Esther 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1Na rĩrĩ, Moridekai aamenya ũrĩa wothe wĩkĩtwo-rĩ, agĩtembũranga nguo ciake, akĩĩhumba tama wa ĩkũnia, o na akĩĩitĩrĩria mũhu, akiuma agĩthiĩ o itũũra gatagatĩ, akĩrĩra aanĩrĩire mũno irĩra rĩa kĩeha;

2ningĩ agĩthiĩ akĩrũgama kĩhingo-inĩ kĩa mũthamaki nja, nĩ ũndũ gũtirĩ mũndũ o na ũrĩkũ wetĩkagĩrio gũtonya kĩhingo-inĩ kĩa mũthamaki thĩinĩ ehumbĩte tama wa ĩkũnia.

3Na bũrũri o bũrũri kũrĩa guothe ũhoro wa ũndũ ũcio mũthamaki aathanĩte wakinyire, o na watho ũcio wake wa kũrũmĩrĩrũo, gũgĩkĩgĩa kĩeha kĩnene kũrĩa Ayahudi maatũire, o na gũkiihingwo kũrĩa irio, o na gũkĩrĩrũo gũkĩĩhũragwo ithũri; nao andũ aingĩ magĩkoma thĩ mehumbĩte matama ma makũnia, meitĩriirie mũhu.

4Nacio ndungata cia airĩtu cia Esiteri, o na andũ arĩa mehokeirũo maũndũ ma nyũmba yake thĩinĩ, magĩthiĩ kũrĩ mũthamaki ũcio mũndũ-wa-nja, makĩmũhe ũhoro ũcio, nake akĩigua ũũru mũno mũno; agĩcoka agĩtwarithĩria Moridekai nguo ehumbe, arute tama ũcio wa ĩkũnia, no ndaigana gũcioya.

5Hĩndĩ ĩo Esiteri agĩĩtithia Hathaka, mũndũ ũmwe wa andũ arĩa mehokeirũo maũndũ ma nyũmba ya mũthamaki thĩinĩ, o ũcio mũthamaki aatuĩte wa kũmũtungatĩra, akĩmwĩra athiĩ kwĩ Moridekai, akamenye ũrĩa ũhoro ũcio ũtariĩ, o na gĩtũmi kĩaguo.

6Tondũ ũcio Hathaka akiumagara agĩthiĩ he Moridekai, o handũ harĩa haariĩ itũũra-inĩ, mwena wa na mbere wa kĩhingo kĩa nyũmba ya mũthamaki.

7Nake Moridekai akĩmũhe ũhoro wothe wa maũndũ marĩa maamũkorete, o na akĩmũmenyithia wega ũrĩa mbia ciigana iria Hamani eranĩire atĩ nĩekũruta ciigwo kũndũ kũrĩa kũigagwo mũthithũ wa indo cia bata cia mũthamaki, nĩ getha Ayahudi maninwo biũ.

8O na akĩmũhe kobi ya watho wa kũrũmĩrĩrũo ũrĩa waandĩkĩtwo wa kũhunjanĩrio kũu Shushani, atĩ nĩguo maninwo biũ, nĩ getha amĩonie Esiteri, o na amũhe ũhoro wayo; o na ningĩ amwĩre atĩ athiĩ atonye he mũthamaki, akamũthaithe o na amũkaĩre, e hau mbere yake, nĩ ũndũ wa andũ a rũrĩrĩ rũao.

9Nake Hathaka agĩcoka akĩhe Esiteri ũhoro ũcio aaheetwo nĩ Moridekai.

10Nake Esiteri agĩkĩaria na Hathaka, akĩmũhe ũhoro ũrĩa egũthiĩ kwĩra Moridekai, akĩmwĩra ũũ:

11Atĩrĩrĩ, ndungata ciothe cia mũthamaki, o na andũ a mabũrũri ma mũthamaki, nĩmoĩ atĩ mũndũ o wothe, o na angĩkorũo nĩ mũndũ mũrũme o na kana mũndũ-wa-nja, ũrĩa ũngĩthiĩ kwĩ mũthamaki arũgame o kũu nja ya nyũmba yake thĩinĩ mũno atetĩtwo athiĩ harĩ we, watho ũrĩa wathanĩtwo nĩ ũndũ wa mũndũ o wothe ũrĩa wĩkĩte ũguo no ũmwe, naguo nĩ wa atĩ oragwo, tiga o mũthamaki amũtambũrũkĩirie rũthanju rũake rũa ũnene rũa thahabu nĩ getha atũũre muoyo; no rĩrĩ, matukũ maya mĩrongo ĩtatũ mathirĩte niĩ ndiĩtĩtwo ’thiĩ ndonye kwĩ mũthamaki.

12Nake Moridekai akĩheo ũhoro ũcio waarĩtio nĩ Esiteri.

13Hĩndĩ ĩo Moridekai akĩmera macokerie Esiteri ũhoro ũũ: Atĩrĩrĩ, menya wĩcirie atĩ wee nĩwe ũkahonoka, nao Ayahudi arĩa angĩ othe more, nĩ ũndũ atĩ wĩ kũu nyũmba ya mũthamaki thĩinĩ.

14Nĩ ũndũ-rĩ, menya atĩ wee ũngĩkira ki ihinda rĩrĩ, Ayahudi nĩmekuona kĩhonia gĩthethũkĩte na handũ hangĩ, o na mahonokio; no rĩrĩ, wee mwene o na nyũmba ya thoguo nĩ kũninwo mũkũninwo biũ; na ningĩ-rĩ, nũ ũũĩ kana hihi watuĩkire mũthamaki mũndũ-wa-nja nĩ ũndũ wa ihinda ta rĩrĩ kĩũmbe?

15Nake Esiteri agĩkĩmera macokerie Moridekai ũhoro ũũ:

16Atĩrĩrĩ, thiĩ ũũnganie Ayahudi othe arĩa marĩ kũu Shushani rĩu, mwĩhinge kũrĩa irio nĩ ũndũ wakwa, na mũtikarĩe, o na kana mũnyue, mĩthenya itatũ, mũthenya o na ũtukũ; niĩ na niĩ, o na airĩtu akwa-rĩ, nĩtũkwihinga kũrĩa irio o ta ũguo; na thutha ũcio njoke ndonye he mũthamaki, njĩke ũndũ ũcio ũtatwaranĩte na watho ũrĩa wathanĩtwo; na ingĩgĩkua-rĩ, ndĩgĩkue.

17Tondũ ũcio Moridekai agĩĩthiĩra, nake agĩĩka maũndũ mothe marĩa Esiteri aamwathĩte eke.

← Chapter 3 Jump to: Chapter 5 →