Daniel 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1Atĩrĩrĩ, mũthamaki ũcio ti Nebukadinezaru nĩombithirie mũhianano wa thahabu, naguo ũraihu waguo warĩ mĩkono mĩrongo ĩtandatũ, o na kwarama kwaguo kwarĩ mĩkono ĩtandatũ; nake akĩũhandithia werũ wa Dura kũu bũrũri wa Babuloni.

2Nake mũthamaki ũcio ti Nebukadinezaru agĩgĩtũmana, akĩũnganithia anene, na anyabara, na abarũthi, na arathi-a-mohoro arĩa anene, na aikaria-a-mĩthithũ, na athuri a kĩama gĩake, na mawakiri, o na aathani a mabũrũri make mothe, nĩguo mathiĩ makarugũrie mũhianano ũcio wahandithĩtio nĩ mũthamaki ũcio ti Nebukadinezaru.

3Na gũgĩkinya atĩrĩ, atĩ anene acio othe makĩũngana hamwe, me na anyabara, na abarũthi, na arathi-a-mohoro arĩa anene, na aikaria-a-mĩthithũ, na athuri a kĩama, na mawakiri, o na aathani a mabũrũri macio mothe; nao othe magĩthiĩ gĩathĩ-inĩ kĩu gĩa kũrugũria mũhianano ũcio wahandithĩtio na watho wa mũthamaki ũcio ti Nebukadinezaru; makĩrũgama mbere ya mũhianano ũcio wahandithĩtio nĩ mũthamaki ũcio ti Nebukadinezaru.

4Nake mũndũ ũrĩa warĩ mũhuhi-coro akĩanĩrĩra, akiuga atĩrĩ, Ta iguai ũrĩa mwathĩtwo, inyuĩ andũ a nduka ciothe, na a ndũrĩrĩ ciothe, o na a mĩario yothe;

5rĩrĩa mũkaigua mĩgambo ya karumbeta, na mũtũrirũ, na kĩnanda kĩrĩa kĩnene kĩa mũgeto, na thethe, na kĩnanda gĩa kĩnubi, na macoro, na inanda cia mĩthemba yothe-rĩ, mũkegũithia thĩ mũhoe mũhianano ũyũ wa thahabu ũhandithĩtio nĩ mũthamaki ti Nebukadinezaru.

6Ningĩ mũndũ o wothe ũtakegũithia thĩ aũhoe, thaa o ro ĩo nĩyo agaikio icua-inĩ rĩa mwaki wakanĩte mũno.

7Tondũ ũcio rĩrĩa andũ acio a nduka ciothe, na ndũrĩrĩ ciothe, na a mĩario yothe, maaiguire mĩgambo ĩo ya karumbeta, na mũtũrirũ, na kĩnanda kĩrĩa kĩnene kĩa mũgeto, na thethe, na kĩnanda gĩa kĩnubi, na inanda cia mĩthemba yothe-rĩ, makĩĩgũithia thĩ makĩhoya mũhianano ũcio wa thahabu wahandithĩtio nĩ mũthamaki Nebukadinezaru.

8Tondũ ũcio, ihinda o ro rĩu Akalidei amwe magĩthengerera harĩ mũthamaki, magĩcuka Ayahudi,

9magĩkĩĩra mũthamaki ũcio ti Nebukadinezaru ũũ: Atĩrĩrĩ, mũthamaki witũ, ũrotũũra tene na tene.

10Nĩ rĩrĩ, mũthamaki witũ, githĩ ndũtuĩte watho ũkoiga atĩ mũndũ o wothe aaigua mĩgambo ya karumbeta, na mũtũrirũ, na kĩnanda kĩrĩa kĩnene kĩa mũgeto, na thethe, na kĩnanda gĩa kĩnubi, na macoro, o na inanda cia mĩthemba yothe, egũithie thĩ ahoe mũhianano ũcio wa thahabu?

