĩte irio cia mũthamaki.

16Tondũ ũcio mũmaikaria ũcio agĩtiga kũmahe irio ciao o na ndibei yao iria merĩtwo maheagwo, agĩcoka kũmaheaga o irio o ro cia mũgũnda.

17Na rĩrĩ, ha ũhoro wa aanake acio ana-rĩ, Ngai akĩmahe ũhoti wa kũmenya wega maũndũ, na akĩmongerera ũkuũku wa gũthoma maũndũ mothe, o na kũgĩa na ũũgĩ. Nake Danieli akĩheo ũtaũku wa kũmenya gũtaũra cioneki cia mĩthemba yothe o na iroto.

18Nayo mĩaka ĩrĩa mũthamaki aatuĩte ya gũkamatwara kũu nyũmba yake thĩinĩ yathira-rĩ, mũnene ũcio wa andũ arĩa mehokeirũo wĩra wa nyũmba ya mũthamaki agĩkĩmatwara harĩ Nebukadinezaru.

19Nake mũthamaki agĩkĩaranĩria nao. Na rĩrĩ, thĩinĩ wao othe hationekire mũndũ o na ũmwe ũtariĩ ta Danieli na Hanania na Mishaeli na Azaria; na tondũ ũcio magĩthurũo a gũikaranagia na mũthamaki mamũtungatĩre.

20Na gũgĩtuĩka atĩrĩ, atĩ maũndũ mothe marĩa mũthamaki aamoragia makoniĩ ũũgĩ na ũmenyi maũndũ-rĩ, andũ acio magĩkorũo makĩrĩte ago othe o na aragũri othe arĩa maarĩ bũrũri ũcio aathamakaga ta maita ikũmi.

21Nake Danieli agĩgĩtũũra aikarĩte kuo o nginya mwaka wa mbere ũrĩa Kurusu aakorirũo athamakĩte.

Jump to: Chapter 2 →