Esther 7

Kikuyu Bible (IBUKU RĨRĨA ITHERU RĨA NGAI)

← Chapter 6 Jump to: Chapter 8 →

1Tondũ ũcio mũthamaki na Hamani magĩgĩthiĩ kũnyua ndibei iruga-inĩ rĩu Esiteri, mũtumia wa mũthamaki, aamathondekithĩirie.

2Naguo mũthenya ũcio wa ĩĩrĩ iruga-inĩ rĩu rĩa ndibei, mũthamaki akĩũria Esiteri ũũ: Atĩrĩrĩ, Esiteri, mũthamaki ũyũ mũtumia, ũkwenda gwĩkwo atĩa hihi, na nĩũgwĩtĩkĩrĩrũo? Ũndũ ũrĩa ũrenda kũ’hoya nĩ ũrĩkũ? Nĩ ũndũ-rĩ, o na kũngĩkorũo nĩ nuthu ya mabũrũri marĩa njathaga ũkũ’hoya-rĩ, ũndũ ũcio nĩũgwĩkwo.

3Hĩndĩ ĩo Esiteri, mũtumia wa mũthamaki, agĩkiuga atĩrĩ, Ingĩkorũo nĩnjĩtĩkĩrĩkĩte nĩwe, wee mũthamaki ũyũ, na ũkorũo nĩwonete arĩ wega-rĩ, ndagũthaitha ũreke ’heo ũndũ ũyũ ndĩrenda, naguo nĩ atĩ ndekwo ndũũre muoyo, o na andũ akwa o nao marekwo matũũre muoyo nĩ ũndũ wa ihoya rĩakwa.

4Nĩ ũndũ tũrĩ endie, niĩ mwene o na andũ akwa, nĩ getha tũninwo, tũũragwo, tũhuke biũ. No rĩrĩ, korũo nĩ kwendio tũkwendio tũgatuĩke ngombo cia arũme, o na cia andũ-a-nja, nĩingĩĩkirĩire o ki, o na harĩa thũ iitũ ĩtangĩhota kũrĩha ngero ĩrĩa ĩngĩgerũo mũthamaki.

5Hĩndĩ ĩo Ahasuerusu, mũthamaki, agĩkĩũria Esiteri, mũtumia wake, atĩrĩ, Ũcio ũngĩeta gwĩciria na ngoro yake eke ũndũ ta ũcio-rĩ, nũ hihi; na arĩ ha?

6Nake Esiteri akiuga atĩrĩ, Nĩ thũ o na mũmuku witũ; na nĩwe Hamani ũyũ mwaganu. Hĩndĩ ĩo Hamani agĩgĩĩtigĩra arĩ hau mbere ya mũthamaki o na mũtumia wake.

7Nake mũthamaki agĩũkĩra atũkũyanĩte, akiuma iruga-inĩ rĩu rĩa ndibei, agĩthiĩ mũgũnda wa nyũmba-inĩ ĩo ya athamaki, nake Hamani akĩrũgama ethaithanĩrĩre he Esiteri, mũtumia wa mũthamaki, nĩguo amũhonokie ndakoragwo; nĩ ũndũ nĩonire atĩ mũthamaki nĩaacirĩire kũmwĩka ũũru.

8Nake mũthamaki akiuma mũgũnda ũcio wa nyũmba-inĩ ya mũthamaki, agĩcoka harĩa maanyuagĩra ndibei iruga-inĩ rĩu; nake Hamani agĩkorũo egũithĩtie ũrĩrĩ-inĩ ũrĩa Esiteri aaikarĩire etiiranĩtie. Hĩndĩ ĩo mũthamaki agĩkiuga atĩrĩ, Hĩ, kaĩ egũkĩenda kũrũnda mũtumia wakwa, o gũkũ nyũmba ndĩkĩrĩ ho? Nake mũthamaki aarĩkia kuuga ũguo andũ magĩkĩhumba Hamani ũthiũ.

9Hĩndĩ ĩo Haribona, mũndũ ũmwe wa arĩa mehokeirũo maũndũ ma nyũmba ya mũthamaki thĩinĩ, arĩa maakorirũo me mbere yake, akiuga ũũ: O na atĩrĩrĩ, nyũmba-inĩ ya Hamani nĩkuo kũrũgamĩtio mũtĩ wa mĩkono mĩrongo ĩtano wa gũcuuria mũndũ, ũrĩa Hamani athondekithĩtie nĩ ũndũ wa Moridekai, o we ũcio waaririe ndeto njega ĩkoniĩ mũthamaki. Nake mũthamaki akiuga atĩrĩ, Mũcuuriei mũtĩ-inĩ ũcio igũrũ.

10Andũ acio magĩgĩcuuria Hamani mũtĩ-inĩ ũcio aathondekithĩtie nĩ ũndũ wa Moridekai. Hĩndĩ ĩo mũthamaki agĩgĩthirũo nĩ matũkũya.

← Chapter 6 Jump to: Chapter 8 →