11Na ningĩ ũkoiga atĩ mũndũ o wothe ũrĩa ũngĩrega kwĩgũithia thĩ aũhoe, no nginya aikio icua-inĩ rĩa mwaki wakanĩte mũno?

12Rĩu-rĩ, nĩkũrĩ Ayahudi amwe, na nĩo arĩa ũigĩte a kũrora mawĩra marĩa marutagwo bũrũri ũyũ wa Babuloni, o arĩa metagwo Shadraka na Meshaka na Abedinego, maregete gũgwathĩkĩra, wee mũthamaki; na makarega gũtungatĩra ngai ciaku o na kana mahoe mũhianano ũcio wa thahabu ũhandithĩtie.

13Nake Nebukadinezaru aaigua ũguo akĩnuna ang’ũrĩkĩte mũno, agĩgĩathana akiuga atĩ Shadraka na Meshaka na Abedinego marehwo harĩ we. Nao magĩkĩmatwara harĩ mũthamaki.

14Nake mũthamaki ũcio ti Nebukadinezaru akĩmoria atĩrĩ, Anga nĩ gũtua mũtuĩte atĩ mũtingĩtungatĩra ngai yakwa, inyuĩ Shadraka na Meshaka na Abedinego, o na kana mũhoe mũhianano ũcio wa thahabu ’handithĩtie?

15Atĩrĩ, mũngĩĩhaarĩria nĩ getha rĩrĩa mũrĩigua mĩgambo ya karumbeta, na mũtũrirũ, na kĩnanda kĩrĩa kĩnene kĩa mũgeto, na thethe, na kĩnanda gĩa kĩnubi, na macoro, o na inanda cia mĩthemba yothe, mũkegũithia thĩ mũhoe mũhianano ũcio ’handithĩtie, no wega; no mũngĩrega kũũhoya-rĩ, o thaa ĩo mũgũikio icua-inĩ rĩa mwaki wakanĩte mũno. Ĩ hihi Ngai ũrĩa ũngĩkĩmũhonokia amũrute moko-inĩ makwa nĩ ũrĩkũ?

16Nao Shadraka na Meshaka na Abedinego magĩcokeria mũthamaki, makĩmwĩra ũũ: Atĩrĩrĩ, wee Nebukadinezaru, tũtibataire nĩ gũgũcokeria ũhoro ũyũ.

17Atĩrĩrĩ, Ngai witũ, o we ũrĩa tũtungatagĩra, aahota gũtũhonokia atũrute icua-inĩ rĩu rĩa mwaki ũcio wakanĩte mũno, nake nĩegũtũhonokia moko-inĩ maku, wee mũthamaki witũ.

18No rĩrĩ, o na kũngĩkorũo ti ũguo-rĩ, kĩmenye, wee mũthamaki witũ, atĩ tũtirĩ hingo tũngĩtungatĩra ngai ciaku, o na kana tũhoe mũhianano ũcio ũhandithĩtie wa thahabu.

19Hĩndĩ ĩo Nebukadinezaru agĩkĩgwatwo nĩ mang’ũrĩka, agĩthita gĩthiithi nĩ ũndũ wa Shadraka na Meshaka na Abedinego; agĩathana, akiuga atĩ icua rĩu rĩongererũo ngũ, nĩguo mwaki wakane ta maita mũgwanja gũkĩra ũrĩa ũhũthĩire gwakana.

20Ningĩ agĩcoka agĩatha andũ amwe a ita ciake arĩa maarĩ njamba, akĩmera manyite Shadraka na Meshaka na Abedinego, mamohe, macoke mamaikie icua-inĩ rĩu rĩa mwaki ũcio wakanĩte mũno.

21Nao andũ acio makĩohwo o ũguo maatariĩ, mehumbĩte maburana mao, na makanjũ mao, na iremba ciao, o na nguo ciao iria ingĩ, magĩgĩikio o kũu icua-inĩ thĩinĩ rĩa mwaki ũcio wakanĩte mũno.

