Philippians 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NĨ ithuĩ Paulo na Timotheo, ngombo cia Kristo Jesu, twamũgeithia inyuĩ andũ arĩa othe aamũre mwĩ thĩinĩ wa Kristo Jesu, arĩa mũtũire Filipi, hamwe na arori a maũndũ ma kanitha na atungati aguo.

2Mũrogĩa na Wega o na thayũ, ciumĩte kwĩ Ngai Ithe witũ, o na kwĩ Mwathani Jesu Kristo.

3Atĩrĩrĩi, nĩnjokagĩria Ngai wakwa ngatho mahinda marĩa mothe ndĩmũririkanaga inyuĩ:

4na rĩrĩa rĩothe ndĩmũthaithanagĩrĩra, nĩ kũhoya ndĩmũhoyagĩra ngenete,

5nĩ ũndũ wa ũrĩa tũgwatanĩire na inyuĩ kũhunjanĩria Ũhoro-ũrĩa-Mwega, kuuma o mũthenya ũrĩa wa kwambĩrĩria o nginya rĩu.

6Na ngakĩmenya ũndũ ũyũ na ma, atĩ we ũrĩa waambĩrĩirie wĩra mwega thĩinĩ wanyu nĩakaũrĩkia o nginya Mũthenya ũrĩa wa Jesu Kristo.

7Na rĩrĩ, nĩnjagĩrĩirũo nĩ kũmwĩciragĩria ũguo inyuothe, tondũ nĩmũtũũraga ngoro-inĩ yakwa, kuona atĩ inyuothe nĩmũtũire mũgwatanĩire Wega wa Ngai hamwe na niĩ, ũhoro-inĩ wakwa wa kuohwo, na wa kũrũĩrĩra Ũhoro-ũrĩa-Mwega, o na wa kũwĩkĩra hinya.

8Nĩ ũndũ Ngai nĩwe mũira wakwa wa ũrĩa ndĩmwĩriragĩria inyuothe ndĩ na tha o iria ii na Kristo Jesu.

9Na ũrĩa ’hoyaga nĩ atĩrĩ, atĩ wendani wanyu ũingĩhage o kũingĩha makĩria, mũkĩongagĩrĩrũo ũmenyi o na ũkuũku wothe,

10nĩ getha mũhotage gũkũũrana maũndũ mũgĩthuraga marĩa maagĩrĩire kũrĩ marĩa mangĩ, na mũtũũre mũtarĩ na ũhinga, na mũtarĩ ũndũ ũngĩmũhĩtithia, o nginya rĩrĩa Mũthenya wa Kristo ũgakinya;

11na ningĩ atĩ mũtũũre mũiyũrĩtwo nĩ maciaro ma ũthingu, marĩa monekaga na ũndũ wa Jesu Kristo, nĩ getha Ngai agoocagwo na akumagio.

12Na rĩrĩ, ariũ a Ithe witũ, nĩngwenda mũmenye atĩ maũndũ marĩa maanangora, ti-itherũ nĩmatuĩkĩte ma gũtũma Ũhoro-ũrĩa-Mwega ũthiage na mbere;

13gũgakĩmenyeka nĩ athigari othe a mbũtũ ya mũthamaki, o na andũ arĩa angĩ othe, atĩ nĩ kuohwo njohetwo nĩ ũndũ wa Kristo;

14nao ariũ a Ithe witũ arĩa aingĩ nĩmehokete Mwathani o makĩria tondũ wa ũhoro ũcio wakwa wa kuohwo, magakĩrĩrĩria kũũmĩrĩria kwaria Ũhoro wa Ngai matarĩ na guoya.

15Ti-itherũ nĩkũrĩ andũ amwe mahunjagia ũhoro wa Kristo nĩ ũndũ wa ũiru na ngarari; andũ angĩ maũhunjagia me na ngoro njega.

16Acio-rĩ, maũhunjagia nĩ ũndũ wa wendani, mamenyete atĩ nĩnduĩtwo wa kũrũagĩrĩra Ũhoro-ũrĩa-Mwega;

17ĩndĩ acio angĩ-rĩ, no kũhunjia mahunjagia ũhoro wa Kristo nĩ ũndũ wa ũrĩa makoragwo me na muku, na ti ngoro theru, magĩĩciragia atĩ meka ũguo nĩmekũnyongererithia thĩna wa kuohwo gwakwa.

