Daniel 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1Nĩ niĩ Nebukadinezaru, mũthamaki, ndamwandĩkĩra marũa maya inyuĩ andũ a nduka ciothe, na ndũrĩrĩ ciothe, o na a mĩario yothe, o inyuĩ mũtũũraga thĩ yothe. Thayũ ũromũingĩhĩra!

2Nĩnyonete ta arĩ wega ndĩmuonie morirũ na maũndũ ma kũgegania marĩa nyonetio nĩ Ngai Ũrĩa-wĩ-Igũrũ-Mũno.

3Kaĩ morirũ make nĩ manene-ĩ! O namo maũndũ make ma kũgegania kaĩ nĩ ma hinya-ĩ! Ũthamaki wake nĩ wa tene na tene, Naguo wathani wake ũkinyagĩra njiarũa na njiarũa.

4Niĩ Nebukadinezaru nĩ gũikara ndaikarĩte gwakwa mũciĩ o ro ũguo itegũtangĩka, ngaikara o kũu nyũmba yakwa ya ũnene ngaacĩire;

5ngĩgĩcoka ngĩona ndarota kĩroto, nakĩo gĩgĩkĩ’makia, namo meciria makwa ndĩ ũrĩrĩ, o na cioneki iria ndonire, ikĩ’nyamaria mũno.

6Tondũ ũcio ngĩgĩtua watho, ngiuga atĩ andũ othe arĩa ogĩ a Babuloni marehwo harĩ niĩ, nĩ getha mandaũrĩre kĩroto kĩu.

7Nao ago na aragũri na Akalidei, na arathi-a-mohoro, magĩgĩũka, na niĩ ngĩkĩmera ũrĩa ndarotete, no nĩmaaremirũo nĩ kũndaũrĩra kĩroto kĩu.

8No thutha wao Danieli agĩũka, o we ũrĩa wĩtagwo Beliteshazaru, etanĩtio na ngai yakwa; nake ũcio akoragwo arĩ na roho wa ngai iria theru thĩinĩ wake. Na niĩ ngĩkĩmwĩra ũrĩa ndarotete, ngiuga atĩrĩ,

9Wee Beliteshazaru, mũnene wa ago othe, nĩnjũĩ atĩ hinya wa ngai ĩrĩa theru wĩ thĩinĩ waku, na gũtirĩ kaũndũ ka hitho o na karĩkũ kangĩkũrema. Tondũ ũcio njĩra ũhoro wa cioneki iria nyonete ngĩrota, na ũndaũrĩre ũtaũri wacio.

10Cioneki iria ndonire ndĩ ũrĩrĩ nĩ ici, Ndacũthĩrĩirie, Ngĩona mũtĩ Wĩ bũrũri gatagatĩ, Naguo warĩ mũraya ma.

11Naguo mũtĩ ũcio ũgĩkĩneneha, ũkĩgĩa na hinya, Nako gacũmbĩrĩ kaguo gakĩhutia matu-inĩ, Naguo ũkonagwo ituri ciothe cia thĩ.

12Mathangũ maguo maarĩ mathaka Namo maciaro maguo makaingĩha, Makĩya kũhota kũhũnia andũ a thĩ yothe. Nyamũ cia gĩthaka ciaarahaga kĩĩruru-inĩ kĩaguo, Nacio nyoni cia rĩera-inĩ ikeakĩra ũtũũro wacio honge-inĩ ciaguo, Nakĩo kĩndũ o gĩothe kĩrĩa kĩĩ muoyo gĩkarĩaga maciaro maguo.

13Ningĩ ngĩcoka ngĩona cioneki ingĩ ndĩ ũrĩrĩ, na nĩcio ici: ngĩona mũrangĩri, mũndũ mũtheru, nake agĩikũrũka oimĩte matu-inĩ,

14akĩanĩrĩra na mũgambo mũnene, akiuga atĩrĩ, Temai mũtĩ ũyũ, na mũcuure honge ciaguo; Itithiai mathangũ maguo, na mũhurunje maciaro maguo; Nyamũ nĩciehere gĩtina-inĩ kĩaguo, nacio nyoni ithame ciume honge-inĩ ciaguo.

15No rĩrĩ, rekei gĩthukĩ kĩaguo gĩikare thĩ hamwe na mĩri yakĩo gĩtakũũrĩtwo, Nĩguo gĩtũũre o hau nyeki-inĩ ĩrĩa nduru ya gĩthaka, Gĩĩ kĩohe na mũrĩnga wa kĩgera na gĩcango, na kĩihũgagio nĩ ime rĩa igũrũ. Nĩarĩanagĩre na nyamũ cia gĩthaka,

16Nayo ngoro yake ĩgarũrũke, atige gũcoka kũgĩa na meciria ta ma mũndũ, No agĩe na meciria mahaanaine na ma nyamũ, Nake arekwo ahĩtũkie mahinda mũgwanja atariĩ o ũguo.

