John 14

Kikuyu Bible (IBUKU RĨRĨA ITHERU RĨA NGAI)

← Chapter 13 Jump to: Chapter 15 →

1MŨTIGATANGĨKE ngoro; nĩmwĩhokete Ngai, na niĩ mwĩĩ’hoke.

2Nyũmba ya Awa kwĩ na itũũro nyingĩ; gũtangĩrĩ ũguo, ingĩrĩ kũmwĩra; nĩ gũkorũo ngũthiĩ kũmũthondekera handũ.

3Na ndathiĩ ndamũthondekera handũ, nĩ gũcoka ngacoka, ndĩmũtware mũgaikarage o harĩ niĩ, nĩguo harĩa ndĩ, na inyuĩ mũgĩage ho.

4Na kũu ngũthiĩ, nĩmũũĩ njĩra yakuo.

5Toma akĩmwĩra, Mwathani, ithuĩ tũtiũĩ kũrĩa ũgũthiĩ; nayo njĩra-rĩ, twakĩmĩmenya atĩa?

6Nake Jesu akĩmwĩra atĩrĩ, Nĩ niĩ njĩra, na nĩ niĩ ũhoro-ũrĩa-wa-ma, na nĩ niĩ muoyo; gũtirĩ mũndũ ũkinyaga gwĩ Ithe witũ, atokĩire harĩ niĩ.

7Niĩ mũngĩra’menyete, mũngĩramenyete Awa o nake; rĩu thutha ũyũ mũgũtũũra mũmũũĩ, o na kũmuona nĩmũmuonete.

8Filipu akĩmwĩra, Mwathani, tuonie Ithe witũ, na tũkũiganwo.

9Nake Jesu akĩmwĩra atĩrĩ, Githĩ ndũire na inyuĩ hingo ĩigana ũũ, nawe, Filipu, ũkaaga kũ’menya? mũndũ ũnyonete niĩ nĩonete Ithe witũ; nĩ atĩa tondũ wanjĩra, Tuonie Ithe witũ?

10Kaĩ ũtetĩkĩtie atĩ niĩ ndĩ thĩinĩ wa Ithe witũ, nake Ithe witũ e thĩinĩ wakwa? Ciugo iria ndĩmwĩraga inyuĩ ndiugaga ndĩĩĩrĩte niĩ mwene; Ithe witũ nĩwe wĩkaga maũndũ make atũire thĩinĩ wakwa.

11Njĩtĩkiai atĩ ndĩ thĩinĩ wa Ithe witũ, nake Ithe witũ e thĩinĩ wakwa; kana mwĩke atĩrĩ, mũnjĩtĩkie nĩ ũndũ wa mawĩko macio mo mene.

12Ndamwĩra atĩrĩ, o ma, ma, Ũrĩa wĩĩ’hokete-rĩ, maũndũ marĩa niĩ njĩkaga, we no ameke o nake; o na eke manene kwĩ macio, nĩ ũndũ ndathiĩ gwĩ Ithe witũ.

13Naguo ũndũ o wothe mũkahoya na rĩĩtwa rĩakwa, nĩngawĩka, nĩ getha Ithe witũ agoocithagio na ũndũ wa Mũriũ.

14Niĩ mwa’hoya ũndũ o ũrĩkũ na rĩĩtwa rĩakwa, nĩngawĩka.

15Akorũo nĩmũnyenda-rĩ, mũrĩmenyagĩrĩra maathani makwa.

16Na niĩ nĩngahoya Ithe witũ, nake nĩakamũhe Mũteithia ũngĩ, aikarage na inyuĩ tene na tene,

17na nĩwe Roho ũrĩa wa ma, ũrĩa ũtangĩhota gwĩtĩkĩrũo nĩ kĩrĩndĩ gĩa gũkũ thĩ, nĩ gũkorũo gĩtimuonaga, o na gĩtimũũĩ; inyuĩ-rĩ, nĩmũramũmenya, nĩ gũkorũo nĩatũire o na inyuĩ, na nĩakamũikara o ngoro thĩinĩ.

18Ndikũmũtiga ta ciana cia ngoriai; nĩ gũũka ngũũka kũrĩ inyuĩ.

19Gũtigairie ihinda inyinyi, kĩrĩndĩ gĩa gũkũ thĩ kĩage gũcoka kũnyona, ĩndĩ inyuĩ nĩmũrĩnyonaga; na tondũ niĩ ndĩ muoyo, inyuĩ na inyuĩ no mũtũũre muoyo.

20Mũthenya ũcio nĩmũkamenya atĩ niĩ ndĩ thĩinĩ wa Awa, na inyuĩ mwĩ thĩinĩ wakwa, na niĩ ndĩ thĩinĩ wanyu.

21Ũrĩa ũikaraga na maathani makwa na akamamenyagĩrĩra-rĩ, ũcio nowe ũnyenda; nake ũrĩa ũnyenda nĩarĩendagwo nĩ Awa, o na niĩ nĩndĩĩmwendaga, na ndĩĩonithagie we.

22Nake Judasi (na ti ũrĩa Mũisikariota) akĩmũũria, Mwathani, kaĩ gũtuĩkĩte atĩa tondũ ũrĩtwĩonithagia ithuĩ, na ndwĩonithie kĩrĩndĩ gĩothe?

23Nake Jesu agĩcokia akĩmwĩra atĩrĩ, Mũndũ aakorũo nĩanyenda, arĩmenyagĩrĩra uuge wakwa; nake Awa nĩarĩmwendaga, na nĩtũrĩũka kũrĩ we, tũtũũranie nake.

24Ũrĩa ũtanyenda ndamenyagĩrĩra ciugo ciakwa; naguo ũhoro ũrĩa mũiguaga ti wakwa, nĩ wa Ithe witũ ũrĩa wandekirie.

25Maũndũ macio ndĩmwĩrĩte tũrĩ o na inyuĩ.

26No rĩrĩ, Mũteithia, o ũcio Roho Mũtheru, ũrĩa ũkarekio nĩ Ithe witũ na rĩĩtwa rĩakwa, we akamũruta maũndũ mothe, na amũririkanagie mohoro mothe marĩa ndanamũhe.

27Thayũ nĩguo ndamũtigĩra; thayũ wakwa nĩguo ndamũhe; ti ta ũrĩa kũheanagwo nĩ andũ a gũkũ thĩ, ti ũguo ndamũhe. Mũtigatangĩke ngoro, kana mũgĩe na guoya.

28Nĩmwaigua ũguo ndamwĩra atĩ, Nĩ gũthiĩ ngũthiĩ, na nĩngũũka kũrĩ inyuĩ. Mũngĩnyendete, nĩmũngĩakena, nĩ ũndũ ngũthiĩ gwĩ Ithe witũ; amu Ithe witũ nĩ mũnene kũrĩ niĩ.

29Na rĩu nĩndamũhe ũhoro ũtanakinya, atĩ nĩguo warĩkia gũkinya, mũgetĩkia.

30Ndigũcoka kwaria ũhoro mũingĩ na inyuĩ, tondũ mũnene wa gũkũ thĩ nĩegũũka; nake-rĩ, ndarĩ na ũndũ angĩona thĩinĩ wakwa;

31no rĩrĩ, gũgũtuĩka ũguo nĩ getha kĩrĩndĩ gĩa gũkũ thĩ kĩmenye nĩnyenda Ithe witũ, na kĩmenye atĩ o ũrĩa Ithe witũ aanjathire, noguo ngwĩka. Ũkĩrai, tũthiĩ.

← Chapter 13 Jump to: Chapter 15 →