John 18

Kikuyu Bible (IBUKU RĨRĨA ITHERU RĨA NGAI)

← Chapter 17 Jump to: Chapter 19 →

1JESU aarĩkia kwaria ũhoro ũcio, makiuma me na arutwo ake magĩthiĩ makĩringa karũũĩ getagwo Kidironi, magĩkinya handũ haarĩ mũgũnda, magĩtonya ho, we na arutwo ake.

2Na rĩrĩ, Judasi nake, ũrĩa wamũkunyanĩire, nĩoĩ handũ hau; nĩ gũkorũo Jesu nĩmaathiaga ho kaingĩ na arutwo ake.

3We Judasi-rĩ, aarĩkia kũheo mbũtũ ya thigari, o na makanga moimĩte kũrĩ athĩnjĩri-Ngai arĩa anene na Afarisai, magĩgĩũka ho me na matawa na icinga na indo cia ita.

4Nake Jesu agĩkiumĩra, oĩ maũndũ mothe marĩa akiriĩ kuona, akĩmoria, Nũ mũracaria?

5Makĩmũcokeria atĩrĩ, Nĩ Jesu ũrĩa Mũnazari. Nake Jesu akĩmera atĩrĩ, Nĩ niĩ. Judasi, ũcio wamũkunyanĩire, o nake nĩaarũngiĩ ho hamwe nao.

6O aakĩmera ũguo, atĩ, Nĩ niĩ, magĩcoka na thutha, makĩgũa thĩ.

7Agĩkĩmoria rĩngĩ atĩrĩ, Nũ mũracaria? Makiuga, Nĩ Jesu ũrĩa Mũnazari.

8Nake Jesu agĩcokia atĩrĩrĩ, Nĩndamwĩra nĩ niĩ; akorũo nĩ niĩ mũgũcaragia, no kĩrekei aya methiĩre;

9na nĩ getha kiugo kĩhingio, kĩrĩa oigire, atĩ, Andũ arĩa ũ’heete gũtirĩ o na ũmwe ndateire.

10Nake Simoni Petero, tondũ aarĩ na rũhiũ rũa njora, agĩkĩrũcomora, agĩikia ngombo ya mũthĩnjĩri-Ngai ũrĩa mũnene, akĩmĩtinia gũtũ kwa ũrĩo. Na rĩrĩ, ngombo ĩo yetagwo Malikũ.

11Nake Jesu agĩkĩĩra Petero atĩrĩ, Cokia rũhiũ njora-inĩ; gĩkombe kĩrĩa Ithe witũ a’heete, nĩ ndige gũkĩnyuĩra?

12Nayo mbũtũ ya thigari na mũnene wayo, o na makanga ma Ayahudi, magĩkĩnyita Jesu makĩmuoha,

13makĩamba kũmũtwara kwa Anasi, nĩ gũkorũo nĩwe warĩ mũthoni wa Kaiafa, ũrĩa warĩ mũthĩnjĩri-Ngai ũrĩa mũnene mwaka ũcio.

14Na rĩrĩ, ũcio Kaiafa nĩ ũrĩa wataarire Ayahudi, akiuga atĩ wega no mũndũ ũmwe akuĩre kĩrĩndĩ.

15Nake Simoni Petero akĩrũmĩrĩra Jesu, o na mũrutwo ũngĩ nake. Na rĩrĩ, mũrutwo ũcio ũngĩ nĩoĩo nĩ mũthĩnjĩri-Ngai ũrĩa mũnene, nake agĩtonyanĩra na Jesu nja ya mũthĩnjĩri-Ngai ũcio mũnene;

16ĩndĩ Petero agĩtigwo arũngiĩ mũromo-inĩ na ndatonye. Nake mũrutwo ũcio ũngĩ, ũcio woĩo nĩ mũthĩnjĩri-Ngai ũcio mũnene, agĩkiuma akĩarĩria mũikaria wa mũromo, agĩtonyia Petero.

17Nake mũirĩtu ũcio waikaragia mũromo agĩkĩũria Petero atĩrĩ, Kaĩ wee nawe wĩ mũrutwo wa mũndũ ũyũ? Nake akiuga, Aca, ndirĩ wake.

18Na rĩrĩ, ngombo cia kũu, na makanga, nĩ kũrũgama maarũgamĩte, maakĩtie mwaki wa makara, tondũ kwarĩ na heho, na nĩ guota motaga mwaki ũcio; Petero o nake aarĩ hamwe nao, akarũgama agota mwaki.

19Nake mũthĩnjĩri-Ngai ũrĩa mũnene agĩkĩũria Jesu ũhoro wa arutwo ake, na wa maũndũ marĩa aarutanaga.

20Nake Jesu akĩmũcokeria atĩrĩ, Niĩ-rĩ, ndũire njaragĩria kĩrĩndĩ hatarĩ hitho; hingo ciothe ndĩrarutagĩra andũ ũhoro mathunagogi, o na hekarũ-inĩ, o harĩa Ayahudi othe monganagĩra; na ndirĩ ũndũ ndanoiga na ngunguĩ.

21Niĩ wanjũria nĩ ũndũ kĩ? Ta kĩũrie arĩa maanaigua, ũmorie ũrĩa ndamerire; nĩo moĩ maũndũ marĩa ndoigire.

