Hebrews 5

Kikuyu Bible (IBUKU RĨRĨA ITHERU RĨA NGAI)

← Chapter 4 Jump to: Chapter 6 →

1RĨU-RĨ, mũthĩnjĩri-Ngai-mũnene o wothe aathurũo kũrĩ andũ, nĩatuagwo wa kũrũgamagĩrĩra andũ maũndũ-inĩ marĩa makoniĩ Ngai nĩ getha arutage maruta o na magongona nĩ ũndũ wa mehia.

2Nake nĩahotaga gũkirĩrĩria arĩa matarĩ ogĩ na arĩa mahĩtagia, ahoreire, kuona atĩ we mwene nĩatangĩkaga nĩ kwaga hinya.

3Na tondũ ũcio nĩabatairio nĩ kũrutaga horohio nĩ ũndũ wa mehia make mwene, o ta ũrĩa amĩrutaga nĩ ũndũ wa mehia ma kĩrĩndĩ.

4Na gũtirĩ mũndũ wĩheaga gĩtĩo kĩu we mwene, tiga o akorirũo etĩtwo nĩ Ngai o ta ũrĩa Haruni etirũo.

5Ũguo no taguo Kristo nake ataigana gwĩkumia we mwene atĩ atuwo mũthĩnjĩri-Ngai-mũnene, nĩ gũtuwo aatuirũo nĩ ũrĩa wamwĩrire atĩrĩ: Wee nĩwe Mũrũ wakwa, niĩ ũmũthĩ nĩndagũciara:

6na ta ũrĩa oigire handũ hangĩ, atĩrĩ, Wee wĩ mũthĩnjĩri-Ngai o nginya tene, O ta ũrĩa Melikisedeki aatariĩ.

7Ũcio-rĩ, o matukũ marĩa aatũire arĩ na mwĩrĩ, nĩaahoire na agĩthaitha Ngai, agĩkayaga mũno na agĩitaga maithori, o we ũngĩhota kũmũhonokia amũrute gĩkuũ-inĩ, agĩkĩiguwo tondũ nĩaamwĩtigĩrĩte akamũtĩa.

8Nake o na aarĩ Mũriũ-rĩ, nĩerutire gwathĩka nĩ ũndũ wa ũrĩa aanyamarĩkire.

9Na aakĩrĩkia gũtuwo mwagĩrĩru kũna, agĩtuĩka kĩhumo kĩa ũhonokio ũrĩa ũtagathira kũrĩ arĩa othe mamũiguaga.

10Na nĩaatuirũo nĩ Ngai mũthĩnjĩri-Ngai-mũnene o ta ũrĩa Melikisedeki aatariĩ.

11Na rĩrĩ, ha ũhoro wake, twĩ na maũndũ maingĩ ma kũmwĩra me hinya magĩtaũrũo, kuona atĩ nĩmũtuĩkĩte aritu mũkĩigua.

12Nĩ ũndũ-rĩ, o na mwagĩrĩirũo nĩ gũtuĩka arutani rĩu nĩ ũndũ wa ihinda rĩrĩa mũikarangĩte, nĩmũbatairio rĩngĩ nĩ mũndũ wa kũmũrutaga morutani marĩa mahũthũ, marĩa maambagĩrĩria kũrutanwo ma mohoro ma Ngai; mũgagĩkorũo mũrĩ andũ mabataire nĩ kũheo o iria, no ti irio nyũmũ.

13Nĩ ũndũ mũndũ o wothe ũnyuaga o iria nĩ mũndũ ũtahũthĩire ũhoro ũrĩa wa ũthingu; amu no rũkenge.

14No irio iria nyũmũ nĩ cia andũ arĩa agima, o arĩa mahũthĩire gũkũũrana wega na ũũru, nĩ ũndũ wa ũrĩa monire ihinda rĩa kwĩmenyeria gwĩka ũguo.

← Chapter 4 Jump to: Chapter 6 →