Romans 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NĨ niĩ Paulo, ngombo ya Jesu Kristo, ngwandĩka marũa maya, o niĩ ndetirũo nduĩke mũtũmwo, ngĩkĩamũrũo ’hunjagie Ũhoro-ũrĩa-Mwega wa Ngai,

2ũrĩa eranĩire o mbere na tũnua twa anabii ake Maandĩko-inĩ marĩa matheru,

3o ũrĩa ũkoniĩ Mũrũwe, waciarirũo arĩ wa mbeũ ya Daudi ha ũhoro wa mwĩrĩ,

4ningĩ ha ũhoro wa roho ũrĩa aarĩ naguo wa ũtheru akĩonanio na wĩko wa hinya atĩ nĩwe Mũrũ wa Ngai tondũ wa ũrĩa aariũkire akiuma kũrĩ arĩa akuũ, o we Jesu Kristo Mwathani Witũ.

5Nĩwe wanginyithĩirie Wega wa Ngai na agĩtũma nduĩke mũtũmwo, nĩ getha andũ a ndũrĩrĩ ciothe matuĩke aathĩku ũhoro-inĩ wa wĩtĩkio, nĩguo rĩĩtwa rĩake rĩĩkagĩrĩrũo;

6na inyuĩ mũrĩ aho, mũgetwo o na inyuĩ mũtuĩke a Jesu Kristo.

7Inyuothe mũtũire kũu Roma, inyuĩ ende nĩ Ngai, mũgagĩĩtwo mũtuĩke aamũre-rĩ, nĩ inyuĩ ngwandĩkĩra marũa maya. Mũrogĩa na Wega, o na thayũ, ciumĩte kwĩ Ngai Ithe witũ o na Mwathani Jesu Kristo.

8Atĩrĩrĩ, o mbere ngwamba gũcokeria Ngai wakwa ngatho, ndĩ thĩinĩ wa Jesu Kristo, nĩ ũndũ wanyu inyuothe, nĩ ũndũ ũhoro wa wĩtĩkio wanyu nĩũhunjagio thĩ yothe.

9Amu Ngai, ũcio ndungatagĩra na roho wakwa ngĩhunjia Ũhoro-ũrĩa-Mwega wa Mũrũwe-rĩ, nĩwe mũira wakwa wa ũrĩa itatigaga kũmũgweta inyuĩ mahoya-inĩ makwa,

10ngahoyaga o hĩndĩ ciothe kana hihi rĩu, Ngai angĩenda, ndaya gũteithio nginye kũrĩ inyuĩ hatarĩ kĩgiria.

11Nĩ ũndũ-rĩ, nĩnyendete mũno tuonane na inyuĩ, nĩ getha ndĩmũgaĩre kĩheo, o na arĩ kĩrĩkũ, kĩa roho, kiumanĩte na Wega wa Ngai, nĩguo muongererũo hinya:

12ũguo nĩ ta kuuga atĩrĩ, tũgakĩũmanĩrĩrie nĩ ũndũ wa ũrĩa inyuĩ o na niĩ twĩtĩkĩtie, o mũndũ omĩrĩrie ũrĩa ũngĩ na wĩtĩkio wake.

13Ariũ a Ithe witũ, ndikwenda mwage kũmenya atĩ nĩ kaingĩ ndanoiga njũke kũrĩ inyuĩ, nĩ getha o na thĩinĩ wanyu ngagĩe na maciaro o ta ũrĩa ndĩ namo thĩinĩ wa ndũrĩrĩ iria ingĩ, na nginya rĩu nĩ kũgirio ndũire ngiragio.

14Niĩ-rĩ, ’haana ta ndĩ na thirĩ na Ayunani o na Acenji, ngakĩgĩa naguo na andũ arĩa mohĩgĩte o na arĩa matohĩgĩte.

15Nĩ ũndũ wa ũguo, niĩ hakwa-rĩ, njikaraga ndĩĩhaarĩirie kũhunjia Ũhoro-ũrĩa-Mwega o na kũrĩ inyuĩ a kũu Roma.

16Nĩ ũndũ Ũhoro-ũcio-Mwega-rĩ, ndingĩũconokera, tondũ nĩguo wĩ na hinya wa Ngai wa gũtũma mũndũ o wothe ũrĩa ũwĩtĩkĩtie ahonoke, o mbere Ayahudi, na thutha wao Ayunani.

17Tondũ-rĩ, thĩinĩ waguo ũthingu wa Ngai nĩũguũrĩtio, ũrĩa ũgĩagwo naguo nĩ ũndũ wa gwĩtĩkia, na kuuma ũkoimaga o wĩtĩkio, o ta ũrĩa haandĩkĩtwo atĩrĩ, Mũndũ ũrĩa mũthingu-rĩ, arĩtũũraga muoyo nĩ ũndũ wa gwĩtĩkia.

