Romans 13

Kikuyu Bible (IBUKU RĨRĨA ITHERU RĨA NGAI)

← Chapter 12 Jump to: Chapter 14 →

1O mũndũ o wothe nĩaiguage arĩa matuĩtwo aathani; nĩ ũndũ hinya wa gwathana gũtirĩ tiga ũrĩa ũheanĩtwo nĩ Ngai, nao aathani arĩa me ho nĩ Ngai ũmatuĩte a gwathana.

2Tondũ ũcio-rĩ, mũndũ ũkũrega kũigua wathani ũcio, nĩ kũrega ararega ũndũ ũrĩa mũtue nĩ Ngai; nao acio maregaga gwathĩka nĩmarĩgwataga haaro.

3Nĩ gũkorũo anene ti a kũmakagia arĩa mekĩte wega tiga arĩa mekĩte ũũru. Wee-rĩ, nĩũkwenda gũtũũra ũtetigagĩra wathani ũcio? No gĩĩke atĩrĩ, wĩkage o maũndũ marĩa mega, na nĩ kũgathwo ũrĩgathagwo nĩ ũrĩa wĩ naguo,

4amu ũcio nĩ ndungata ya Ngai ya gũtũma wonage maũndũ mega. No rĩrĩ, ũngĩĩka ũũru-rĩ, no wĩtigĩre; nĩ ũndũ rũhiũ rũu akuuaga ndarũkuuagĩra tũhũ: we nĩ ndungata ya Ngai, na mũrĩhania wake wa gũkinyagĩria andũ arĩa mekaga ũũru marakara.

5Tondũ ũcio-rĩ, no kinya mwathĩkage, na to ũndũ wa gwĩtigĩra marakara macio, no ningĩ nĩ ũndũ wa ũrĩa mwĩmenyeire na thamiri atĩ ũguo nĩguo wega.

6O naguo ũndũ ũcio nĩguo ũtũmaga mũrute igoti; nĩ gũkorũo acio nĩ atungati a Ngai a kũrutaga wĩra wake, na wĩra o ũcio kĩũmbe nĩguo marũmanagĩrĩra naguo na kĩyo hingo ciothe.

7Atĩrĩrĩi, rutagĩrai andũ othe o kĩrĩa maagĩrĩirũo nĩ kũrutĩrũo: arĩa a kũrutĩrũo igoti, marutagĩrei; arĩa a kũhotherũo, mahothagĩrei; arĩa a gwĩtigĩrũo, metigagĩrei; nao arĩa a gwĩkĩrĩrũo, mekagĩrĩrei.

8Mũtikanaikare mwĩ na thirĩ na mũndũ o na ũrĩkũ, tiga o mwendanage; nĩ ũndũ mũndũ ũkĩendete ũrĩa ũngĩ nĩahingĩtie watho.

9Amu maathani maya, atĩ, Ndũkanatharanie, Ndũkanoragane, Ndũkanaiye, Ndũkanacumĩkĩre kĩndũ kĩene, o na akorũo kũrĩ o rĩathani rĩngĩ-rĩ, mohanĩtio mothe thĩinĩ wa kiugo gĩkĩ, atĩrĩ, Enda mũndũ ũrĩa ũngĩ o ta ũrĩa wĩendete wee mwene.

10Wendani-rĩ, ndũngĩreka ũrĩa wĩ naguo eke mũndũ ũrĩa ũngĩ ũũru: na tondũ ũcio kwendana nĩkuo kũhingia kwa watho.

11Na mũnyite ũhoro ũcio nĩ kũmenya ũrĩa hĩndĩ ĩno tũrĩ ĩtariĩ, atĩ rĩu thaa nĩ nginyu mũgurumũke toro, nĩ gũkorũo rĩu ũhoro witũ wa kũhonokio ũrĩ hakuhĩ kũrĩ rĩrĩa twaambĩrĩirie gwĩtĩkia.

12Ũtukũ nĩ ta ũthirĩte, naguo mũthenya nĩũkiriĩ gũkinya: nĩtũgĩteaniei maũndũ marĩa mekagwo nduma-inĩ, twĩohe indo-cia-ita iria cia ũtheri.

13Nĩtũthiage na mĩthiĩre mĩega, ta ĩrĩa yagĩrĩire gũikarũo nayo mũthenya; tũtigagĩtuĩke a gũikaraga maruga-inĩ marĩa mainagĩrũo nyĩmbo itaagĩrĩire, kana tũrĩ arĩu, na tũtigatuĩke arũmĩrĩri ũhoro wa gũkomania, o na kana wa ũũra-thoni, kana tũgĩage na njũgitano, o na kana tũiguanagĩre ũiru.

14No rĩrĩ, wĩhumbei Mwathani Jesu Kristo, na mũtigatũũre mũhaaragĩria ũhoro wa mwĩrĩ, nĩguo mũhũnagie merirĩria maguo.

← Chapter 12 Jump to: Chapter 14 →