22Na rĩrĩ, tondũ watho ũcio wa mũthamaki warĩ wa mbũkĩrĩra, naguo mwaki wa icua rĩu ũgĩkorũo wakanĩte mũno makĩria-rĩ, nĩnĩmbĩ cia mwaki ũcio ikĩũraga andũ acio maanyitĩte Shadraka na Meshaka na Abedinego.

23Nao andũ acio atatũ, Shadraka na Meshaka na Abedinego makĩgũa kũu icua-inĩ rĩu rĩa mwaki ũcio wakanĩte mũno marĩ ohe.

24Hĩndĩ ĩo Nebukadinezaru, ũcio mũthamaki, akĩgwatwo nĩ kĩmako, agĩũkĩra na ihenya, akĩarĩria athuri arĩa maamũheaga kĩrĩra, akĩmoria atĩrĩ, Githĩ ti andũ atatũ tũikirie mwaki-inĩ marĩ ohe? Nao magĩcokia makĩĩra mũthamaki, atĩrĩ, Ĩĩ, noguo, mũthamaki.

25Nake agĩgĩcokia akiuga ũũ: Ta rorai! Nĩ andũ ana ndĩrona, nao ti ohe; ningĩ nĩ gũcanga maracanga o kũu mwaki-inĩ thĩinĩ, na matirĩ ũũru marekwo nĩguo; naguo mũhianĩre wa ũcio wa kana nĩ ta wa mũrũ wa ngai!

26Nake Nebukadinezaru agĩgĩkuhĩhĩria mũromo-inĩ wa icua rĩu rĩa mwaki ũcio wakanĩte mũno, agĩĩtana akiuga atĩrĩ, Nĩ inyuĩ Shadraka na Meshaka na Abedinego, o inyuĩ mũtungatagĩra Ngai-Ũrĩa-wĩ-Igũrũ-Mũno; umĩrai, mũũke haha! Nao Shadraka na Meshaka na Abedinego magĩkiumĩra mwaki-inĩ ũcio.

27Nao anene, na anyabara, na abarũthi, na aheani kĩrĩra a mũthamaki, o arĩa monganĩte hamwe hau, magĩkĩĩrorera andũ acio, makĩona atĩ mwaki nĩũremetwo nĩ gwĩka mĩĩrĩ yao ũndũ, o na kana gũcina rũcuĩrĩ o na rũmwe rũa mĩtwe yao; ningĩ nguo ciao itieregethũkĩte, o na kana makanunga mwaki.

28Nake Nebukadinezaru akĩanĩrĩra akiuga atĩrĩ, Ngai wa Shadraka na Meshaka na Abedinego arogathwo, O we ũrĩa ũtũmire mũraika wake, Aahonokia ndungata ciake, iria imwĩhokete; Tondũ nĩiregire watho wa mũthamaki, cieheana mĩĩrĩ yacio, Nĩ getha itikae gũtungatĩra ngai ingĩ, o na kana gũciinamĩrĩra icihoe, Tiga o Ngai wacio cio nyene.

29Tondũ wa maũndũ macio, nĩndatua watho ndoiga atĩ andũ o na arĩkũ a nduka ciothe, na ndũrĩrĩ ciothe, o na mĩario yothe, arĩa mangĩaria ndeto cia kũmenereria Ngai wa Shadraka na Meshaka na Abedinego-rĩ, nĩmatemengwo makue, o na nyũmba ciao ituĩke ciĩgĩĩgĩ. Amu gũtirĩ ngai ĩngĩ ĩngĩhota kũhonokania ũũ.

30Nake mũthamaki agĩgĩtũũgĩria Shadraka na Meshaka na Abedinego kũu bũrũri ũcio wa Babuloni.

← Chapter 2 Jump to: Chapter 4 →