18Ũguo nĩ atĩa kũrĩ? No atĩrĩ, atĩ ũhoro wa Kristo nĩũhunjanagĩrio na njĩra ciothe, o na ingĩtuĩka nĩ cia ũhinga, o na kana cia ũhoro-wa-ma: na tondũ wa ũguo nĩngenaga, ĩĩ-ni, o na nĩndĩĩkenaga.

19Nĩ gũkorũo nĩnjũĩ atĩ ũhoro ũcio nĩũkangarũrũkĩra ũtuĩke wa kũ’honokia nĩ ũndũ wa ũrĩa mũ’hoyagĩra, na ningĩ nĩ ũndũ wa ũrĩa Roho wa Jesu Kristo ũheanagwo,

20o ta ũrĩa ndĩĩriragĩria ngĩambambaga, ngerĩgagĩrĩra atĩ hatirĩ ũndũ o wothe ngona wa kũnjonora, tiga atĩ rĩu, o ta ũrĩa ndũire hĩndĩ ciothe-rĩ, no ngoragwo nyũmĩrĩirie mũno, nĩ getha ndũme Kristo akumagio na ũndũ wa mwĩrĩ wakwa, ingĩkorũo ndĩ o muoyo o na kana nguĩte.

21Nĩ ũndũ harĩ niĩ-rĩ, gũtũũra muoyo nĩkuo Kristo; nakuo gũkua-rĩ, nĩkuo kwĩ na uumithio.

22No rĩrĩ, kũngĩkorũo gũtũũra muoyo ndĩ na mwĩrĩ nĩkuo kũngĩtũma wĩra wakwa ũciare maciaro-rĩ, hau kaĩ ndingĩmenya ũrĩa ingĩthura-ĩ!

23Njikaraga ’hinyĩrĩirio nĩ maũndũ maya merĩ, nĩ gũkorũo ndĩĩriragĩria gũthiĩ ngatũũre na Kristo, nĩ ũndũ ũguo nĩguo wega mũno makĩria;

24ĩndĩ nĩ ũndũ wanyu-rĩ, gũtũũra muoyo ndĩ na mwĩrĩ, nĩkuo kwĩ bata makĩria.

25Na rĩrĩ, nĩ ũndũ wa ũrĩa ’menyete ũguo mũno, nĩnjũĩ atĩ nĩ gũtũũra ngũtũũra muoyo, o na tũtũũranie na inyuĩ inyuothe, nĩ getha ndũme mũthiage na mbere, na mũgĩage na gĩkeno nĩ ũrĩa mwĩtĩkĩtie;

26na nĩguo mũkaingĩhĩrũo nĩ ũhoro wa kwĩraha nĩ ũndũ wakwa, mwĩ thĩinĩ wa Kristo Jesu, ndagĩkorũo ndĩmũcokereire.

27No rĩrĩ, wĩmenyagĩrĩrei mũthiage na mĩthiĩre ĩrĩa yaganĩrĩire na Ũhoro-ũrĩa-Mwega wa Kristo, nĩ getha ingĩũka kũmũrora, o na kana njage gũũka-rĩ, njikarage ngĩiguaga ũhoro wanyu, atĩ nĩmũikaraga mũrũmĩte wega, mwĩ na roho o ro ũmwe, o na mũkarũagĩrĩra, mwĩ na ngoro o ro ĩmwe, Ũhoro-ũrĩa-Mwega ũrĩa mwĩtĩkĩtie;

28ningĩ atĩ nĩmũikaraga mũtekũmakio nĩ amuku anyu o na hanini. Naguo ũndũ ũcio nĩguo kĩmenyithia gĩa kũmamenyithia wega atĩ makiriĩ kũũra biũ; no ha ũhoro wanyu-rĩ, nĩ kĩmenyithia gĩa atĩ mũkiriĩ kũhonokio na ũhonokio uumĩte o kwĩ Ngai.

29Nĩ ũndũ-rĩ, ha ũhoro wa Kristo, inyuĩ nĩmwĩtĩkĩrĩtio kũmwĩhoka, na to kũmwĩhoka gwiki, no ningĩ kũnyamarĩka nĩ ũndũ wake:

30mũkĩrũaga mbaara o ro ĩrĩa mwanyonaga ngĩrũa, na noyo mũiguaga atĩ nĩndũaga o na rĩu.

Jump to: Chapter 2 →