Philippians 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1KŨNGĨGĨKORŨO kũrĩ ũndũ wa kũũmanĩrĩria wĩ thĩinĩ wa Kristo, o na kana ũndũ wa kũhorerania uumanĩte na wendani, o na kana ngwatanĩro o yothe yumĩte kwĩ Roho, o na kana ũhoro wa kũiguanĩra tha na wa kũiguanĩra ruo-rĩ,

2tũmagai gĩkeno gĩakwa kĩiganĩre kũna, nĩ gũtũũra mwĩciragia meciria ma mũthemba o ũmwe, o na mwendaine na wendani o ro ũmwe, mũkĩiguanaga, na mũrĩ a ngoro o ĩmwe.

3Ningĩ mũtikaneke ũndũ o ũrĩkũ mwĩ na muku kana mwĩgatho; nĩ kaba mũikarage mwĩnyihĩtie, o mũndũ agĩtuaga ũrĩa ũngĩ mwega kũrĩ we mwene;

4na mũtikamenyagĩrĩre o mũndũ maũndũ make moiki, no makĩria o mũndũ nĩamenyagĩrĩre maũndũ ma andũ arĩa angĩ o namo.

5Gĩagai na ngoro o ĩrĩa yarĩ na Kristo Jesu.

6We-rĩ, o na aaikarĩte ahaanaine na Ngai, ndonire atĩ kũiganana na Ngai nĩ ũndũ wa gũkumbatĩrio,

7no gwĩcuuma ecuumire, agĩikara ahaanaine na ngombo, agĩgĩtuĩka wa kũhaananio na andũ a gũkũ thĩ.

8Nake aagĩkorũo ahaana ta mũndũ-rĩ, akĩĩnyihia we mwene, agĩgĩathĩka, o kinya akĩũragwo, o kũũragwo kũrĩa kwa mũtharaba-inĩ.

9Na nĩ ũndũ wa ũguo, Ngai nĩaamũtũũgĩririe mũno, akĩmũtua rĩĩtwa o rĩrĩa rĩkĩrĩte marĩĩtwa mothe;

10nĩguo atĩ thĩinĩ wa rĩĩtwa rĩa Jesu maru mothe maturagio, o kũrĩa Igũrũ, o na gũkũ thĩ, o na ruungu rũa thĩ;

11o na ningĩ atĩ nĩmĩ ciothe ciumbũrage atĩ Jesu Kristo nĩwe Mwathani, nĩ getha Ngai Ithe witũ agoocagwo.

12Tondũ ũcio, endwa akwa-rĩ, o ta ũrĩa mũtũire mwathĩkaga hingo ciothe, na to rĩrĩa ndarĩ hamwe na inyuĩ, no makĩria rĩu itarĩ ho, rutagĩrai ũhonokio wanyu wĩra, mũgĩĩtigagĩra na mũkĩinainaga:

13nĩ gũkorũo Ngai nĩwe ũrutaga wĩra thĩinĩ wanyu, akamwendithagia maũndũ make, agagĩtũma mũmekage, nĩ ũndũ wa ũrĩa enda gũtugana.

14Ĩkagai maũndũ mothe mũtekũng’ong’oranĩra na mũtegũkararania,

15nĩ getha mũtuĩke andũ matangĩcukĩka na maagĩte ũũru, o ciana cia Ngai itarĩ na kaũũgũ, mũtũũranĩtie na andũ a rũciaro rũrĩ ruogomu na rũtũrĩku; na rĩrĩa mũrĩ hamwe nao, muonagwo ta mũrĩ motheri-ma-igũrũ matheragĩra gũkũ thĩ,

16mũkĩonanagia ũhoro wa muoyo. Ikagai ũguo nĩ getha ngagĩa na ũndũ wa kwĩrahĩra Mũthenya ũrĩa wa Kristo, na nĩguo atĩ mĩthiĩre ĩrĩa ndathiaga nayo ndĩarĩ ya tũhũ, o naguo wĩra ũrĩa ndarutaga ngĩĩnogagia ndwarĩ wa tũhũ.

17Na rĩrĩ, o na thakame yakwa ĩngĩitwo igũrũ rĩa igongona rĩanyu rĩrĩa mũrutagĩra Ngai mũkĩmũtungatagĩra, na nĩrĩo wĩtĩkio wanyu-rĩ, nĩ gũkena ngenaga na ngacanjamũka hamwe na inyuĩ inyuothe:

18o na inyuĩ no kinya mũkenage na mũcanjamũke hamwe na niĩ.

19No rĩrĩ, nĩnjĩrĩgĩrĩire, ndĩ thĩinĩ wa Mwathani Jesu, atĩ nĩndĩĩmũtũmĩra Timotheo thutha wa matukũ manyinyi, nĩ getha nganyamarũrũo wega ngoro ndamenya ũhoro wanyu ũrĩa ũikaire.

20Nĩ gũkorũo ndirĩ na mũndũ ũngĩ ũndũkĩtie ngoro take ũrĩa ũngĩmũhang’ĩra na ma.

21Tondũ arĩa angĩ othe-rĩ, mabataragio no maũndũ mao ene, na ti maũndũ ma Jesu Kristo.

22No rĩrĩ, nĩmũũĩ ũrĩa amenyekete arĩ mwega, mũkamenya atĩ, o ta ũrĩa mwana atungatagĩra ithe, noguo aatũire atungatanagĩra hamwe na niĩ tũkĩhunjia Ũhoro-ũrĩa-Mwega.

23Na rĩrĩ, nĩwe njĩrĩgĩrĩire atĩ ngũmũtũmĩra narua, ndarĩkia kũmenya ũrĩa ũhoro wakwa ũrĩikara:

24no nĩndĩĩhokaga Mwathani atĩ nĩarĩ’hotithia gũũka niĩ mwene, thutha wa matukũ manyinyi.

25No rĩrĩ, nĩnyonete atĩ nĩmbatairio nĩ kũmũtũmĩra Epafarodito, mũrũ wa Ithe witũ ũrĩa tũrutithanagia wĩra nake, o ũrĩa ningĩ tũrũagĩrĩra Ũhoro wa Ngai nake; na nĩwe mũtũmwo wanyu o na ndungata ya kũndungatagĩra mabataro-inĩ makwa.

26Nĩ gũkorũo nĩaamwĩriragĩria inyuothe, na agatũũra aiguĩte kĩeha nĩ ũndũ wa ũrĩa mwaiguĩte atĩ aarĩ mũrũaru:

27na ti-itherũ nĩehĩirũo mũno, agakuhĩhĩria gũkua. No Ngai nĩaamũiguĩrĩire tha: na towe wiki, o na niĩ nĩaanjiguĩrĩire tha, nĩguo ndikae kũrũndĩrĩrũo mathĩna.

28Nĩ ũndũ wa ũguo, nĩndamũtũma ndĩĩendeire mũno makĩria, nĩ getha mũgakena mwonana nake rĩngĩ, na hĩndĩ ĩo, o na niĩ ’nyihanyihĩrũo nĩ kĩeha.

29Tondũ ũcio-rĩ, mũkũngũĩrei thĩinĩ wa Mwathani, mũkenete mũno: nao andũ arĩa matariĩ take-rĩ, matĩagei:

30nĩ gũkorũo nĩaakuhĩhĩirie gũkua nĩ ũndũ wa ũrĩa aarutaga wĩra wa Kristo, ategũcaĩra muoyo wake nĩ getha andungatagĩre ithenya rĩanyu, harĩa mwatigarĩtie.

← Chapter 1 Jump to: Chapter 3 →