17Ituĩro rĩu rĩtuĩtwo na watho wa arangĩri, narĩo rĩgekĩrũo hinya nĩ araika arĩa atheru, nĩ getha andũ othe mamenye atĩ Ũrĩa-wĩ-Igũrũ-Mũno nĩwe ũthamakagĩra ciana-cia-Adamu, naguo ũthamaki ũcio aũheaga o ũrĩa angĩenda kũhe, na akanenehia mũndũ ũrĩa ũtarĩ igweta o na hanini, nĩguo ũtuĩke wake.

18Kĩu nĩkĩo kĩroto kĩrĩa niĩ, mũthamaki Nebukadinezaru, ndarotire. Na rĩu, wee Beliteshazaru, kĩnyumbũrĩre ũtaũri wakĩo, kuona atĩ andũ arĩa angĩ othe ogĩ a ũthamaki wakwa maremetwo nĩ kũndaũrĩra ũndũ ũcio amu wee ndũngĩremwo, tondũ wĩ na roho wa ngai iria theru thĩinĩ waku.

19Hĩndĩ ĩo Danieli ũcio ti Beliteshazaru akĩamba gũikaranga kahinda amakĩte, namo meciria make makĩmũtanga. No mũthamaki akĩmũcokeria akiuga ũũ: Atĩrĩrĩ, wee Beliteshazaru, tiga gũtangĩka nĩ kĩroto kĩu, o na kana ũtaũri wakĩo. Nake Beliteshazaru agĩkĩmũcokeria, akĩmwĩra atĩrĩ, Mwathi wakwa, maũndũ ma kĩroto kĩu marokinyĩrĩra arĩa makũmenete, o naguo ũtaũri wakĩo ũroathĩrĩrio amuku aku!

20Atĩrĩrĩ, ũhoro wa mũtĩ ũcio wonire-rĩ, wawonire ũkĩneneha, ũkĩgĩaga na hinya; nako gacũmbĩrĩ kaguo gakĩhutia matu-inĩ, ningĩ mũtĩ ũcio ũkonagwo nĩ arĩa matũire ituri ciothe cia thĩ;

21namo mathangũ maguo magathakara, o na maciaro maguo makaingĩha; ningĩ maciaro macio maguo maarĩ maiganu ma kũhũnia thĩ yothe. O nacio nyamũ cia gĩthaka-rĩ, ciaarahaga kĩĩruru-inĩ kĩaguo, nacio nyoni cia rĩera-inĩ ikeakĩra ũtũũro wacio honge-inĩ ciaguo.

22Wee, mũthamaki witũ, nĩwe ũgerekanĩtio naguo, tondũ nĩwe ũnenehete ũguo ũkagĩa na hinya, naguo ũkaru waku ũkaneneha ũgaikara ta ũkinyĩte o igũrũ; ningĩ wathani waku ũgakinya o ituri-inĩ cia thĩ.

23Ningĩ harĩa mũthamaki onire mũrangĩri, mũndũ mũtheru, agĩikũrũka oimĩte igũrũ, akiuga, Temai mũtĩ ũyũ mũũũnũhe, no mũreke gĩthukĩ kĩaguo hamwe na mĩri yakĩo gĩikare thĩ gĩtakũũrĩtwo, gĩtũũre o hau nyeki-inĩ ĩrĩa nduru ya gĩthaka gĩĩ kĩohe na mũrĩnga wa kĩgera na gĩcango, na kĩihũgagio nĩ ime riumĩte igũrũ; ningĩ mũreke arĩanagĩre na nyamũ cia gĩthaka, na ahĩtũkie mahinda mũgwanja atariĩ o ũguo;

24ũtaũri waho, wee mũthamaki witũ, nĩguo ũyũ, narĩo ituĩro rĩrĩa rĩtuĩtwo nĩ Ũrĩa-wĩ-Igũrũ-Mũno nĩguo rĩgũkore, wee mwathi wakwa, mũthamaki ũyũ, nĩrĩo rĩrĩ:

25Atĩrĩrĩ, nĩũkarindũrũo ũthengio kũrĩ andũ mũgatũũranie na nyamũ cia gĩthaka, na ũtuwo wa kũrĩaga nyeki ta ndegwa, na ũihũgagio nĩ ime riumĩte igũrũ, ningĩ ũhĩtũkie mahinda mũgwanja ũtariĩ ũguo, o nginya rĩrĩa ũkamenya atĩ Ũrĩa-wĩ-Igũrũ-Mũno nĩwe ũthamakagĩra ciana-cia-Adamu, naguo ũthamaki ũcio aũheaga o ũrĩa angĩenda kũhe.

26Ningĩ harĩa haathanirũo atĩ gĩthukĩ kĩu, hamwe na mĩri yakĩo, gĩikare gĩtarĩ gĩkũũre, ũguo noguo ũthamaki waku ũgatũũra ũrũmĩtio ũrĩ o waku, rĩrĩa ũgakorũo ũmenyete atĩ hinya wa gwathana uumaga matu-inĩ.