18Amu-rĩ, marakara ma Ngai nĩ maguũrie moimĩte Igũrũ, magũĩre ũhoro wothe wa andũ kũregana na Ngai, o gwata maũndũ mothe matarĩ ma ũthingu ma andũ arĩa magiragĩrĩria ũhoro-ũrĩa-wa-ma na maũndũ macio mekaga matarĩ ma ũthingu.

19Nĩ ũndũ-rĩ, maũndũ ma Ngai marĩa mangĩhota kũmenyeka, matiagĩte kũmenyeka nĩo, amu Ngai nĩwe wamamenyithirie.

20Nĩ gũkorũo, gwata hĩndĩ ĩrĩa thĩ yombirũo, maũndũ make marĩa matonekaga - na nĩmo hinya wake ũrĩa ũtũũraga o ho, o naguo ũngai wake-rĩ, - nĩmonagwo wega tondũ wa ũrĩa makũũranĩkaga nĩ ũndũ wa indo iria ciombirũo. Na tondũ wa ũguo andũ matingĩgĩa na kĩĩgwatio.

21Nĩ ũndũ-rĩ, o na harĩa maamenyete Ngai, matiigana gũtũũra mamũgoocaga ta arĩ Ngai, o na kana kũmũcokagĩria ngatho: no rĩrĩ, magĩkĩgĩa na matarania ma tũhũ, nacio ngoro ciao itarĩ nguũku ikĩgĩa nduma.

22Na hĩndĩ ĩrĩa moigaga atĩ nĩ ogĩ-rĩ, nĩrĩo maagĩtuĩkire o irimũ,

23magĩtigana na riri wa Ngai, o we ũtarĩ wa kũbutha, makĩwĩkũũranĩria na mĩhianano mĩhaanie ta andũ, nao nĩmabuthaga, na ta nyamũ iria irĩ njoya, na nyamũ cia magũrũ mana, na iria itambaga thĩ.

24Nĩ ũndũ ũcio, Ngai akĩmarekereria marũmagĩrĩre maũndũ marĩa mathũku marĩa ngoro ciao cieriragĩria, o nginya maninanagĩre gĩtĩo kĩa mĩĩrĩ yao, mũndũ na ũrĩa ũngĩ:

25na gĩtũmi nĩ ũndũ nĩmaatiganĩte na ũhoro-wa-ma wa Ngai makawĩkũũranĩria na ũhoro wa maheni, magagĩthathayagia indo iria ciombirũo, na magacitungatagĩra, handũ ha Mũciũmbi, o ũcio wa kũgathagwo tene na tene. Amen.

26Nĩkĩo Ngai aakĩmarekereirie manyitwo nĩ thuti cia maũndũ ma thoni mũno, amu-rĩ, andũ-a-nja ao nĩmaagwatire kũgarũra mũtugo wao ũrĩa wa ndũire, mekage ũrĩa ũtarĩ wa ndũire.

27O nao andũ arũme, o ũndũ ũmwe, magĩtiga mũtugo wa ndũire ũrĩa ũkoniĩ andũ-a-nja, makahĩahĩaga nĩ gwĩcumĩkanĩra o ene, o nginya magakorũo magĩĩka maũndũ mataagĩrĩire na arũme arĩa angĩ, na magakĩgwata thĩinĩ wa mĩĩrĩ yao ene ngerenwa ĩrĩa ĩmerekereire nĩ ũndũ wa mahĩtia macio mao.

28O na rĩrĩ, tondũ wa ũrĩa matonaga arĩ wega gũtũũra mamenyete ũhoro wa Ngai, we Ngai agĩkĩmarekereria marũmagĩrĩre meciria ma ũgenyũ, mekage maũndũ marĩa mataagĩrĩire.

29Makĩiyũrũo nĩ maũndũ mothe marĩa matarĩ ma ũthingu, na marĩa ma waganu, na ũhahami, na gwĩkana ũũru; magakĩiyũrũo o kũiyũrũo nĩ ũhoro wa rũitho, na ũũragani, na mbaara, na ũhinga, o na wĩĩ, magagĩtuĩka nĩ acukani,

30na a gĩcambanio, na athũũri Ngai, ningĩ nĩ ng’enyũ, na etĩi, na egani, na a gũthugunda waganu mwerũ, na a kũremaga aciari ao;

31nao gũkuũka ti akuũku wega, na nĩ athatia a ũhoro mũrĩkanĩre, na makaaga wendani ũrĩa wagĩrĩire, o na matirĩ mũndũ mangĩiguĩra tha.

32Nao-rĩ, o na maatuĩka atĩ nĩmoĩ o wega watho ũrĩa Ngai aatuire, atĩ andũ arĩa mekaga maũndũ ta macio maagĩrĩirũo nĩ kũũragwo-rĩ, to gwĩka mekaga maũndũ macio, no ningĩ nĩmetĩkanagĩra na andũ arĩa angĩ mamekaga.

Jump to: Chapter 2 →