Hebrews 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1HAKĨRĨ ũguo-rĩ, kuona atĩ nĩkũrĩ kĩĩranĩro kĩrĩa tũtigĩirũo gĩa gũtonya kĩhurũko-inĩ gĩake, nĩtũikarage twĩtigĩrĩte atĩ mũndũ wanyu o na ũrĩkũ ndakanonwo ta ahĩtanĩtie nakĩo.

2Amu-rĩ, o na ithuĩ nĩtũhunjĩirio ũhoro mwega o tao; ĩndĩ ũhoro ũrĩa maaiguire ndũigana kũmaguna, tondũ ndwatonyanĩte na wĩtĩkio thĩinĩ wa andũ acio maaũiguire.

3Tondũ ithuĩ twĩtĩkĩtie-rĩ, nĩ ithuĩ tũtonyaga kĩhurũko-inĩ kĩu; o ta ũrĩa oigire mbere atĩrĩ, O ta ũrĩa ndehĩtire nĩ ũrĩa ndarakaire, ngiuga atĩrĩ, Matigatonya kĩhurũko-inĩ gĩakwa: o na mawĩra make maakorirũo marĩ marĩku o kuuma rĩrĩa thĩ yaambĩrĩirie kũũmbwo.

4Amu nĩoigire handũ hana ha ũhoro wa mũthenya wa mũgwanja atĩrĩ, Nake Ngai akĩhurũka mũthenya wa mũgwanja atiganĩte na mawĩra make mothe.

5Ningĩ haha naho akoiga atĩrĩ, Matigatonya kĩhurũko-inĩ gĩakwa.

6Tondũ ũcio-rĩ, kuona atĩ nĩgũtigarĩte ũndũ wĩranĩirũo atĩ andũ amwe nĩmagatonya kuo, nao acio maahunjĩirio ũhoro ũcio mwega o mbere nĩmaagire gũtonya nĩ ũndũ wa kũrema-rĩ,

7Ngai nĩaacokire agĩtua mũthenya mũna, akiuga na kanua ka Daudi, matukũ maingĩ maathira, atĩrĩ, Ũmũthĩ, o ta ũrĩa kwoigĩtwo o mbere-rĩ, Ũmũthĩ mwetĩkĩra kũigua mũgambo wake, Tigai kũũmia ngoro cianyu.

8Nĩ gũkorũo Joshua angĩamakinyirie kĩhurũko-inĩ kĩu, Ngai ndangĩacokire kwaria thutha ũcio ũhoro wa mũthenya ũngĩ.

9Tondũ ũcio gũgagĩtuĩka atĩ andũ a Ngai nĩmatigarĩirũo nĩ thabatũ ya kũhurũka.

10Amu mũndũ ũrĩa ũrĩkĩtie gũtonya kĩhurũko-inĩ gĩake, nĩahurũkĩte o nake agatigana na mawĩra make, o ta ũrĩa Ngai aahurũkire, agĩtigana na mawĩra make.

11Nĩ ũndũ ũcio nĩtwĩrutanagĩrie na kĩyo tũgatonye kĩhurũko-inĩ kĩu, nĩ getha mũndũ o na ũrĩkũ ndakae kũgũa nĩ ũndũ wa kũrema ta ũguo andũ acio maaremire.

12Nĩ ũndũ Ũhoro wa Ngai wĩ muoyo, na wĩ na ũhoti, na wĩ ũũgĩ gũkĩra rũhiũ o ruothe rũnoretwo mĩena yerĩ, ũgatheca ũgakĩgayũkania muoyo na roho, o na ũgaatia mĩthimo na ũkagayũkania mahĩndĩ na maguta, ningĩ nĩũhiũhaga gũkũũrana meciria ma ngoro o na ũrĩa ĩcirĩire gwĩka.

13Na gũtirĩ kĩndũ o gĩothe kĩũmbe gĩtonekete mbere yake; no rĩrĩ, indo ciothe ciikaraga itarĩ humbĩre, na iguũrĩtio maitho-inĩ make, we mwene ũhoro witũ.

14Hakĩrĩ ũguo-rĩ, kuona atĩ twĩ na mũthĩnjĩri-Ngai-mũnene ũrĩa wĩ bata ma, na ũhungurĩte agakinya o Igũrũ, na nĩwe Jesu Mũrũ wa Ngai, nĩtũrũmieni ũhoro ũrĩa tũtũire tuumbũraga.

15Amu tũtirĩ na mũthĩnjĩri-Ngai-mũnene ũtangĩhota gũtũiguĩra tha maũndũ-inĩ maitũ ma kwaga hinya; ũrĩa twĩ nake aanagerio maũndũ-inĩ mothe o ta ithuĩ, tiga atĩ ndaigana kwĩhia o na atĩa.

16Tondũ ũcio nĩtũthengererei gĩtĩ-inĩ-gĩa-ũthamaki kĩrĩa kĩa Wega wa Ngai tũũmĩrĩirie, nĩ getha tũkaiguĩrũo tha, na tuone Wega wake wa gũtũteithagia hĩndĩ ĩrĩa tũbataire.

← Chapter 3 Jump to: Chapter 5 →