27Tondũ ũcio, wee mũthamaki witũ, reke ũtaarani ũyũ wakwa wĩtĩkĩrĩke nĩwe. Wega waku no ũtigane na mehia maku ũcoke gwĩka o maũndũ ma ũthingu, na ũtige waganu waku, ũcoke kũiguagĩra athĩni tha; hihi ũguo nĩguo ũngĩongererũo matukũ ma gũtũũra ũgaacĩire.

28Namo maũndũ macio mothe magĩgĩkora mũthamaki Nebukadinezaru.

29Tondũ mĩeri ikũmi na ĩĩrĩ yathira, he hĩndĩ aakorirũo agĩcangacanga arĩ nyũmba igũrũ, o nyũmba ĩo yake ya ũnene kũu Babuloni.

30Nake mũthamaki agĩitĩka kwaria akiuga atĩrĩ, Githĩ ĩno tiyo Babuloni, itũũra rĩrĩa inene, o rĩrĩa ndeakithĩirie nĩ getha rĩtuĩke ũtũũro wa mũthamaki? Ndĩrĩakithĩtie na hinya wakwa mũnene ma nĩ getha riri wa ũkaru ũcio wakwa ũtũũre ũgoocagwo.

31Na kahinda o kau, o rĩrĩa mũthamaki aaragia, hagĩũka mũgambo uumĩte igũrũ ũkiuga ũũ: Atĩrĩrĩ, wee mũthamaki ũyũ ti Nebukadinezaru, ũrerũo atĩrĩ, Ũthamaki waku nĩũkwehereire,

32nawe nĩũkũrindũrũo ũthengio thĩinĩ wa andũ, ũgatũũranie na nyamũ cia gĩthaka, na ũrĩage nyeki ta ndegwa, ningĩ ũhĩtũkie mahinda mũgwanja ũtariĩ o ro ũguo; o nginya rĩrĩa ũkamenya atĩ Ũrĩa-wĩ-Igũrũ-Mũno nĩwe ũthamakagĩra ciana-cia-Adamu, na atĩ ũthamaki ũcio aũheaga o ũrĩa angĩenda kũhe.

33Na thaa o ro ĩo ituĩro rĩu rĩkĩhingĩrio Nebukadinezaru, agĩkĩrindũrũo agĩthengio kũrĩ andũ, agĩkĩgwata kũrĩaga nyeki ta ndegwa; naguo mwĩrĩ wake ũkaihũgagio nĩ ime riumĩte igũrũ o nginya njuĩrĩ yake ĩkĩraiha, ĩkĩhaana ta njoya cia ndiyũ, nacio ndwara ciake ikĩraiha ikĩhaana o ta cia nyoni cia rĩera-inĩ.

34Na rĩrĩ, matukũ macio maathira-rĩ, niĩ Nebukadinezaru ngĩtiira maitho makwa na igũrũ, namo meciria makwa makĩnjokerera, ngĩgĩitĩka kũgooca Ũrĩa-wĩ-Igũrũ-Mũno, ngĩkĩmũkumia, na ngĩĩkĩrĩra Ũrĩa ũtũũraga mĩndĩ na mĩndĩ; tondũ gwathana gwake nĩ gwa tene na tene, naguo ũthamaki wake ũkinyagĩra njiarũa na njiarũa.

35Andũ othe a gũkũ thĩ monagwo nĩwe ta matarĩ bata o na hanini, nake ekaga o ta ũrĩa eyendeire kũu mbũtũ-inĩ ciake cia matu-inĩ, ningĩ ageka o ro ũguo thĩinĩ wa andũ a gũkũ thĩ; na gũtirĩ mũndũ ũngĩhota kũmũgirĩrĩria ũndũ, o na kana amũũrie, Ũreka atĩa?

36Na atĩrĩ, ihinda o rĩu ngĩcokererũo nĩ meciria makwa, namo maũndũ makwa ma ũkaru na ma riri makĩnjokerera, nĩ getha ũthamaki wakwa ũcoke kũgĩa igweta; ningĩ athuri a kĩama gĩakwa, na aathani a bũrũri wakwa, magĩcoka kũ’hoyaga kĩrĩra, ngĩgĩcoka kũhandwo wega ũthamaki-inĩ wakwa; naguo ũnene wakwa-rĩ, ũkĩongerereka mũno makĩria.

37Na rĩu niĩ Nebukadinezaru nĩ gũkumia ngũkumia Mũthamaki wa Igũrũ, ngamũtũũgĩria, na ngamwĩkĩrĩra, tondũ mawĩra make mothe nĩ ma ma, namo maũndũ make marĩa ekaga nĩ ma kĩhooto; nao arĩa mathiaga na mwĩgatho aahota kũmanyihia.

← Chapter 3 Jump to: Chapter 5 →