22Oiga ũguo, mũndũ ũmwe wa makanga warũngiĩ ho akĩgũtha Jesu na rũhĩ, akiuga atĩrĩ, Nĩguo wacokeria mũthĩnjĩri-Ngai ũrĩa mũnene?

23Nake Jesu akĩmũcokeria atĩrĩrĩ, Ongorũo nĩ ũũru ndoiga, onania ũũru ũcio; na ongorũo nĩndoiga wega, wakĩngũthĩra kĩ?

24Nake Anasi agĩkiuga atwarũo gwa Kaiafa, mũthĩnjĩri-Ngai ũrĩa mũnene, atwarũo arĩ o muohe.

25Na rĩrĩ, Simoni Petero nĩ kũrũgama aarũgamĩte agĩotaga mwaki. Agĩkĩũrio atĩrĩ, Anga wee nawe ũrĩ mũrutwo wake? Agĩkaana, akiuga, Aca, ndirĩ wake.

26Nayo ngombo ĩmwe ya mũthĩnjĩri-Ngai ũrĩa mũnene, na yarĩ ya kwa ũrĩa watinirio gũtũ nĩ Petero, ĩo ĩkĩũria, Githĩ niĩ ndikuonire mwĩ nake harĩa mũgũnda-inĩ?

27Nake Petero agĩgĩkaana rĩngĩ na kahinda o kau ngũkũ ĩkĩgamba.

28Nake Jesu magĩkĩmuumia gwa Kaiafa makĩmũtwara nyũmba-inĩ ĩrĩa ya gũcirĩrũo, na nĩ rũcinĩ tene; nao ene matiigana gũtonya nyũmba ĩo ya gũcirĩrũo thĩinĩ, matikagwatwo nĩ thahu, no mahote kũrĩa Bathaka.

29Tondũ ũcio Pilato akiuma nja kũu maarĩ, akĩũria, Mũndũ ũyũ-rĩ, mwamũthitakĩra kĩ?

30Magĩcokia makĩmwĩra atĩrĩ, Mũndũ ũcio atangĩrĩ mwĩkinaĩ-rĩ, nĩtũngĩakĩmũrehe kũrĩ wee?

31Nake Pilato agĩkĩmera, Mũtimũtware inyuene, mũkamũtuĩre cira kũringana na mawatho manyu. Nao Ayahudi makĩmwĩra atĩrĩ, Ithuĩ tũtirĩ na rũtha kũũragithia mũndũ;

32na nĩ getha kiugo kĩa Jesu kĩhingio, kĩrĩa oigire akĩorota gũkua kũrĩa agakua.

33Tondũ wa ũguo-rĩ, Pilato agĩcoka nyũmba-inĩ ĩrĩa ya gũcirĩrũo, agĩĩta Jesu, akĩmũũria, Wee nĩwe Mũthamaki wa Ayahudi?

34Nake Jesu agĩcokia atĩrĩrĩ, Ũkũũria ũguo wĩrĩtwo nĩ ngoro yaku mwene, kana nĩ andũ angĩ makwĩrire ũhoro wakwa?

35Nake Pilato agĩcokia atĩrĩ, Kaĩ ndĩ Mũyahudi niĩ? Anga ti rũrĩrĩ rũanyu na athĩnjĩri-Ngai arĩa anene maakũneana kũrĩ niĩ; nĩ atĩa wĩkĩte?

36Jesu agĩcokia atĩrĩrĩ, Ũthamaki wakwa ti wa na gũkũ thĩ; ũthamaki wakwa ũngĩrĩ wa gũkũ thĩ, audũ akwa mangĩrĩ kũruta mbaara, ndikaneo Ayahudi; no rĩrĩ, ũrĩa kũrĩ, ũthamaki wakwa ti wa na gũkũ.

37Tondũ ũcio Pilato akĩmũũria atĩrĩ, Anga ũkĩrĩ o mũthamaki, wee? Jesu agĩcokia atĩrĩrĩ, Wee nĩwoiga, amu ndĩ mũthamaki. Nĩkĩo ndaciarirũo, na nĩkĩo njũkĩte gũkũ thĩ, atĩ nduĩke mũira wa ũhoro-ũrĩa-wa-ma. Ũhoro-ũrĩa-wa-ma-rĩ, mũndũ o wothe waguo nĩaiguaga mũgambo wakwa.

38Pilato akĩmũũria, Ũhoro-wa-ma ũkĩrĩ ũrĩkũ? Na aarĩkia kuuga ũguo, akiuma nja rĩngĩ kũrĩ Ayahudi, akĩmera atĩrĩrĩ, Niĩ-rĩ, ndikuona ũũru ekĩte o na ũrĩkũ.

39No mwĩ na mũtugo atĩrĩ, atĩ hĩndĩ ya Bathaka ngamuohorera mũndũ ũmwe: rĩu-rĩ, mwenda ndĩmuohorere Mũthamaki wa Ayahudi?

40Nao magĩgĩitĩka rĩngĩ kwanĩrĩra, makiuga atĩrĩ, Ndũkohore ũyũ, ohora Baraba! Na rĩrĩ, Baraba ũcio aarĩ mũtunyani.

← Chapter 17 Jump to: Chapter 19 →